Thawhtanni zana LPS Arena, Falkland Venga tan tur, Tata SK 612 LPS Pro Fight-a intum turte puan a ni ta a, a tan zanah weight then hran panga zinga pali atangin boxer 20 an inlan nghal dawn.

LPS Pro Fight-ah hian tel tuma mi 395 hming thehlut zinga 281 an inlan dawn a, ni 41 chhung awhin zan 28 inhnek a awm dawn.

Inrinnia fixture tar chhuahah a tan zan hian weight pali - fly, bantam, light leh welter atangin inhnek 10 a awm dawn a. Middle weight-a telte chu a zan 16-na, October 21, 2023 atangin an inlan tan ang.

A tan zanah hian fly-ah inhnek panga, bantam leh light-ah pahnih ve ve leh welterweight-ah pakhat a awm dawn a ni.

Pro Fight-ah hian November 02, 2023 atangin zan thum awhin quarterfinal inhnek a awm ang a. November 6 leh 7-ah semifinal inhnek awmin November 10 leh 11 zanah final a ni ang.

Kuminah Pro Fight-ah hian flyweight (kg 48-52)-ah boxer 108, bantamweight (kg 52-56)-ah 60, lightweight (kg 56-61)-ah 59, welterweight (kg 61-67)-ah 40 leh middle weight (kg 67-74)-ah 14 an inlan dawn a ni.

Boxer inlan tur 281-te hi hlawm hnihin, tawn hriat nei lo leh nei tawha then hran an ni a, weight khata tel an tam dan azirin tawn hriat nei lote an inthlifim hmasa dawn a ni.

A tan zan hian Sports Minister Robert Romawia Royte-in a hmanpui dawn a. He hunah hian ring announcer thin, Joy Zairemmawia sunna hun hman a ni bawk ang.

A TAN ZANA INHNEK TURTE:
FLYWEIGHT:
Bout 1: Jacob Malsawmdawnga (Tuikhuahtlang) v Vanlalhriatpuia (Phullen)
Bout 2: Lalhriatzela (Maubawk) v HS Ramnunthara (Samlukhai)
Bout 3: Remruatpuia Buhril (Vaitin) v Lalrammawia (Tanhril Vengpui)
Bout 4: Malsawmtluanga (Bawngkawn) v Vanlalmalsawmdawngliana (Saitlaw)
Bout 5: Joney Lalremruata (Thingsulthliah) v Lalchhuankima (Samlukhai)

BANTAMWEIGHT:
Bout 6: Lalhriatpuia (Phunchawng) v Sumrosanga (Sakawrdai)
Bout 7: Lalramtluanga (Khuangthing) v Lalduhawma (Luangmual)

LIGHTWEIGHT
Bout 8: Lalpeklawma (Vangchhia) v Khupchhing Lalvenhima (Bungtlang South)
Bout 9: Malsawmkunga (North Chaltlang) v Malsawmtluanga (Ramthar North)

WELTERWEIGHT
Bout 10: Zonunsanga (Bawngkawn) v Chanchinmawia (Lungsen)