ZALEN, Sept. 09, 2026: Mizoram Labour Link LPS Pro Fight-in mipui hlut a hlawh nghal hle a, zan hmasa berah Lalremthanga Hmar chuan technical knockout-in Khamsuana a hneh a, Orient Goldsmith Fighter of the Night atan N Lalhruaizela thlan a ni.

LPS Arena, Falkland-ah thawhlehni zan khan tan a ni a, ruahsur karah mipui eng emaw zatin a hmunah an en a, inhnek hnuhnung ber flyweight huangah Sakawrdai tlangval Remthanga'n round hnihna a tawp hma chiahin Khawkawn boxer Khamsuana a hneh a, kar leh thawhtanni zanah Malsawmtluanga (Ratu) nen an intawng zui leh ang.

Pro Fight-a tel fo tawh leh Commedian Search atanga hriat hlawh kum 30 mi Remthanga'n mipui lawm a hlawh hle a, tawn hriat nei lo leh amah aia kum 10-a upa Khamsuana hmaah thiamna nei zawk a nihna lantirin round hnihna tawp lamah a hnek zawn a, a vei lama chiang taka a hmaia a hneksak hnuah Khawkawn boxer hnar a thi nasat avangin bawihsawm a ngai a ni. Round hnihna a zawh rualin referee George Lalsangzela'n inhnek titawpin technical knockout-in Remthanga a chak.

Fly inhnek dangah Tawipui South boxer Hruaizela'n round la vekin Johan Lalrindika (ITI Veng) lakah unanimous decision-in hnehna a chang a, boxing thiamna pangngai tak lantirin hmuhnawm takin an inhnek a, Pro Fight-a tawn hriat nei tawh Hruaizela'n a tir atanga a tawp thlengin a thunun a, thawhlehni zana boxer inlan zinga che tha ber lawman Orient Goldsmith Fighter of the Night a dawng a, September 19-ah boruak nei lian Remthanga leh Malsawmtluanga te inhneka chak zawk a hmachhawn ang.

Fly inhnek dangah Jacob Lalduhsaka (Chawntlangpui) chuan unanimous decision-in Vanlalpeka (Sihfa) a hneh a, inhnehtawk hle chungin tharum nei tha leh hneh na zawk Duhsaka'n round hnih lain a tawp lama che tha Peka'n round hnuhnung ber a la ve thung a ni.

Bantam-ah inhnek vawi hnih awmin Lalnunpuia (Rangvamual) chuan technical knockout-in Joseph J Romalsawma (Bualpui NG) a hneh a, round thumnaah second 55 chiah an la inhnek tihin Nunpuia'n nawr hnehin a hnek zawn a, chhang let thei lova Malsawma a inven ringawt avangin referee Malsawmsanga'n a titawp a ni.

C Lalruatfela (Tuirial) chuan Rosangliana (Tlangsam) lakah round tin la vekin 30-27, 30-27, 30-27-in a hneh. Kum 17 mi Ruatfela'n hnek pahin a chhaih kual a, Rosanga'n a tir atanga a tawp thlengin hnek fuh a harsat tluan a ni.

Light-ah awlsam takin Israel Thangliana (R Vanhne) a chak a, a bitum tur Raymond Lalenkawla (Melriat) a inlan lo a ni. Inhnek dangah harsa takin Joseph Lalchawimawia (Saron Veng) a chak ve thung a, Remruatsanga (Kawrtethawveng) nen inhnehtawk taka round thum an inbeih hnuah split decision-in, 28-29, 30-27, 29-28-in a chak hram a ni.

Welter-ah inhnek vawi hnih tho awmin ITI Veng boxer Vanlalhruaimawia'n Ramhmingthanga Zote (Bairabi) a hnek hneh a, round hnihna laihawlah technical knockout-in a chak. An inhnek rei telh telh a, thiamna nei zawk kum 23 mi Hruaia a chungnung tial tial a, round hnihnaah hnek zawnin Hmingthanga'n harsatna a tawk a, a ke a tihnat avangin a khel zawm thei lo a ni.

