MST Motors chuan Tata SK 612 LPS Pro Fight-a tel boxer tha ber hnenah Ather Electric Scooter 3X a pe dawn.

Championship title sponsor Zothan Autoworks neitu, Zothantluanga chuan India rama electric scooter fak hlawh tak, Ather la lutin MST Motors hmingin tun thla chhungin dealership a hawng dawn.

MST Motors hian boxer tha bera thlan hnenah Mizorama Rs 1,60,000 - 1,70,000 vela zawrh chhuah tur electric scooter 3X a pe dawn a, Pro Fight Management Team nen inremna an siam fel.

D3 Business Enterprise, GIG Motors, RS Traders leh North East Consultancy Services (NECS) ang bawkin championship sponsor zingah a tel nghal bawk ang.

Kum 2009 atanga vawi kua neih tawhah boxer-ten lawmman atan lirthei an la dawng ngai lo va, Pro Fight chanchina thil chhinchhiahtlak tak leh boxer-te tana chanchin lawmawm a ni.

Nikum khan a bitum zawng zawng knockout vekin flyweight-ah Ramthar Lunglei boxer Laldinsanga a champion a, KT Enterprise Best Boxer lawmman Panasonic washing machine a dawng.

Kum 20 mi, Dinsanga hian weight hrang pahniha champion a tum a, fly kalsanin bantam-a tel turin application form a theh lut.

Nikumah vawi nga champion tawh, NT Lalbiakkima a tel lo ve thung a, tun tumah fly-ah a tel dawn tih a sawi chiang tawh a ni.

September 20 thleng weight hrang pangaa tel tur tan hun hawn a ni a, Thawhlehni zan dar 6 thlengin boxer 298-in application form an theh lut tawh a ni.