ZALEN, May 23, 2026: Set an hloh hnuah tha takin Khawbelin an bei let a, Zirtawpni zanah set thum set khata Chhinga Veng Spikers an hneh rualin Mizoram Rural Bank Pro Volleyball League semifinal beiseina thar an insiam.

LPS Arena, Falkland-ah boruak tawn inang lo takin team pahnih an intawng a, set thum set khata Thutak Nunpuitu Team hneh zo hlim, Chhinga Vengin chak zawn tumin set hmasa ber an thunun a. An khelh hnuhnun vawi hnihah chiang takin Khawbel an tlawm zawn ve thung a, set thum set khata Anastasia Electric Veng an hneh loh hnuah set thum faiin Huntharin an hneh.

Mahse, set hnihna an tan rualin Khawbelin inkhel boruak an tidanglam a, Anurag Rawat chuan hnehna kawngah team hruai kirin point 44 a hlawh chhuak a, league kal mekah inkhel vawi khata mi malin an hmuh tam ber niin 21 hloh tel mah se Kuriz Player of the Match-a thlan a ni.

Chakpui thamin Delhi spiker a che tha a, set thumna atangin amah thlawptu, Johan Vanneihsanga’n awmze neiin hnuhma a nei ve thung a, tum 16 vaw tlain point kua a hloh a, an pahnih bak Khawbel player dangin mi malin tih tham point an thawk chhuak lo.

Set khatna tawp lamah Chhinga Vengin 21-15-a hma an hruai laiin R Vanlalmawia’n Anurag-a vuak dan tuma a zuannaah a ke a tina a, a nat deuh avangin Thangminlal Guite chuan a thlak a. Harsa lovin set hmasa ber la tho mah se set hnihna atangin Spikers-in Anurag an dang hneh lo hle a, an insawrbing tawk loh avangin hun pawimawhah anmahni tihsual an tuar tel.

Chhinga Veng tan Morales Ponce De Leon chuan point 19 hmuin 13 a hloh a, inkhel tidanglam thei tur khawpin hnuhma a nei lian lo va. H Malsawmsanga’n tum 16 hlap tlain vawi li chiah a tisual a, set lina bikah a vuak tlak zel avangin ball a hmu hnem a, chuti chungin team beiseina a tinung zo bik lo.

TNT an hneh tuma che tha, Vanlaltanpuia’n point 10 a hmu tling lo va, captain Lalchungnunga a tla hniam hle bawk a, boruak sang leh inelna tak takah Spikers an nghet lo va, an khelh hmasak berah vawi hnih set la hmasa zawk ni chungin Sihphir lakah an tlawm tawh a ni.

Khawbel an chak rualin vawi li an khelh tawhah point nga hmuin palinaah an insawn chho a, an hmabakah a mawng lama awm, Sihphir leh TNT an hmachhawn dawn avangin semifinal beiseina an nei sang a. Chhinga Veng erawh vawi thum an khelh tawhah point li hmuin panganaah an chhuk a, an khelh hmabakah table-a sang pathum - Anastasia, Hunthar leh Tuichangral an awm.

Chak tlang nghal thei mai tur khawpin set hmasa berah Chhinga Vengin chet an awlsam a, Cuban player Morales chuan a hma leh hnung atangin nuam ti takin a khel a. Khawbel innghahnaten chet an harsat ve thung a, Johan-a vuak dang tla zelin Anurag pawhin a hlap tlak rualin point a hloh zui ve zel.

Chhinga Vengin hliam vanga lehlam vuak dangtu pawimawh zinga mi, Mawitea an thlak hnuah an intel ruh tawk lo va, set hnihna an tan rualin 6-1-in Khawbel an sang a, heng zinga point nga hi Anurag-a hmuh a ni.

Chhinga Vengin nawr letin an inhnehtawk zui hle a, 24-22-in Khawbel an sang tawh tihin Morales chuan a vaw tla a, point hmuh zawn an mamawh lai takin a service sual zui a, set an hloh hnuah Spikers an buai.

