Final vawi thum an khelhna turah Thutak Nunpuitu Team-in an chet sual tawhna siam that theih an inring a, Tata SK 712 Pro Volleyball League champion nih inchuhin Zirtawpni zan hian an elpui kumhlun, vawi thum final khelhna tur ve tho, Hunthar nen an inhmachhawn dawn.

TNT hun a ni ve tawh?
Mizoram volleyball-a team hlawhtling, TNT-in hun duhawm an hmang mek a, championship kal mekah derthawng lovin an hmaa awm an hneh zel a. An duhthusam leh an la neih loh trophy vaw chhuak turin an vanneih hun a inher chhuah tawh ngei an beisei.

Pro Volleyball hmasa ber, 2016-ah league-a sang ber ni chungin final an khel tawh a, nikumah knockout round lut hramin final an khel leh a; mahse, a vawrtawp chuang chhuak zo lovin an tlawm ve ve.

Assistant coach Lalzawmliana chuan kum kal taa an player-te vek kha ni mah se puitlin lam an pan a, kum sarih kal taa champion zo lo TNT team tha tak nen khan tehkhin theih an nih thu a sawi.

“2016 khan kan tha em em a, league-a sang ber kan nih hnuah Anastasia (Electric Veng) kan hneh ta lo va, na kan ti hle. Nikumah kan player-te an la naupang a, boruak sang leh danglamah kan buai deuh tih a hriat.

“Tunah chuan eng dinhmunah pawh kan nghet tha hlein ka hria a; semifinal-ah khan Tuichangral hmaah kan khel a buai a. Kan setter (Lalliankima) a damsam loh avangin a rukin harsatna kan nei a, kan chak mai kha kan vannei.

“Pangngai taka kan khelh phawt chuan kan champion theih ka ring a, chutih rualin setter-in tha taka ball a siam theih a pawimawh a, final-a chak lo zawk kan nih tawh loh kan beisei hle a ni,” a ti.

Hmuhnawm bik Valbuanga
2022 Pro Volleyball Mizo player tha bera thlan, Vanlaltanchhana (Valbuanga) chuan team tan hlawk leh innghahna tham leh zualin a khel mek a. Vawi ruk an khelh tawhah point 142 thawk chhuakin 44 a hloh a, Mizo zinga point hmu tam ber niin TNT ralthuam hlauhawm ber a ni tel bawk.

June 21 khan TNT-in 3-1-in Hunthar an hneh tawh a, Zosangzuala (Mama) chuan vawi 16 vaw tlain tum li chiah a tihsual bakah net bulah lehlam vuak a dang tha a, TNT tan chet awlsam phahin khelh tha bera thlan a ni nghe nghe.

Mizo hlanga champion hmasa ber nih tuma an kalkawngah vanglai hmang dun mek, Valbuanga leh Mama bakah Laldinchhunga’n point 60 a hlawh chhuak a, setter Makima a dam pangngai leh mek a, a hnung atanga inkhel tinungtu libero Lalramnghakdika nen a tha thei ang bera inlan turin an inpeih.

Final khel thiam Hunthar
2017 leh 2018 champion Huntharin final an vawi thum luhna tho a ni a, final an luh vawi hniha TNT an tlawh ve ve laiin Hunthar hi chu an champion ve ve a, final-a khelh an thiam riau. Chutih laiin an elpui mek angin an tlo tawk lo va, Pro Volleyball-a an insut hnuhnun vawi hnihah an tlawm zawn.

Coach VL Malsawma Renthlei chuan rin hlawh lo zawk a ni tih a pawm a, lehlam chet sual changin hun tha an zawng dawn tih a sawi bakah, final-a sulhnu an neih tawh danin awmzia a neih a ring lo.

“Tun championship kan khelh chhoh danah keini aiin TNT an tha zawk fe a, kan inkhelh tawhah pawh kan hneh lo. An tihsual changin kan khel dawn a, kawng min hawnsak a nih hlauh chuan hun tha kan nei thei ang,” a ti.

Semifinal-ah 3-0-in Chhinga Veng Spikers an hneh a, team pum pui chawi kangin TNT nen an inkhelh tuma talbuai Gagandeep Singh chuan vawi 22 a vaw tla a, Laldensanga’n point khat chiah hlohin tum kua a hlap tla.

Sawma chuan, “Kan khel pangngai hle a, a aia tha zawka kan khelh zui theih pawh kan beisei,” a ti a, hliam leh harsatna dang nei lovin final khelh theih a inbeisei.

Hunthar tan captain Remsangzuala’n hmun pawimawh a luah a, setter zingah D3 Business Player of the Match-a thlan awm chhun niin an team tana point hmu tam ber, Punjab police Gagan chuan vawi 131 vaw tla tawhin 60 a paih ve thung.

Point 70 thawk chhuak tawh Zomuansanga’n team a tanpui bakah mi malin hming a chher a, ani ang bawka hma lam pan mek Lalnunfela’n point 52 hmuin hriat hlawh tawh Densanga nen an intluk tawk viau a ni.

Stats:
TNT:
Vanlaltanchhana: play 6 (point hmuh - 142, point hloh - 44)
Zosangzuala: play 5 (point hmuh - 52, point hloh - 16)
Laldinchhunga: play 5 (point hmuh - 60, point hloh - 30)
Sadrak Fanai: play 6 (point hmuh - 48, point hloh - 20)
Vanlalchhantluanga Sailo: play 6 (point hmuh - 29, point hloh - 19)

HUNTHAR:
Gagandeep Singh: play 6 (point hmuh - 131, point hloh - 60)
Zomuansanga: play 6 (point hmuh - 70, point hloh - 43)
Laldensanga: play 6 (point hmuh - 56, point hloh - 21)
Lalnunfela: play 6 (point hmuh - 52, point hloh - 22)
Lalramnunfela: play 6 (point hmuh - 42, point hloh - 21)