ZALEN, July 09, 2026: LPS Pro Fight-a tel tum tan August chhungin entry form lak chhuah leh theh luh hun hawn a ni a, September 8-ah LPS Arena, Falkland-ah an inhnek tan ang.

Pro Fight vawi 12-naa tel tum tan LPS Office, Zarkawtah August, 2026 chhungin entry form pakhat Rs 10-in a lak chhuah theih a, August 31 ral hmain theh luh tur a ni bawk.

Eng emaw thil avangin 2025 khan Pro Fight buatsaih a ni lo va, Boxing Gym intel khawm hruaitute leh boxer thahnemngaite ngenna ngai pawimawhin Organising Committee chuan 2024 hnua a vawi khat nan huaihawt turin thutlukna a siam a, Mizoramah boxing boruak tihnun thar leh a nih ngei an beisei bawk a; chutih rualin boxer engzat nge tel thei ang tih hriatthiam har an ti hle.

Pro Fight hnuhnung ber 2024 khan weight hrang pangaah boxer 286 telin heng zinga pakua hi Mizoram pawn atanga tel an ni a. Tun tumah pawh hian kum 17 atanga 40 inkar, Mizoram chhung leh pawn atangin mahni insengsoin a duh apiang tel theih a ni.

September 4-ah tel turte zing dar 8:00 atangin LPS Arena-ah an inbuk dawn a, September 7-ah fixture tar chhuah a ni ang. 

Championship hnuhnung berah flyweight title humhim turin NT Lalbiakkima a tel lo va, boxer 91-in a kalsan champion kawnghren inchuhin an zingah hian state pawn atangin mi pakhat, Lamka boxer a tel a, Tuipui tlangval Lalrinngheta a champion a ni.

Bantamweight-ah mi 67 telin Ramthar Lunglei boxer Laldinsanga’n title a humhim a, state pawn atangin mi pahnih, Lamka boxer ve ve an tel a. Lightweight-ah HC Lalramfela’n title a kawl lai kalsanin weight rit zawk welter-ah a insawn a, a kalsan champion kawnghren inchuha boxer 65 tel zingah state pawn atangin mi pahnih, Lamka boxer ve ve an tel a, Lalkhawngaiha, Venghlui, Aizawl a champion.

Welterweight-ah state pawn atanga Lamka boxer pahnih tel nen mi 37 an inlan a, Tuipui boxer Lallawmawma’n Mission Veng tlangval, Lalruatzela Hauzel kut atangin title a chhuhsak.

Middleweight-ah Manipur, Meghalay leh Assam atangin boxer pakhat theuh telin mi 23 an inlan a, F Lalthanliana Jr, Electric Veng, Lunglei chuan Chawngtlai boxer C Lalhruaitluanga kut atangin title a chhuhsak a ni.