ZALEN, July 12, 2026: A vawi khat nan Mamit team, 08 Spikers-in Pro Volleyball League an khel thei dawn a, Pro Division-a awm zui zel turin Thutak Nunpuitu Team (TNT) an tling bawk.

Mizoram Volleyball inelna sang bera season hmang thei turin Ningani khan 08 Spikers an tling a, an elpui, LC Club leh Doris Memorial an hneh ve ve.

Zirtawpni khan season liam ta Pro Division mipa team pasarih zinga a hniam ber, TNT-in tla hniam thei dinhmun derthawng atangin Doris Memorial an hneh a, Pro Volleyball khel chhunzawm thei turin an tling bawk.

District hrang hrang atangin Mamit team pahnih district champion LC Club leh pahnihna, 08 Spikers bakah Aizawl district champion, Doris Memorial-in playoff khelh an inhuam a, an pathum hian Luangmual YMA Hall, Aizawlah an inel.

08 Spikers-in set hmasa pahnih an hloh hnuah ITI Veng club, Dorris Memorial an hneh a, 26-28, 23-25, 25-17, 25-16, 15-10-in an chak a. A hnuah Mamit district team pahnih inkhelin set nganaah vawi ruk an deuce hnuah 08 Spikers an tlang a, 25-23, 23-25, 25-23, 27-29, 21-19-in LC Club an hneh a ni.

Harsa taka an elpui team pahnih an hneh zawn rualin 08 Spikers an tling a. Doris Memorial-in set li an inkhelh hnuah 25-20, 25-21, 22-25, 25-19-in LC Club an hneh ve leh a, tlang nghal zo lo mah se hun tha an la nei zui thei.

Playoff ni hnihnaah Doris Memorial-in TNT hmachhawnin set hmasa pahnih an lak hnuah harsatna an tawk a, inelna sanga tawn hriat an neih chhawrin Muanna Veng team-in an bei let a, set thum la zawnin 20-25, 17-25, 25-21, 25-12, 15-9-in an chak a ni.

Kum 2016-a Pro Division kalpui a nih atangin a vawi khat nan division hniamah TNT an tla teuh hle a, hmun ruak hnuhnung ber luah hramin 2026-27 season-ah team pariat - Hunthar, Khawbel, Anastasia Electric Veng, Chhinga Veng Spikers, Sihphir, Tuichangral, 08 Spikers leh TNT an inel dawn a ni.