ZALEN, May 26, 2026: Anastasia Electric Veng nen set nga an inkhelh hnuah Chhinga Veng Spikers-in hnehna pawimawh tak an chang a, Thawhtanni zanah Mizoram Rural Bank Pro Volleyball League semifinal lut thei turin an tho chhuak thar leh.

Kum khat an awl hnuah Pro Volleyball League khel theiin Chhinga Veng an kir leh a, an khelh hmasak berah vawi hnih set la hmasa zawk ni chungin Sihphir lakah an tlawm a. Champion lai leh table-a sang ber, Anastasia nen an intawn hmaa an khelh hnuhnun berah set hmasa ber la chungin Khawbel lakah an zuih tluan bawk a, an hnual hman.

Electric Veng club hmaah vawi hnih set la hmasa zawk ni lehin an chak tlang thei mai lo va; mahse, khawmualpui hran atanga an lak luh, Cuban spiker Morales Ponce De Leon chuan Chhinga Veng tan a khelh tawh china a chet that ber hun a hmang a, point 32 hmuin 13 hloh tel mah se hnehna kawngah team a hruai a, league kal meka vawi li an khelh tawhah point ruk hmuin a sang pali zingah an inhlangkai.

Rin hlawh, Anastasia an hneh avangin Spikers-in khelh hnih an la neihah inrintawkna leh phurna an neih phah leh zual dawn a, tum dang aiin player-ten inpumkhatna leh thawh hona an nei tha a. Chak ngei duhna lantir telin an tlak fual hnuah bei letin an kir leh thei zel a, Electric Veng club erawh an paukhauh zo lo nawn leh a, a hmain Tuichangral nen set nga an inkhelh hnuah a chak lo zawk an ni tawh a ni.

R Vanlalmawia’n Khawbel hmaah a ke a tihnat avangin set khatna a khel zo thei lo va, Anastasia lakah harsatna nei lovin tha takin a khel tluan a, vawi khat chiah tisualin point kua a hmu a. An khelh tawh vawi thuma hmun chang mumal lo, Lalnunzira’n tum 10 vaw tlain Chhinga Veng tan rin tlakin a inlan bawk a, set thumna atangin setter C Zonunmawia’n hmun chang nghetin mi malin H Malsawmsanga leh Vanlaltanpuia ten hnuhma an nei lian tawk lo mah se set nganaah intel ruhin tha takin hmawr an bawk.

Anastasia an nghing thar leh a, a vawi hnih nan Kuriz Player of the Match ni theiin a lai atanga lehlam vuak dangtu leh rang taka hlap tla thin, Zosangzuala (Mama) che tha mah se set nga khel turin an hriam tawk lo va. Mama’n point 23 hmuin vawi thum a tisual a, Zomuansanga’n point 14, Laldinsanga’n 13 leh Kush Singh-a’n 12 hlawh chhuakin point sarih an hloh theuh a, thatpui tham khawpin Uttar Pradesh atanga an lak luhin hnuhma a nei lo.

A hmain a mawnga awm chungin Thutak Nunpuitu Team-in an khelh hmasak vawi hniha chak ve ve, Hunthar an hneh a, Chhinga Vengin dinhmun hniam atangin a chung bera awm, Anastasia an hneh ve leh rualin eng team pawh inhneh thei vek an nih tih a lang.

Chhinga Vengin nung takin inkhel bul an tan a, Morales chuan vawi hnih vaw tla zawnin Tpa’n Kush-a hlap a dansak zui bawk a, 5-0-in an sang a. Anastasia-in an um tluan a, 23-21 a nih hnuah Morales chuan a tir ang bawkin set an lak nan point a hmu zawn leh a ni.

Set hnihna tirah pawh 5-2-in Spikers an sang leh a, Anastasia-in setter Ramdintluanga thlakin Lalthlamuana a luhtir hnuah an insiam rem a, Mama’n hlap tlain Morales-a vuak an dang zui a, Sawmsanga vuak dang lehin 19-14-in Electric Veng club-in hma an hruai a, lehlamin point thum chiah hmuh belhin chiang takin set hnihna an la.

