A vawi khat nan Mizo tlangval 100 chuangin boxing an khel dawn a, champion tawh mi panga nen thawhlehniah LPS Huan, Falkland Vengah Tata SK 612 LPS Pro Fight title chuh turin boxer 282 an inbuk.

Tel tuma hming pe boxer 395 atangin inbuknaa inlan lo 100 chuang an awm. Weight hrang panga zingah fly-ah 107 ziah luh niin an tam ber a, bantam-ah 61, light-ah 59, welter-ah 40 leh middle-ah 14 an tel dawn a ni

September 30, inrinniah LPS Office, Zarkawtah fixture tar chhuah tur a ni a, October 2, thawhtanni zanah LPS Arena, Falkland Vengah an inhnek tan ang.

Nikum khan weight hrang pangaah boxer 211 telin kuminah 71-in an tam zawk a; chutih laiin middleweight-ah boxer 16 an tlin loh avangin semifinal lut chin hnenah chauh lawmman pawisa fai hlan a ni ang.

Welterweight champion lai C Lalhruaitluanga'n middle title a chuh dawn a, hming pe lut zingah 2019 champion C Lalduhawma tel mah se a inbuk loh avangin professional boxing vawi ruk a khelh tawha chak vek Chawngtlai boxer Hruaia a lansarh phah.2023 Mizoram Fight Night-a hnuhma nei pahnih, lightheavy champion F Lalthanliana Junior leh semifinal lut Daniel Beipasasa bakah, Khelo India Youth-a tel tawh Vanlalhuala'n middle title an chuh dawn.

Weight dangah Hruaia a insawn avangin welter-ah nikuma semifinal lut Lalruatzela Hauzel leh sipai boxer Justine Renthei chuan chona a hmachhawn dawn a; National School Games-a champion tawh Vanlalruatpuia leh Mizoram inelna hrang hranga tawn hriat nei tawh Zonunzira an tel bawk.

Tawn hriat nei lo atangin tunlaia boruak nei tak kum 50 mi Zomuanpuia Tlau (Kolasib) a inbuk a, boxer rual pung khawm hmaah ngampa takin a che kual nghal a, V Zamuana nena an inhnek tum aia a thatzia lantir a tumzia uar takin a sawi. Ani bakah welter huangah Bill Gates a tel dawn a, a vawi khat nan hruihrual chhunga a inhnek ang.

Light-ah champion lai Vanlalawmpuia'n WBC India title chuh a tum avangin a inbuk lo va, bantam champion lai Lalrinngheta'n a title kawl lai rochun tumin a weight a tidanglam ve thung.

2022 light title fight-ah uiawm takin 2015 bantam champion HC Lalramfela a chak lo va; kuminah kum kal taa a chet sualna siam tha turin a kir leh a, Tuipui boxer Rinngheta nen rin hlawh an nih rualin hriat hlawh thama Pro Fight-a inlan tawh thin Lalremsanga (Lungleng II) leh J Lalhruaitluanga (Ramthar) an tel ve leh dawn.

Fly champion lai leh nikuma best boxer Laldinsanga'n weight hrang pahniha champion a tum a, bantam-ah insawnin rin kai a ni nghal. Tawn hriat nei lo eng emaw zat an tel dawn a, chutih laiin tunlaia hmasawn leh professional tum hnih a khel tawha chak ve ve Omega Lalramdina leh nikuma semifinal lut David Laldanmawia inbuk zingah an tel.

Kum 60 mi Jonathan Hmar (Vanbawng) pawh hruihrual chhungah a kir leh dawn a; bantam champion nih tum zingah telin 2017 khan Pro Fight boxer danglam tak My Roken Sir a hneh lo va, tun hi a inlan leh hmasak ber tur niin 2023 Pro Fight boxer zinga upa ber a ni nghal bawk.

Fly-ah Pro Fight-a vawi nga champion tawh NT Lalbiakkima a langsar fal ve thung. 2014-2019 chhungin Biakkima'n lightfly huangah a bitum a hneh vek a, nikumah awlin kuminah a hlawhtling a nih chuan Pro Fight chanchina vawi ruk champion hmasa ber a ni ang.

Nikuma final lut Samuel Lalthlamuana bakah, semifinal lut Gregor Joseph leh C Zosangmawia an tel leh dawn a, kum bithliah huanga hnuhma nei tha tak tak leh boxer beiseiawm Hminthanmawia, Lalmuankima leh Donovan Lalremmawia'n a vawi khat nan Pro Fight-ah fiahna an hmachhawn dawn bawk.

Fly tel turin beidawng duh lo kum 41 mi John Lalhruaisanga a inbuk bawk a; ani hi Pro Fight-a vawi sarih a telna tur niin hneh nei lovin tum nga a tla tawh a, a bitum tur a inlan loh avangin vawi khat a chak ve tawh a ni.

Tel tura inbuk zawng zawng chanve aia tam boxing-a tawn hriat nei lo an ni a. An zinga eng emaw zat chu Pro Fight-a inlan ve chak vanga mahnia inzir chawp an ni a, Sumo driver thlengin mahni infiah duh vangin huaisen takin an inbuk.