ZALEN, May 22, 2026: Hnehna kawngah champion lai, Anastasia Electric Veng kir lehin Sihphir lakah an tlawm tawhna an chhang let nghal a, Ningani zana set thum faia an chak rualin Mizoram Rural Bank Pro Volleyball League table-a sang ber an nihna an sawh nghet.

LPS Arena, Falkland-ah Anastasia tan Zomuansanga, Kush Singh leh Laldinsanga ten team pui point hmuh 68% an hlawh chhuak a, 2024 Best Spiker Zomuana’n vawi 18 vaw tlain point sarih a hloh a, che tha chhunzawmin Kuriz Player of the Match-a thlan a ni.

Karthik Madhu an chhawr zui theih loh avangin a thlak nan, Uttar Pradesh atangin feet 6 leh inchi 5-a sang, Kush an la lut a, Mizorama a inkhelh hmasak berah point 14 hmuin tum riat a tisual.

A hma chiahin Tuichangral hmaah vawi hnih set la hmasa zawk ni chungin Electric Veng team an tlawm a, mi malin Laldinsanga’n harsatna tawkin set hnihna atangin a vaw tla thei lo va. Sihphir lakah a theihna lantir thar lehin tum 12 a hlap tla a, point nga a hloh.

Net bula lehlam vuak dangtu, Zosangzuala (Mama) chuan point sarih hmuin tum thum a tisual ve thung a, Anastasia-in Indian blocker tha tia hriat hlawh, Kush an neih belh rualin vawi li Pro Volleyball Best Blocker ni zawn lai Mama nen an kawl kawp.

Vuak thlakah langsar thamin Anastasia chungnung bik lo mah se net bulah lehlam an veng tha a, mi mala innghat thuk tak, Sihphirin derthawng khawpin an nawr let zo lo tluan va. Tuichangral an hneh loh zawh chiah avangin tum dang angin Electric Veng club-in rin an hlawh lo na a, tlo tha takin an inlan a, league kal meka vawi li an khelh tawhah set hloh lova an chak hmasak ber a ni.

Nikum khan semifinal lut pha lo chiahin Sihphir an tla a, league-ah khelh hnih chakin set thum set khatin Anastasia an hneh a, Niyas-a’n khel tha ber lawman a dawng a. Pro Volleyball-a an intawn vawi hnihnaah Kerala atanga an lak luh bak mi mala point 10 hmu phak an awm lo va, set la ve thei tur khawpin Electric Veng team an khing hneh lo.

Sihphir hian set hmasa ber la chunga Hunthar an hneh loh hnuah set ruk an hloh zawn mek a, khelh thumah point hnih hmuin knockout round lut pha lo a hniam pathum zingah an tel a, hmahruaitu, Anastasia-in anni aiin vawi khatin an khel tam a, point 10 hmuin semifinal an hnaih tawh hle.

Sihphir tan Niyas-a’n point 19 hmuin 12 a hloh a, amah thlawp thei ber, Lalneihpuia Hrahsel chuan vawi sarih vaw tlain tum li a tisual a. Set hmasa berah 14-14 a nih laiin Niyas-a’n a service dik lo va, a hnuah hlap sual bawkin lehlamin point li an hmu zawn a. An kal fal hnuah Anastasia-in nghet takin hma lam an pan zel a, 24-19-a sang zawk an nih laiin Kush chuan hui tlain set an la.

Set hnihnaah Sihphirin hma an sawn hret a, chuti chungin Anastasia tan Zomuana a langsar a, a tir atangin an sang char char a. Niyas-a’n an inthlauhna tizimin 20-21-in an hnaih hman tihah Khawhai tlangval Zomuana’n a hnung atanga a vaw tla a, Kush chuan tha takin a service zui bawk nen point thumin Anastasia-in an kalsan tluan a ni.

Sihphirin setter F Lalhmingmawia thlakin captain Mesak Malsawmkima an luhtir a, kir leh tumin thapui thawhin an bei let a. Neihpuia’n Kush-a vuak dansakin 11-8-in an sang a, beiseina nei hman mah se, Anastasia-in point nga hmu zawnin an lehpel zui leh nghal a. An innghahna ber, Niyas-a’n ball a hmu tam a, a zuan hnem avangin a chau tih a chet danah a hriat a. A tihsual thin bakah lehlamin a vuak an dang fo va, team pum hnungtawlhin a hma aia awlsam zawkin Electric Veng club-in set thumna an la a ni.

Anastasia-in ball vaw tlatu tur aiin lehlam hlap dang thei tur Kush la lutin an chakpui nghal a, an khelh leh hmasak berah Chhinga Veng Spikers nen Thawhtanniah an inhmachhawn ang a. Sihphirin rin hlawh leh table-a sang pahnih, Electric Veng club leh Hunthar hneh lo zawn mah se beisei an la nei a, Thawhlehniah a mawnga a awm, Thutak Nunpuitu Team nen an inkhel dawn a ni.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT (Round 4) - May 21, 2026 (Ningani)

Anastasia Electric Veng def Sihphir (mipa)

25-19, 25-22, 25-21 (3-0)

Kuriz Player of the Match - Zomuansanga (Anastasia Electric Veng)

Cheetak Fan of the Night - Pazawna (Sihphir)

MVA Lucky Fan - Lalhmangaihzuali (Sihphir) & VL Malsawmhlui (Anastasia)

STATS :

ANASTASIA ELECTRIC VENG

Zomuansanga: Point Hmuh - 18, Point Hloh - 7

Kush Singh: Point Hmuh - 14, Point Hloh - 8

Laldinsanga: Point Hmuh - 12, Point Hloh - 5

Zosangzuala: Point Hmuh - 7, Point Hloh - 3

Ramdintluanga (setter): Point Hmuh - 0, Point Hloh - 1

SIHPHIR

Niyas Abdul Salam: Point Hmuh - 19, Point Hloh - 12

Lalneihpuia Hrahsel: Point Hmuh - 7, Point Hloh - 4

Albert Zothankhuma: Point Hmuh - 4, Point Hloh - 3

Lalramhluna: Point Hmuh - 2, Point Hloh - 3

Vanlalawmpuia: Point Hmuh - 2, Point Hloh - 1

F Lalhmingmawia (setter): Point Hmuh - 1, Point Hloh - 0

POINT TABLE

ANASTASIA: Play 4, Won 3, Loss 1 (set lak 11, set hloh 5) : Point 10

HUNTHAR: Play 2, Won 2, Loss 0 (set lak 6, set hloh 1) : Point 6

TUICHANGRAL: Play 3, Won 2, Loss 1 (set lak 8, set hloh 5) : Point 6

CHHINGA VENG: Play 2, Won 1, Loss 1 (set lak 5, set hloh 4) : Point 4

SIHPHIR: Play 3, Won 1, Loss 2 (set lak 4, set hloh 8) : Point 2

KHAWBEL: Play 3, Won 1, Loss 2 (set lak 4, set hloh 8) : Point 2

TNT: Play 3, Won 0, Loss 3 (set lak 2, set hloh 9) : Point 0

FIXTURE (Mipa) - Round 4

May 22, 2026 (Zirtawpni)

8:00 PM : Khawbel v Chhinga Veng Spikers

May 23, 2026 (Inrinni)

8:00 PM : Hunthar v Thutak Nunpuitu Team