Phurna leh inrintawkna nen Khawbelin set thumna an awpbet a, Anurag-a bakah set hmasa pahniha langsar lo tak, Johan-a’n rin ngamin a khel thar leh a, Chhinga Vengin player thlak kual mah se an insiam rem thei lo.

Set linaah pawh thil awm dan a danglam mai lo va, Morales chuan vawi hnih vaw kai lo zawnin 5-1-in Khawbel an sang a, Spikers-in rei lo te chhung Cuban player la chhuakin an hahchawlhtir a ni.

An inthlauhna tam lo mah se Chhinga Vengin an um a, vaw tla thei an mamawh lai takin Sawmsanga’n a ball hmuh point-ah a chantir thei zel a; mahse, Anurag-a leh Johan-a an dan hneh loh avangin an um tluan zak a, Johan-a’n a vuak tlak hnuah 24-22-in Khawbel an sang a, chak turin point khat neih belh an la mamawh a. Sawmsanga’n vawi khat dang thei mah se Khawbel captain Johan-a’n dan theih lovin set thum an lak zawn nan a hlap tla.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT (Round 4) - May 22, 2026 (Zirtawpni)

Khawbel v Chhinga Veng Spikers (mipa)

18-25, 25-23, 25-15, 25-23 (3-1)

Kuriz Player of the Match - Anurag Rawat (Khawbel)

Cheetak Fan of the Night - H Lalramthari (Khawbel)

MVA Lucky Fan - Nunsangi (Chhinga Veng), Vanlaltluangi (Chhinga Veng)

STATS :

KHAWBEL

Anurag Rawat: Point Hmuh - 44, Point Hloh - 21

Johan Vanneihsanga: Point Hmuh - 16, Point Hloh - 9

Lalhunthara: Point Hmuh - 3, Point Hloh - 1

Lalremfela: Point Hmuh - 2, Point Hloh - 1

David Lalramhmachhuana (setter): Point Hmuh - 2, Point Hloh - 2

CHHINGA VENG SPIKERS

Morales Ponce De Leon: Point Hmuh - 19, Point Hloh - 13

H Malsawmsanga: Point Hmuh - 16, Point Hloh - 4

Vanlaltanpuia: Point Hmuh - 9, Point Hloh - 4

Thangminlal Guite: Point Hmuh - 3, Point Hloh - 3

Lalchungnunga: Point Hmuh - 2, Point Hloh - 3

H Lalruatsanga (setter): Point Hmuh - 4, Point Hloh - 2

POINT TABLE

ANASTASIA: Play 4, Won 3, Loss 1 (set lak 11, set hloh 5) : Point 10

HUNTHAR: Play 2, Won 2, Loss 0 (set lak 6, set hloh 1) : Point 6

TUICHANGRAL: Play 3, Won 2, Loss 1 (set lak 8, set hloh 5) : Point 6

KHAWBEL: Play 4, Won 2, Loss 2 (set lak 7, set hloh 9) : Point 5

CHHINGA VENG: Play 3, Won 1, Loss 2 (set lak 6, set hloh 7) : Point 4

SIHPHIR: Play 3, Won 1, Loss 2 (set lak 4, set hloh 8) : Point 2

TNT: Play 3, Won 0, Loss 3 (set lak 2, set hloh 9) : Point 0

FIXTURE (Mipa) - Round 4

May 23, 2026 (Inrinni)

8:00 PM : Hunthar v Thutak Nunpuitu Team

Round 5

May 25, 2026 (Thawhtanni)

8:00 PM : Anastasia Electric Veng v Chhinga Veng Spikers

May 26, (Thawhlehni)

8:00 PM : Thutak Nunpuitu Team v Sihphir

May 27, 2026 (Nilaini)

8:00 PM : Tuichangral v Hunthar