ZALEN, Sept. 26, 2026: H Zomuanpuia’n Onminlen hnehin Mizoram Labour Link LPS Pro Fight lightweight round of 16 a lut a, Zirtawpni zan inhnek dangah Franky H Vanlalruatpuia’n Boyka Lalhriatsanga hnehin middleweight quarterfinal a lut.

LPS Arena, Falkland-ah Kolasib Khuangpuilam rawlthar Zomuanpuia’n hnehna pawimawh tak a chang a, round hmasa pahnihah a chet that avangin Churachandpur boxer lakah judge pathumin 29-28 vekin an chaktir.

Fimkhur takin boxer pahnih an inkhel a, inhnek fuh a tam lo a, Zomuanpuia kut chhuak a rang a, round hnihna thlengin hnek dan hmang tam zawk a nih bakah inhnaih chilhah vai chhuak hnemin nalh takin a fuh fo a; mahse, round hnuhnung berah ban sei zawk, Onminlen chuan nawr hnehin a ngila a hnek zawn hmangin a tibuai ve thung.

Inhnek hautakah thiamna tha tak lantira a chak rualin Zomuanpuia’n Orient Goldsmith Fighter of the Night lawmman a dawng a, Nilaini zanah Chhiahtlang boxer Lalruatmawia nen quarterfinal luh inchuhin an inhmachhawn ang.

Light inhnek dangah Kanan Veng boxer Lalrohlua Pautu chuan kut rang leh hnek thiamna zawk a nihna hmangin David Malsawmzela, East Lungdar a thun a, round thum la vekin unanimous decision-in a chak a. Rohlua hian round of 16 a luh rualin Nilaini zanah seeded zinga mi, Vanlalchhuanawma, Thanglailung a inhnekpui leh dawn.

Middle-ah chungnung takin Boyka lakah seeded Franky a inlan a, a umtuah tang tluanin round thumnaah chhiar ngai khawpin Vaitin tlangval a talbuai a, tho leh mah se judge pathum point pekah 30-26 vekin Lunglei Salem Veng boxer a sang a, a inhnek hmasak berah chiang takin a chak.

Kum 22 mi, Franky- hian quarterfinal-ah Thawhtanni zana inhnek tur, Samuel Zadeng leh K Lalremsanga te chak zawk a hmachhawn ang.

Fly-ah Bilkhawthlir boxer PC Lalremruata’n round khatna hmang tluan lovin Lalruatfela, Ramhlun North a hneh a, rei an inhnek hmain a hnek tlu nghal a, Ruatfela tho leh mah se um zuiin a hnek zawn a, round khatna tawp nan second 34 a la awm tihin referee Chawnghmingmuana’n inhnek a titawp.

Inhnek dangah inhneh tawk taka round thum an hman zawk hnuah North Molhai boxer Vincent Khongsai chuan thiamna nei zawk a nihna lantirin Malsawmdawngzela, Lungkawlh a hneh hram a, split decision-in a chak.

Manipur atang tel, Khongsai hi Thawhtanniah a inlan leh nghal dawn a, round of 16 luh inchuhin Benjamin Lalrindika nen an inhnek ang.

Lungtian rawlthar, Rommel Malsawmdawngliana chuan inhnek hautakah hnehna a chang bawk a, rei an inbeih hmain Chin State, Myanmar boxer Chin Lion a hnek tlu nghal a, round hnihna thlengin a hman thiam a vei lamin a hnek fuh fo bawk a; mahse, thahrui nei fei zawk Lion chuan hnek chhuak hnem zawkin a tawp lamah a tibuai hle.

Jugde pakhatin Lion a chaktir a, pahnihin Rommel-a chaktir ve thungin split decision-in a tlang a, Thawhlehni zanah Alfred Lalrinsiama nen round of 16 luh inchuhin an inhnek zui ang.

Bantam-ah Thingsulthliah boxer Lalrinsanga’n fel fai takin a khel tluan a, Lalnunpuia, Rangvamual lakah unanimous decision-in a chak a. Rinsanga hian hnek thui zawk a nihna thiam takin a hmang tluan a, tha taka inveng chungin a ban phak atangin fuh takin a hnek fo a, round of 16 lutin Thawhlehni zanah seed sang ber, L Joseph Buihringpachha nen an inhmachhawn ang.

Tuirial boxer C Lalruatfela’n unanimous decision-in Lalruatsanga, Maubawk a hneh bawk a, tharum nei leh hnek thui zawk a nihna tha takin a hmang a, Thawhlehni zanah seeded zinga mi, Dolrich Zothansanga nen quarterfinal luh an inchuh dawn a ni.