Set thumnaah pawh a tirah Chhinga Veng an sang leh nghal a. Tla fual zui tawh lovin Cuban spiker leh Zira’n an vuak tlak zawn hnuah inkhel thununin Mawitea’n Ngursangzuala vuak a dansak a, 23-17-in an kal fal a. Anastasia-in point khat an hmuh belh hnuah setter C-Tea’n nalh taka ball a siamsak atangin Mawite’n set hnih an lakna point a hlap tla a ni.

Set la zawn tur khawpin Spikers-in theihna an nei zui chuang lo va, thapui thawhin Anastasia-in an nawr let a, 10-10 a nih hnuah point riat hmu zawnin Mama’n Morales-a vuak a dansak a, point 10-a sang zawk ni chungin set lina an la.

Chhinga Vengin an hma lam hun atan chak a tulzia an hre chiang a, set hnuhnung berah an ze tha tak lantir lehin bul an tan tha a. Morales-a’n a vuak tlak hnuah Anastasia-in point hloh zawnin 4-1-in Spikers an sang a, ngampa takin Zira’n tum hnih a hlap tla a, 10-5-a hma an hruai hnuah a tawp thlengin point ngaa sang zawk ni chungin an tlang.

Beiseina thar nen Zirtawpni zanah Chhinga Veng an inlan leh dawn a, Tuichangral nen an inkhel ang a. Anastasia-in vawi nga an khelh atangin point 11 an hmu a, a chung berah awm zui zelin team dang aiin league an zo hmasa dawn a, Inrinni zanah a hmawrbawk nan Hunthar an hmachhawn ang.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT - Round 5 : May 25, 2026 (Thawhtanni)

Chhinga Veng Spikers def Anastasia Electric Veng (Mipa)

25-21, 17-25, 25-18, 15-25, 15-10 (3-2)

Kuriz Player of the Match - Zosangzuala (Anastasia)

Cheetak Fan of the Night - Lalruatmawia (Chhinga Veng)

MVA Lucky Fan - Lalruatpuii (Anastasia), Lalrinkimi (Anastasia)

CHHINGA VENG SPIKERS

Morales Ponce De Leon: Point Hmuh - 32, Point Hloh - 13

H Malsawmsanga: Point Hmuh - 13, Point Hloh - 12

Lalnunzira: Point Hmuh - 10, Point Hloh - 5

R Vanlalmawia: Point Hmuh - 9, Point Hloh - 1

Vanlaltanpuia: Point Hmuh - 7, Point Hloh - 5

C Zonunmawia (setter): Point Hmuh - 0, Point Hloh - 3

ANASTASIA ELECTRIC VENG

Zosangzuala: Point Hmuh - 23, Point Hloh - 3

Zomuansanga: Point Hmuh - 14, Point Hloh - 7

Laldinsanga: Point Hmuh - 13, Point Hloh - 7

Kush Singh: Point Hmuh - 11, Point Hloh - 7

Lalruatsanga: Point Hmuh - 3, Point Hloh - 2

Ngursangzuala: Point Hmuh - 4, Point Hloh - 5

Ramdintluanga (setter): Point Hmuh - 1, Point Hloh - 0

POINT TABLE

ANASTASIA: Play 5, Won 3, Loss 2 (set lak 13, set hloh 8) : Point 11

HUNTHAR: Play 3, Won 2, Loss 1 (set lak 8, set hloh 4) : Point 7

TUICHANGRAL: Play 3, Won 2, Loss 1 (set lak 8, set hloh 5) : Point 6

CHHINGA VENG: Play 4, Won 2, Loss 2 (set lak 9, set hloh 9) : Point 6

KHAWBEL: Play 4, Won 2, Loss 2 (set lak 7, set hloh 9) : Point 5

SIHPHIR: Play 3, Won 1, Loss 2 (set lak 4, set hloh 8) : Point 2

TNT: Play 4, Won 1, Loss 3 (set lak 5, set hloh 10) : Point 2

FIXTURE (Mipa) - Round 5

May 26, (Thawhlehni)

8:00 PM : Thutak Nunpuitu Team v Sihphir

May 27, 2026 (Nilaini)

8:00 PM : Tuichangral v Hunthar