ZALEN, May 24, 2026: Rin hlawh lo, Thutak Nunpuitu Team-in anmahni au phurtute beiseina an tihlawhtling a, Inrinni zan khan Hunthar nen set nga an inkhelh hnuah Mizoram Rural Bank Pro Volleyball League kal meka inlehthalna ang hiala ngaih theih hnehna an sual chhuak.

An player thaten an chhuahsan hnuah TNT-in team thar dinin league bul an tan atanga an khelh hmasak vawi thumah point khat mah hmu lovin a mawngah an awm a. Season liam ta khan vawi thum champion tawh, Huntharin tawn hriat chhe tak neiin a hniam ber ni chungin an tla a, champion team-a tel tawh an player hlui hming langsar ko kirin Uttar Pradesh atangin Suryansh Tomar an la lut bawk a, an khelh hmasak vawi hnihah chiang takin an chak zawn a, a vawi li nan champion thei turin rin an hlawh.

Team hlun pahnih boruak tawn mek a insan hleih a; mahse, an hniam vanglai takin TNT-in an zahawmna an humhim thar leh thei a. Chak duhna nasa tak nei chungin khelmualah an lut a, coach Lalhmangaihsanga Sailo chuan a tha thei ang bera a player-te theihna hman chhuah tumin ruahmanna a siam fuh a. Inthununna tha tak nen na taka vaw kher lova point hmuh dan an zawng a, ho taka point hloh pumpelh turin an insawrbing bawk.

Team leh player khaikhina hniam zawka a ngaih, TNT-in Hunthar lakah mar leh tlo takin an khel reng thei bik lo va; mahse, tum dang aiin khelmual kotlangah anmahni tantu kawr pawl ha an pung khawm hnem a, beidawng lovin eng lai pawhin khuang vaw chungin hun dang aia uarin an au a, tawn hriat nei tha leh a boruaka chiai lo ber tura ngaih Huntharin an khelh tawh dan an pha lo va, talbuai zawkah tangin point hloh, service dik loh leh lak sual an ngah.

Inpumkhat leh rintawkna nasa zawk nen TNT player-ten an khel a, C Lalhriatpuia’n vawi 21 vaw tlain tum li chiah a tisual a, a vawi khat nan Kuriz Player of the Match lawmman a dawng a. Captain Vanlalchhantluanga Sailo chuan tha takin ball a sem a, Rohluzuala’n point 20 hmu phakin point sarih a paih a, Lalsaitluanga leh Laldinchhunga ten point 10 chuang ve ve thawk chhuak bawkin lang thamin hma an sawn a, hnehna satliah lo tak, hriat reng tlak an hlawh chhuak.

Suryansh chuan point 36 hmuin 16 a hloh a, mi mala hnuhma nei lian ber ni mah se team a chakpui zo lo va, Fabian Lallunghnema’n tum 18 hlap tlain vawi sarih a tisual a. Lalbiakmuana’n point li a hmuh let aia tam paihin harsatna a tawk a, rilru lama fiahna tling inkhel hautak an hmachhawn hmasak berah Hunthar an paukhauh zo lo va, league kal mekah a vawi khat nan an tlawm.

Set hmasa berah Muanna Veng team-in vuak vak aiin a awla dah tumin point an zawng nasa a, lehlam vuak dan tumin an zuang taima bawk a. Hunthar tan hlap tlak a awlsam bik lo a, lehlam khelh dan zuiin net chung atangin an hui hnem a, 19-19 a nih laiin TNT hmahruai nan Hriatpuia’n a vaw tla a, lawm avanga mipui au thawm a ring hle.

Chawl mai lovin Muanna Veng club tantuten thawm an nei zui zel a, Fabian-a’n hui tlak ve nghal a tum laiin point a hloh va. Hun pawimawhah TNT an hriam a, Saitluangaa leh Hriatpuia ten hlap tla zawnin 23-20-in an sang a, Huntharin dang thei lovin Suryansh chuan a vaw sual zawn a ni.

Inkhel boruak a nung zui a, set an hloh hnuah Hunthar insang mar leh zualin 16-16 a nih hnuah TNT-in point thum an hloh zawn a. Rohlua leh Fakzuala ten point an hmuh zawn hnuah 22-23-in Muanna Veng team-in hnaih leh hman mah se Fabian-a’n hlap tlain Suryansh-a’n net chung atangin Saia ball hui a dan tlaksak bawk a, set hmasa ber hloh chunga Sihphir hneh tawh, Huntharin set an la.

