ZALEN, May 15, 2026: Set an hloh hmasak hnuah champion lai, Anastasia Electric Veng kir lehin Mizoram Rural Bank Pro Volleyball League-ah hnehna an chang zawn a, set hnihna atanga set thum an lak zawn rualin Khawbel nen Mizoram volleyball inelna sang bera vawi thum an insut tawhah an chak vek.

Thawhtanni khan championship hawn nan nikum final-a an hneh tawh, Thutak Nunpuitu Team (TNT) lakah set thum set khat thovin Anastasia an chak tawh a. Ningani zanah Tuichangral hmaa chak tawh, Khawbel lakah a hma aia inkhairual leh hriam leh zualin an inlan a, Karthik Madhu chuan point 20 hmuin Zosangzuala (Mama), Zomuansanga leh Laldinsanga ten point 10 chuang vek an hlawh chhuah bakah set thumna atangin Ngursangzuala’n tum riat a vaw tla bawk.

Nikumah a vawi khat nan Pro Volleyball League-ah Khawbel an tel a, league-ah set thum set khatin Electric Veng club an hneh lo va, semifinal-ah a hma aia chiang zawk, set thum faiin Anastasia-in an hneh nawn.

Tun season-ah Khawbel hian set thum set hniha Tuichangral hnehin tha takin league bul an tan a, inrintawkna sang tak nen Anastasia hmaah bul tan tha mah se set khatna an lak hnuah an nghet zui lo va. Hun pawimawhah an insawrbing tawk loh avanga point an hloh thin an tuar a, Anastasia angin inelna sangah danglamna siam thei player an ngah tawk lo tih a lang bawk.

Mi malin Khawbel captain Johan Vanneihsanga a che tha a, vawi 29 hlap tlain point riat a hloh a, a team chakpui zo lo mah se Kuriz Player of the Match lawman a dawng a. A kawppui, Anurag Rawat a tla hniam ve thung a, point 28 hmuin tum 16 a tisual a, an pahnih ni lo player dang zingah point nga aia tam hmu phak an awm loh avangin team pum pui khaikhinin Anastasia an el zo lo deuh.

Set hmasa berah Johan-a leh Anurag chuan a hma leh hnung atangin ball an hmuh an hlah mang lo va. Delhi tlangval, Anurag-a hian a vuak tlak hnuah Anastasia spiker Karthik-a hlap an dansak a, 22-18-in Khawbel an sang a. Anastasia-in an hnaih chilh hman tawh lo va, 24-22-a nih laiin Johan-a’n inringtawk takin a vaw tla.

Set hnihnaah tawn hriat nei tha zawk, Anastasia-in hma an sawn hret a, point inhmuh chhawk chhovin 24-24 a nih laiin Mama’n a hlap tla a, Khawbelin nih rual leh nghal thei turin Johan-a’n hun tha a neihah a vaw sual ve thung a, Electric Veng club-in set an lak phah.

Anastasia-in mar pangngai takin an khel zui a, ball vaw tla thei player duhthlan tur an ngah zawk bakah lehlam hlap dan kawngah Mama leh Karthik an thawh hlawk tel a. Khawbelin Johan-a leh Anurag an chhawr rim a, inhnehtawk tak chungin set la zui zo lovin hun an hmang tluan a, season liam taa Anastasia laka an tlawm tawhna chhan let an tumna an puitlin thei ta lo a ni.

Anastasia an chak zawn rualin mipa inelna huanga champion hnem ber, Hunthar nih ruala a vawi thum nan champion an tumna kawngah rin an hlawh a, Thawhlehni zanah inlan lehin Tuichangral nen an inkhel ang.

Khawbelin insiam that mamawh chungin Thawhtanniah Hunthar an khelhpui ve thung ang.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT (Round 2 : May 14, 2026 - Ningani zan)

Anastasia Electric Veng def Khawbel (mipa)

22-25, 26-24, 25-23, 25-22 (3-1)

Kuriz Player of the Match - Johan Vanneihsanga (Khawbel)

Cheetak Fan of the Night - Lallawmsiami (Khawbel)

STATS:

ANASTASIA ELECTRIC VENG

Karthik Madhu: Point Hmuh - 20, Point Hloh - 11

Zosangzuala: Point Hmuh - 12, Point Hloh - 2

Zomuansanga: Point Hmuh - 14, Point Hloh - 7

Laldinsanga: Point Hmuh - 13, Point Hloh - 7

Ngursangzuala: Point Hmuh - 8, Point Hloh - 2

KHAWBEL

Johan Vanneihsanga: Point Hmuh - 29, Point Hloh - 8

Anurag Rawat: Point Hmuh - 28, Point Hloh - 16

Lalremfela: Point Hmuh - 5, Point Hloh - 3

Lalhunthara: Point Hmuh - 4, Point Hloh - 3

David Lalramhmachhuana (setter): Point Hmuh - 4, Point Hloh - 3

Innocent Malsawmzuala: Point Hmuh - 3, Point Hloh - 1

FIXTURE (mipa) - ROUND 2

May 15, 2026 (Zirtawpni)

8:00 PM : Hunthar v Sihphir 

May 16, (Inrinni)

8:00 PM : Thutak Nunpuitu Team v Tuichangral