Pro Division atangin Tuipuiral an tla a, club pathum - Hlimen, Ngopa leh Keitum ten hmun ruak pakhat inchuhin Inrinniah Tuikual Indoor Stadium, Aizawlah playoff an khel dawn.

Mizoram Volleyball Association (MVA) Executive Committtee chuan Ningani khan technical committee-in 2022-23 season chhunga Pro Division club-te dinhmun a theh luh atangin thutlukna a siam a, tournament vawi thum awm atanga hniam ber, Tuipuiral tlain Mizoram volleyball division sang berah Pro Volleyball League champion Thutak Nunpuitu Team, Hunthar, Chhinga Veng, Tuichangral leh Durtlang North an awm zui zel ang.

2022 nipui lai khan Pro Division-ah a vawi khat nan Tuipuiral an tling a, season hawnna tournament leh MVA Cup-ah an che tha tawk lo va, season kharna leh inelna sang ber, Pro Volleyball League-ah semifinal lut pha lovin a hniam pahnih zingah an tel zui leh a ni.

Season tharah Pro Division-ah mipa team paruk an awm leh dawn a, hmun ruak pakhat inchuhin Aizawl district atangin Hlimen, Serchhip district atangin Keitum leh Saitual district atangin Ngopa an inel dawn a, Inrinni zing dar 10-ah tanin vawi khat theuh an inkhelh kual chhuah hnua a sang ber an tling dawn a ni.

Pro Division hmeichhiaah team ruk tho an awm dawn a, season liam taah pasarih awmin Power Department Sporting Club leh Armed Veng South an tla a. Pro Volleyball champion, Luangmual bakah Kanan, Bethlehem Vengthlang, Bungkawn leh Durtlang awm zuiin kar lehah hmun ruak pakhat luah khattu tur tihfel a ni ang.

MVA chuan an hnuaia club hrang hrangin season thar atan player ziah luh hun tur an siam fel bawk a, July 22 atanga 29 chhungin Pro Division club, district hnuaia club leh zone hnuaia club-te tan player ziah luh hun an hawng a, player chungchangah harsatna awm thei ven nan Mizoram pumah hun inang an hmang tlang vek a ni.