ZALEN, May 19, 2026: Huntharin team tha leh khawng an nihzia chiang leh zualin an lantir a, Khawbel lakah chungnung taka set thum an lak zawn rualin Mizoram Rural Bank Pro Volleyball League kal mekah hma an hruai zui nghal.

An khelh hmasak berah vawi thum champion tawh, Huntharin Sihphir an hmachhawn a, set hmasa ber an hloh hnuah insiam remin hneh takin inkhel an thunun tluan a. Khawbel hmaah a tir atangin engkim ta neih chungin lehlam an nawr tawm a, inkhairual leh inpumkhat tha takin tlak hniam nei lovin hriam takin an inlan a, lehlamin an khing pha lo.

Hunthar champion hnuhnun ber, kum 2024-a Mizo Best Player Fabian Lallunghnema’n fel fai takin a khel a, vawi 15 vaw tlain point thum chiah a hloh va, Kuriz Player of the Match-a thlan a ni.

Uttar Pradesh atanga an lak luh, Suryansh Tomar chuan Sihphir hmaa a khelh dan tluk lo hretin point 16 a hmu a, vawi kua a tisual ve thung a. An pahnih bakah Lalbiakmuana’n point khat paihin tum sarih a hlap tla a, lehlam vuak dansaktu, Wilson Lalremruata leh Lalbiakmawia Khiangte chuan Khawbel tan harsatna an siam hle a, setter Remsangzuala’n a lailum luah lehin Hunthar chakna thahrui pawimawh tak a ni tel.

Tuichangral an hneh nghal avangin fak hlawh takin Khawbelin league bul an tan a, Anastasia Electric Veng lakah set la hmasa zawk ni chungin an tlawm zui a. Pro Volleyball League chanchina mipa team hlawhtling ber, Hunthar hmaah an player tam zawkin tawn hriat an tlachham tih a lang a, a tir atangin zam takin an khel a, boruak an ngam lo va. An khelh hnuhnun apiangah an hnungtawlh zel a, set tinah point 20 hmu phak lo vekin Hunthar lakah an tlawm.

Ball vuak thlakah Hunthar an tluk lo va, an inthlauhna langsar tak zawk chu net chunga lehlam vuak dangtu an inneih that hleih bawk a. Huntharin hmun hrang hrang atanga an vuak tlak theih laiin Khawbel innghahna pahnih, Johan Vanneihsanga leh Anurag Rawat chuan hlap tlak an harsat a, Johan-a’n point 11 a hmuh laiin point ruk a hloh a, a club hlui hmaah Anurag talbuaiin tum 13 a vuak tlak zat deuhthaw tisualin point 12 a paih a ni.

Set hmasa pahnihah Khawbelin derthawng tur khawpin Hunthar an chhaih buai phak lo va, set thumnaah infuih phurin theihtawpin an bei let a. Johan-a’n tha taka a service hmanga point a hmuh rualin 8-6-in an sang a, point hniha hma an hruai hmasak ber niin phur viau mah se Anurag chuan a vaw sual zui a, an che fuh rei lo.

Set thumnaah hian 17-17 thlengin intluk chho mah se boruak sangah Hunthar an hriam a, Fabian-a’n a hlap tlak hnuah Anurag chuan point a hloh zawn a. Wilson-a’n service hmanga point hnih a hmuh zawn ve leh hnuah 22-17-in Hunthar an sang a, Khawbelin set lak ve ngei an tumna kawng a ping.

Season liam ta khan kai thar ni chungin Khawbelin set thum faiin an lo hneh tawh a, Pro Volleyball League-a an intawn lehna hmasa berah chiang takin Huntharin an chhang let.

Khelh hnih an chak zawn rualin Huntharin set khat chiah an hloh a, Anastasia lehpelin point inangah an sang zawk a, table chung berah an insawn chho va. Khawbel erawh vawi hnih an tlawm zawn rualin panganaah an tla hniam a, Zirtawpni zanah chak mamawhna sang tak nen Chhinga Veng Spikers an khel dawn a, Inrinni zanah Huntharin a mawng bera awm, Thutak Nunpuitu Team an hmachhawn ve thung ang.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

Round 3 : May 18, 2026 (Thawhtanni)

Hunthar def Khawbel (mipa)

25-15, 25-19, 25-19 (3-0)

Kuriz Player of the Match - Fabian Lallunghnema (Hunthar)

Cheetak Fan of the Night - Lalchhandami (Hunthar)

Lucky Fan of the Night - Lalsiamthara (Khawbel) & Paul Rampanmawia (Khawbel)

STATS :

HUNTHAR

Suryansh Tomar: Point Hmuh - 16, Point Hloh - 9

Fabian Lallunghnema: Point Hmuh - 15, Point Hloh - 3

Lalbiakmuana: Point Hmuh - 7, Point Hloh - 1

Wilson Lalremruata: Point Hmuh - 6, Point Hloh - 2

Lalbiakmawia Khiangte: Point Hmuh - 4, Point Hloh - 4

Remsangzuala (setter): Point Hmuh - 5, Point Hloh - 1

KHAWBEL

Anurag Rawat: Point Hmuh - 13, Point Hloh - 12

Johan Vanneihsanga: Point Hmuh - 11, Point Hloh - 6

Lalhunthara: Point Hmuh - 5, Point Hloh - 2

Lalremfela: Point Hmuh - 2, Point Hloh - 3

Joseph Zoramhmangaiha: Point Hmuh - 3, Point Hloh - 3

POINT TABLE

HUNTHAR: Play 2, Won 2, Loss 0 (set lak 6, set hloh 1) : Point 6

ANASTASIA: Play 2, Won 2, Loss 0 (set lak 6, set hloh 2) : Point 6

TUICHANGRAL: Play 2, Won 1, Loss 1 (set lak 5, set hloh 3) : Point 4

SIHPHIR: Play 2, Won 1, Loss 1 (set lak 4, set hloh 5) : Point 2

KHAWBEL: Play 3, Won 1, Loss 2 (set lak 4, set hloh 8) : Point 2

CHHINGA VENG: Play 1, Won 0, Loss 1 (set lak 2, set hloh 3) : Point 1

TNT: Play 2, Won 0, Loss 2 (set lak 1, set hloh 6) : Point 0

FIXTURE (Mipa) - Round 3

May 19, 2026 (Thawhlehni)

8:00 PM : Anastasia Electric Veng v Tuichangral

May 20, 2026 (Nilaini)

8:00 PM : Chhinga Veng Spikers v Thutak Nunpuitu Team