Anmahni tantute au thawm avangin player pasariha khel ang maiin TNT-in hnual lovin an nawr let leh a, rin tlakin Hriatpuia leh Rohlua an inlan bakah Dinchhunga’n tawn hriat a neih a chhawr bawk a. Set thumna tawp lamah Huntharin Hriatpuiaa service an lak theih loh hnuah Biakmuana’n a vaw sual a, TNT tan kawng hawnsakin 24-20-a sang zawk an nih laiin Biakmuana’n Fakzuala service a la sual leh a, vawi thum an khelhnaah a tum khat nan Huntharin team pakhat lakah set hnih an hloh.

Inchet that chhawkin Huntharin ho taka point an hloh thin hliah khuhin ball vaw tla thei nei tha zawk an nihna an lartir ve leh a; set lina tawp lamah Remsangzuala, Wilson Lalremruata, Suryansh leh Biakmuana ten a zawnin service kai lo vek mah se, TNT hlap an dan theih bakah an ball hmuh an vaw tla zel a, harsa lovin an tlang.

Set nganaah mipui au thawm puihna hmangin TNT-in tan hmun an siam tha a, Hriatpuia’n a hnung atanga a hlap tlak hnuah Suryansh-a’n a vaw kai lo zui a. Huntharin point li an hloh zawn rualin TNT-in 7-3-in hma an hruai a, hawi kir tawh lovin 14-11 a nih laiin Dinchhunga’n chakna point a thawk chhuak.

League kal meka vawi li an khelh tawhah a tum khat nan an chak a, team satliah lo Hunthar an hneh rualin LPS Arena chhungah hliam au thawm a khat hneh hle.

TNT-in mualphona boruak rit tak an vai kiang a, a hniam ber la ni zui tho mah se khelh hnih an la neih avangin an la tlai chhe lo va. Hmel thar pu chungin inrintawkna sang zawk nen an khel zui thei dawn a, Thawhlehniah Sihphir nen an inkhel ang a. Huntharin an beisei loh thil tawngin zir belh tur nei chungin khelmual an chhuahsan a, Nilainiah tun hnaia khel tha, Tuichangral an hmachhawn a ngai dawn a ni.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT

Round 4 : May 23, 2026 (Inrinni)

Thutak Nunpuitu Team def Hunthar (Mipa)

25-20, 22-25, 25-20, 19-25, 15-11 (3-2)

Kuriz Player of the Match - C Lalhriatpuia (TNT)

Cheetak Fan of the Night - Malsawmsangi (TNT)

MVA Lucky Fan - Malsawmdawngliani (Aizawl Venglai), Laldintluangi (Hunthar)

THUTAK NUNPUITU TEAM

C Lalhriatpuia: Point Hmuh - 21, Point Hloh - 4

Rohluzuala: Point Hmuh - 20, Point Hloh - 7

Laldinchhunga: Point Hmuh - 10, Point Hloh - 4

Lalsaitluanga: Point Hmuh - 12, Point Hloh - 2

Lalfakzuala Fanai: Point Hmuh - 9, Point Hloh - 3

Vanlalchhantluanga Sailo (setter): Point Hmuh - 1, Point Hloh - 3

HUNTHAR

Suryansh Tomar: Point Hmuh - 36, Point Hloh - 16

Fabian Lallunghnema: Point Hmuh - 18, Point Hloh - 7

Wilson Lalremruata: Point Hmuh - 8, Point Hloh - 3

Lalbiakmawia Khiangte: Point Hmuh - 7, Point Hloh - 3

Lalbiakmuana: Point Hmuh - 4, Point Hloh - 11

Remsangzuala (setter): Point Hmuh - 6, Point Hloh - 2

POINT TABLE

ANASTASIA: Play 4, Won 3, Loss 1 (set lak 11, set hloh 5) : Point 10

HUNTHAR: Play 3, Won 2, Loss 1 (set lak 8, set hloh 4) : Point 7

TUICHANGRAL: Play 3, Won 2, Loss 1 (set lak 8, set hloh 5) : Point 6

KHAWBEL: Play 4, Won 2, Loss 2 (set lak 7, set hloh 9) : Point 5

CHHINGA VENG: Play 3, Won 1, Loss 2 (set lak 6, set hloh 7) : Point 4

SIHPHIR: Play 3, Won 1, Loss 2 (set lak 4, set hloh 8) : Point 2

TNT: Play 4, Won 1, Loss 3 (set lak 5, set hloh 10) : Point 2

FIXTURE (Mipa) - Round 5

May 25, 2026 (Thawhtanni)

8:00 PM : Anastasia Electric Veng v Chhinga Veng Spikers

May 26, (Thawhlehni)

8:00 PM : Thutak Nunpuitu Team v Sihphir

May 27, 2026 (Nilaini)

8:00 PM : Tuichangral v Hunthar