Luangmual tan kawng a awlsam tluan a. Ningani zanah chungnung takin Kanan lakah 3-0-in hnehna an chang a, Tata SK 712 Pro Volleyball League-ah an champion.

R Dengthuama Indoor Stadium, Mualpuiah filawr taka inlan, Nipa Barad chuan mi mala amah hnaih ber aiin point 21-in a hmu tam a, 25-21, 25-12, 25-17-in Luangmual a chakpui.

Pro Division kai thar Luangmualin season hawnna tournament-ah final an lut nghal a; mahse, ngam loh an nei a. Kananin MVA Cup nen trophy pahnih an la zawn ve thung a, season kharna Mizoram inelna sang berah rin an hlawh.

Pro Volleyball-a an tel hmasak berah Luangmualin champion nghal an duh tak zet tih an lantir a, Mizoram pawn atanga player la lut awm chhun niin Gujarat atangin beach volleyball-a hnuhma nei tha tleirawl, Nipa an chaw lut.

Kum 18 mi, feet 5 leh inchi 9-a sang hian thla tharah India volleyball camp a zawm dawn a. Mizo leilungah inbuatsaihna hun duhawm hmangin, vawi sarih a khelhah point 196 hmuin 92 a hloh a, spiker tha ber chawimawina dawn bakah a team-ten a laka beisei an neih tihlawhtlingin a chakpui vek.

Final-ah Nipa hian point 30 hmuin 14 a hloh a, a kawppui, Lalmuanpuii chu amah hnaih ber niin vawi kua vaw tlain tum li a tisual a. Kolasib nula hian a pum puiah Luangmual tan point 90 thawk chhuakin 37 a paih a, Nipa el thei ber a ni tel bawk.

Lalramliani’n tum kua vaw tlain R Laltleipuii’n point riat a hmuh zat chiah a hloh ve thung a. Championship chhungin Kanan innghahna pahnih, Tleipuii’n point 67 leh Rami’n 59 an hlawh chhuak a, danglamna siam kawngah an elpui, Nipa leh Muani an khan lo viau a ni.

June 22 khan league-a sang ber nih inchuhin hmeichhe team tha pahnih an inkhel tawh a. Set hmasa ber an lak hnuah season kal meka a vawi khat nan Kanan an tlawm a, an intawn nawn lehnaah a hma aia chiangin Luangmual an chak a, phu takin an champion.

Set khatnaah D3 Business Player of the Match lawmman dawngtu, Nipa chuan vaw tla zawn chho nghalin 5-0-in an sang a. An tlawm tawhna chhan let tumin Kanan an insawrbing nasa a, Lalramliani’n a hlap tlak rualin 16-16-in an nih rual.

F Lallianchhungi’n ball tha taka a siamsak hmangin Gujarat tleirawl chuan vawi li a vaw tla zawn a, 21-17-a sang zawk an nih leh hnuah Luangmual tan kawng a awlsam a. Nipa dan tuma Kanan inbuatsaihna a hlawhtlin zawh loh mai bakah, set hnihna atangin Muani leh R Malsawmtluangi’n Luangmual an tanpui tel bawk.

Set hnih an hloh zawn hnuah Rami leh Tleipuii’n Kanan tanhmun siam thain 9-6-in hma an hruai hman a; mahse, Kolasib spiker Muani’n point thum hmu zawnin Luangmualin an lehpel zui a, inthlau lovin an inum chho.

Dawrpui Vengthar nula, Rami’n a vuak tlak rualin Kananin an nih rual ve leh a. Set hmasa ber ang thovin 16-16 a nih laiin Nipa chuan Luangmual kal falpui lehin point ruk an hmu zawn a, 22-16 a nih hnuah lehlamin point khat chiah an hmuh belh.

Luangmual insensona a thlawn lo va, Pro Volleyball-a an tel vawi khatnaah an hlawhtling nghal a. Power Department Sporting Club, Durtlang leh Bethlehem Vengthlang hnung zuiin champion thei palina an ni a, Kananin a vawi khat nan champion an tumna bakah trophy pathum nen season khar an tumna a hlawhtling zo ta lo.

Stats:
LUANGMUAL:
Nipa Barad: point hmuh - 30, point hloh - 14
Lalmuanpuii: point hmuh - 9, point hloh - 4
Hmingthazuali: point hmuh - 8, point hloh - 3
R Malsawmtluangi: point hmuh - 8, point hloh - 3

KANAN:
Lalramliani: point hmuh - 9, point hloh - 5
R Laltleipuii: point hmuh - 8, point hloh - 8
B Tlangmawii Varte: point hmuh - 3, point hloh - 0
Lalhriatpuii: point hmuh - 2, point hloh - 2
Lalbiakngheti: point hmuh - 2, point hloh - 2

LAWMMAN:
Champion: Luangmual
Pahnihna: Kanan
KT Enterprise Best Spiker: Nipa Barad (Luangmual)
KT Enterprise Best Setter: F Lallianchhungi (Luangmual)
KT Enterprise Best Receiver: Esther Hmingthansangi (Kanan)
KT Enterprise Best Coach: Lalrova (Luangmual)

PRO VOLLEYBALL LEAGUEHMEICHHE CHAMPION:
2017 - Power Department Sporting Club
2019 - Durtlang
2022 - Bethlehem Vengthlang
2023 - Luangmual

FIXTURE:
JUNE 30 (ZIRTAWPNI) - FINAL
08:00 pm: Thutak Nunpuitu Team v Hunthar (mipa)