Mizoram Volleyball Association (MVA) Pro Division season tharah Hlimen Volleyball Club an tel dawn ta a. Inrinnia hmun ruak pakhat inchuha club pathum inelnaah a chung ber nihna an hauh a ni.

Season liam ta, 2022-23 chhungin club paruk inel zingah Tuipuiral chu an chet that tawk loh avangin season tharah division sang berah an inlan phak tawh dawn lo va, an aiawh turin club pathum - Saitual district champion Ngopa, Keitum leh Hlimen ten play-off khelin Inrinni khan an inel a ni.

Tuikual Indoor Stadium-a play-off khelhah hian club pathumte hi an inkhel kual chhuak vek a, hetah hian Hlimen chuan vawi hnih khelhah hnehna chang ve vein season tharah Pro Division-ah an inlan ve dawn ta a ni.

MVA executive committtee chuan Ningani khan technical committee-in 2022-23 season chhunga Pro Division club-te dinhmun a theh luh atanga thutlukna siamin tournament vawi thuma hniam ber, Tuipuiral hi an tla a. Season tharah hian division sang berah Pro Volleyball League champion Thutak Nunpuitu Team, Hunthar, Chhinga Veng Spikers, Tuichangral leh Durtlang North an awm zui ang a, Hlimenin an belh dawn ta a ni.

Season lehah hian Pro Division hmeichhiaah pawh team ruk tho an awm dawn a, season liam taah pasarih awmin Power Department Sporting Club leh Armed Veng South an tla a. Pro Volleyball champion Luangmual, Kanan, Bethlehem Vengthlang, Bungkawn leh Durtlang awm zuiin kar lehah hmun ruak pakhat luah khattu tur tihfel a ni ang.

Pro Division (mipa) play-off result:
1st Match:
Hlimen bt. Keitum (3-1)
23-25, 25-19, 25-21, 25-21

2nd Match:
Ngopa bt. Keitum (3-2)
26-24, 25-19, 19-25, 15-25, 15-8

3rd Match:
Hlimen bt. Ngopa (3-1)
25-27, 25-23, 28-26, 25-19