ZALEN, May 13, 2026: Mizoram Rural Bank Pro Volleyball League-a an inlan vawi khatnaah Khawbelin nomawi chuh phak an tum tih a takin an lantir a, set hmasa pahnih an lak hnuah tla hniam mah se set hnuhnung berah kir lehin fiahna tling inkhelah Tuichangral chu 3-2-in an hneh.

A vawi khat nan season liam ta khan Mizoram volleyball inelna sang berah Khawbel an tel a, semifinal an tlain league-ah set thum faiin Tuichangralin an hneh bawk a, Pro Volleyball League-a an intawn lehna hmasa berah he an tlawmna hi an chhang let nghal.

Mizoram pawn player zinga Pro Volleyball League-a tawn hriat ngah leh nei tha ber, Anurag Rawat chuan set nga an inkhelh chhungin point 35 a thawk chhuak a. Johan Vanneihsanga nen inthlawpin an pahniha point hmuh belh khawmin 56 a tling a, team pum pui point hmuh chanve aia tam hlawh chhuakin point 34 an paih bawk.

Pro Volleyball League-a vawi hnih an telnaah Khawbelin an khaw player deuh vek an hmang a, squad member zingah Delhi tlangval leh setter David Lalramhmachhuana chiah an khaw mi ni lo an awm a. Feet 6 leh inchi 4-a sang, Anurag-a hi Tuipuiral leh Huntharah khel tawhin Pro Volleyball League-ah season li a telna a ni a, kum 2024 khan Hunthar a champion-pui nghe nghe.  

Vawi hnih final-a tlawm tawh, Tuichangralin a tum khat nan champion an tumna kawngah harsatna an tawk nghal a. Sri Lanka atanga an lak luh, Mahela Indeewar chuan Mizorama a khelh hmasak berah beisei angin hnuhma a nei tawk lo va, set hnihna thlengin team pum pui an insiam rem hman lo bawk. 

Sri Lankan Mahela hian point 29 hmuin 13 a hloh a, Saidingpuia Sailo leh Lalrinpuia’n point 18 ve ve hmu bawkin inhnehtawk tak chungin a bet zawkah an tang a, set hnih an lak avangin point khat sual chhuak mah se a chak zawk, Khawbelin point hnih an hmu ve thung.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT

Round 1 : May 12, 2026 (Thawhlehni)

Khawbel def Tuichangral (Mipa)

= 25-21, 25-22, 11-25, 22-25, 15-13 (3-2)

Kuriz Player of the Match - Anurag Rawat (Khawbel)

Cheetak Fan of the Night - Diki (Khawbel)

STATS :

KHAWBEL

Anurag Rawat: Point Hmuh - 35, Point Hloh - 18

Johan Vanneihsanga: Point Hmuh - 21, Point Hloh - 16

Lalremfela: Point Hmuh - 8, Point Hloh - 5

Lalhunthara: Point Hmuh - 5, Point Hloh - 3

Innocent Malsawmzuala: Point Hmuh - 2, Point Hloh - 2

TUICHANGRAL

Mahela Indeewar: Point Hmuh - 29, Point Hloh - 18

Lalrinpuia: Point Hmuh - 17, Point Hloh - 3

Saidingpuia Sailo: Point Hmuh - 17, Point Hloh - 9

Zonunsanga: Point Hmuh - 4, Point Hloh - 1

Lalropeka: Point Hmuh - 4, Point Hloh - 2

Lalfakzuala Fanai: Point Hmuh - 4, Point Hloh - 2

FIXTURE (Mipa) - ROUND 1

May 13, 2026 (Nilaini)

8:00 PM : Sihphir v Chhinga Veng Spikers

ROUND 2 

May 14, 2026 (Ningani)

8:00 PM : Khawbel v Anastasia Electric Veng

May 15, 2026 (Zirtawpni)

8:00 PM : Hunthar v Sihphir 

May 16, (Inrinni)

8:00 PM : Thutak Nunpuitu Team v Tuichangral