Dinthar tlangval VMS Tluanga'n unanimous decision-in VL Remruatfela (Mamit) a hneh bawk a, boxer pahnihin thiamna an nei sang lo ve ve a, ban sei leh tharum ngah zawk Tluanga'n 30-27, 30-27, 29-28-in a hneh a ni.

Middle-ah inhnek vawi khat awmin khaw inhnaih tak Vanlalsanga (Suangpuilawn) leh Vanlaldika (East Phaileng) an innuai a, round thum chhungin Sanga'n a hneh zawk tih lantir tluanin 30-27, 30-27, 30-27-in hnehna a chang a ni.

Mizoram Labour Link LPS Pro Fight 2026

Zan 1-na September 8, 2026 (Inrinni) - 8:00 PM : Bout 10 @ LPS Arena, Falkland

RESULT

BANTAMWEIGHT

Lalnunpuia (Rangvamual) def Joseph J Romalsawma (Bualpui NG)

= Technical Knockout (Round 3, Second 55)

C Lalruatfela (Tuirial) def Rosangliana (Tlangsam)

= Unanimous Decision (30-27, 30-27, 30-27)

LIGHTWEIGHT

Israel Thangliana (R Vanhne) def Raymond Lalenkawla (Melriat)

= Walk Over

Joseph Lalchawimawia (Saron Veng) def Remruatsanga (Kawrtethawveng)

= Split Decision (28-29, 30-27, 29-28)

WELTERWEIGHT

Vanlalhruaimawia (ITI Veng) def Ramhmingthanga Zote (Bairabi)

= Technical Knockout (Round 2, Minute 1:19)

MS Tluanga (Dinthar) def VL Remruatfela (Mamit)

= Unanimous Decision (30-27, 30-27, 29-28)

MIDDLEWEIGHT

Vanlalsanga (Suangpuilawn) def Vanlaldika (East Phaileng)

= Unanimous Decision (30-27, 30-27, 30-27)

FLYWEIGHT

N Lalhruaizela (Tawipui South) def Johan Lalrindika (ITI Veng)

= Unanimous Decision (30-27, 30-27, 30-27)

Jacob Lalduhsaka (Chawntlangpui) def Vanlalpeka (Sihfa)

= Unanimous Decision (29-28, 29-28, 29-28)

Lalremthanga Hmar (Sakawrdai) def Khamsuana (Khawkawn)

= Technical Knockout (Round 2)

Orient Goldsmith Fighter of the Night

- N Lalhruaizela (Tawipui South)

Zan 2-na : September 9, 2026 (Nilaini)

FIXTURE

FLYWEIGHT

B11 Lalremruata (Churachandpur, Manipur) v David Vanbiakthawnga (Nghalchawm)

B12 Hmingdailova (Tawipui South) v Malsawmtluanga (Khawbung)

B13 Jacob Malsawmthanga (Dampui) v Vanneihtluanga (Bawngkawn)

B14 Lalruatfela (Bawngkawn) v Lalpekzuala (Thuampui Vengthar)

BANTAMWEIGHT

B15 Rothantluanga (Vairengte) v Lalrinsanga (Thingsulthliah)

B16 Lalruatsanga (Maubawk) v Rinsailova (Thingsulthliah)

B17 Englianthanga (Dawrpui) v Lalhruaitluanga Khawlhring (Siaha)

LIGHTWEIGHT

B18 Thangboi (Churachandpur, Manipur) v Lalruatfela (Bungkawn Vengthar)

B19 Lalruatfela (Ainawn Veng) v H Zomuanpuia (Kolasib Khuangpuilam)

B20 Dominic Laltanpuia (North Vanlaiphai) v Lalrohlua Pautu (Kanan Veng)

WELTERWEIGHT

B21 Francis Malsawmtluanga (Dinthar) v Lalawmpuia Chinzah (Lunglei Ramthar)

B22 John Lalhunlawma (Phainuam) v Omega Sangboi Mate (Kawlbem)