ZALEN, May 03, 2026: Mizoram Rural Bank Pro Volleyball League hawn zanah nikum final-a inkhel, Anastasia Electric Veng leh Thutak Nunpuitu Team (TNT) an inhmachhawn nghal dawn.

Inrinni khan Hawla Indoor Stadium Conference Hall, Republic Vengthlangah lemchang thiam, Sangsangi'n fixture tlangzarhin musician Victor Vanlalhruaia'n handbook a tlangzarh bawk.

Karleh Thawhtanni zanah LPS Arena, Falkland, Aizawlah khelh tan a ni dawn a, nomawi humhim turin champion lai, Anastasia an inlan nghal dawn a, TNT nen an inkhel ang.

May 24, 2025 khan final-ah Electric Veng club hian 26-24, 25-10, 21-25, 25-21 (3-1)-in Muanna Veng team an hneh a, a vawi hnih nan an champion a. Pro Volleyball League hmasa ber, kum 2016 khan final-ah Anastasia-in TNT tho an hneh tawh a, 2023 champion Muanna Veng team-in hmabak hlen tur pawimawh tak nei tel chungin league bul an tan dawn a ni.

May 12 zanah nikuma semifinal lut ve ve, Khawbel leh Tuichangral intawngin Nilaini zanah Sihphir leh Chhinga Veng Spikers an inhmachhawn dawn a, round hmasa ber a zo vang a. Mipa team sarih inel tur zingah vawi thum champion tawh, Hunthar an inlan hnuhnung ber dawn a, May 15 zanah Sihphir nen inkhelin bul an tan dawn a ni.

Hmeichhiaah Pro Volleyball League-a la tel ngai lo team pali inelin June 1-ah league an tan ve thung dawn a, ni hmasa berah hian inkhel vawi hnih awmin an inlan kim nghal ang a. Eric Pautu Academy leh ITI Veng GSA ten bul tanin Chhinga Veng Spikers leh Tuichangral an inkhel zui dawn a, anni pahnih hi season tanna tournament final-ah intawng tawhin Tuichangral an chak.

Zan dar 6-ah hmeichhe inkhel pakhat awmin a dang zawng zan dar 8-ah vek tan a ni dawn a; mipa lamah vawi khat an inkhelh kual hnua a sang pali tlangin June 10 leh 11-ah semifinal an khel ang a. Hmeichhiaah a sang pahnihin final lut nghalin June 12-ah champion an inchuh dawn a, June 13-ah mipa final hmangin championship hmawrbawk a ni ang.

Mizoram Volleyball Association (MVA) President Dr Lalmalsawma Nghaka chuan pawlin sum nghah lo mah se hruaitute an inlungrual a, LPS Vision nen tha taka an thawh ho bawk avangin a vawi kua nan Pro Volleyball League buatsaih a ni thei tur chu lawmawm a tih thu a sawi.

Mizoram volleyball zahawmna humhimpui tur leh tinung zel turin club tin a sawm a, technical lam khawihtute hnenah a dik thei ang bera thutlukna an siam theih nan theihtawp chhuaha tan la leh zual turin a ngen bawk.

MIZORAM RURAL BANK PRO VOLLEYBALL LEAGUE 2026

@ LPS Arena, Falkland, Aizawl

MIPA

1. Anastasia Electric Veng

2. Thutak Nunpuitu Team

3. Tuichangral

4. Khawbel

5. Sihphir

6. Hunthar

7. Chhinga Veng Spikers

HMEICHHIA

1. Tuichangral

2. Chhinga Veng Spikers

3. Eric Pautu Academy

4. ITI Veng GSA