Vairengte rawlthar, Lalfakzuala’n Lalbiaktluanga Fanai, Lawipu lakah inhnek thununin round tin a la vek bawk a, ani pawh hi round of 16 lutin Nilaini zanah seeded boxer Lalruatfela nen an intawng zui ang.

Welter-ah ITI Veng tlangval, Zothansanga’n VMS Tluanga, Dinthar lakah round hnih lain unanimous decision-in a chak a, thiamna nei sang lo ve ve mah se Zothana’n a hnek thiam zawk a, round of 16 a lut a ni.

Upper Republic boxer Zohmangaiha’n a tir lamah chet harsat deuh mah se tlo takin a khel a, round hnuhnung berah chhiar ngai khawpin Francis Lalenrema, Chhinga Veng a hnek tlu a, a thawh leh hnuah round thum hmang tluan mah se chiang takin unanimous decision-in a chak a ni.

Zohmaa inlan hmasak ber niin round of 16 a lut nghal a, Nilaini zanah an khelh hma chiaha chak, ITI boxer Zothana nen quarterfinal luh inchuhin an innuai ang.

Mizoram Labour Link LPS Pro Fight 2026

Zan 15-na : September 25, 2026 (Zirtawpni) @ LPS Arena, Falkland

RESULT

FLYWEIGHT

PC Lalremruata (Bilkhawthlir) def Lalruatfela (Ramhlun North)

= Technical Knockout (Round 1, Minute 2:26)

Vincent Khongsai (North Molhai) def Malsawmdawngzela (Lungkawlh)

= Split Decision (28-29, 30-27, 29-28)

Rommel Malsawmdawngliana (Lungtian) def Chin Lion (Sate, Chin State, Myanmar)

= Split Decision (28-29, 29-28, 29-27)

BANTAMWEIGHT

Lalrinsanga (Thingsulthliah) def Lalnunpuia (Rangvamual)

= Unanimous Decision (30-27, 29-28, 29-28)

C Lalruatfela (Tuirial) def Lalruatsanga (Maubawk)

= Unanimous Decision (29-28, 30-27, 30-27)

Lalfakzuala (Vairengte) def Lalbiaktluanga Fanai (Lawipu)

= Unanimous Decision (30-27, 30-27, 30-27)

LIGHTWEIGHT

H Zomuanpuia (Kolasib Khuangpuilam) def Onminlen (Churachandpur)

= Unanimous Decision (29-28, 29-28, 29-28)

Lalrohlua Pautu (Kanan Veng) def David Malsawmzela (East Lungdar)

= Unanimous Decision (30-27, 30-27, 30-27)

WELTERWEIGHT

Zothansanga (ITI Veng) def VMS Tluanga (Dinthar)

= Unanimous Decision (29-28, 29-28, 29-28)

Zohmangaiha (Upper Republic) def Francis Lalenrema (Chhinga Vengthlang)

= Unanimous Decision (29-27, 29-27, 30-26)

MIDDLE WEIGHT - ROUND OF 16

Franky H Vanlalruatpuia (Lunglei Salem Veng) def Boyka Lalhriatsanga (Vaitin)

= Unanimous Decision (30-26, 30-26, 30-26)

Orient Goldsmith Fighter of the Night

- H Zomuanpuia (Kolasib Khuangpuilam)

Zan 16-na : September 26, 2026 (Inrinni) - 8:00 PM

FIXTURE

FLYWEIGHT

B170 Jangkhochon Lupho (Churachandpur, Manipur) v Laltlansanga (Rawpui)

B171 Mangmuanlian (Lamka, Manipur) v Ramtharnghaka (Dungtlang)

B172 N Lalhruaizela (Tawipui South) v Kapzalawma (Vaikhawtlang)

B173 David Vanbiakthawnga (Nghalchawm) v Michael Zosangliana (Sialhawk)

BANTAMWEIGHT

B174 Lalhmangaihkima (Salem Veng) v Lalruatkima (Falkland)

B175 Lalrinsangzela (Champhai Kanan) v Lalremruata Fanchun (Bualpui NG)

B176 Thanchamliana (Farkawn) v Thangbiakdik (Lamka Manipur)

LIGHTWEIGHT

B177 Zaithanmawia (Ramthar Veng) v Lalrinhlua (Maubuang)

B178 C Lalfakawma (Phuaibuang) v Lalrohlua (Dinthar)

WELTERWEIGHT

B179 Vanlalnghaka (Bungkawn) v Dintluanga Mualchin (Khankawn)

B180 Lalremruata Varte (Bawngkawn West) v James VL Khawngaihkima (Bethlehem)

MIDDLE WEIGHT - ROUND OF 16

B181 Vanlalhriata (College Veng, Aizawl) v PC Lalramengmawia (Lunglei Sazaikawn)