ZALEN, May 21, 2026: Set an hloh hmasak hnuah Chhinga Veng Spikers-in an mamawh set thum la zawnin a mawngah nghet leh zualin Thutak Nunpuitu Team (TNT) an beng bet a, Mizoram Rural Bank Pro Volleyball League kal mekah Nilaini zan khan a vawi khat nan an chak.

Kum khat an awl hnuah kum 2019 champion Chhinga Veng kir lehin an khelh hmasak berah chak theihna hun tha an bawhpelh nasa a. Sihphir lakah set la hmasa zawk ni chungin vawi hnih hma an hruai a, set nganaah 10-7-a sang zawk an nih leh hnuah an inpawhtlaktir a. Boruak chhiain um zuiin TNT hmaah thatho lo leh inman lo takin set khatna an hmang tluan a, setter C Zonunmawia thlakin H Lalruatsanga’n a tawp thleng a khel.

Set hnihna atangin an inchawk phur a, inring tawn chungin inkhairual zawkin an khel zui thei a, a tawp thlengin TNT an dang hneh a. An khelh hmasak aiin mi malin Chhinga Veng player-ten hma an sawn a, team pum pui chawi kangin league kal meka vawi hnih an khelh tawhah point li an hmu a, semi-final lut thei palinaah an insawn chho.

Spikers tan lehlam vuak dangtu leh rang taka ball vaw tla thin, Vanlaltanpuia’n point 15 hmuin point hnih chiah a paih a, Kuriz Player of the Match-a thlan a ni a. Cuban player Morales Ponce De Leon chuan tum 22 vaw tlain point 13 a hloh a, Sihphir nen an inkhelh tuma a point hmuh zat chiah ni mah se TNT hmaah a tisual tlem zawk a. Captain Lalchungnunga’n point 14 a hmuh chanve a hloh tel a, H Malsawmsanga leh R Vanlalmawia ten point 10 chuang ve ve an hlawh chhuak bawk.

TNT player tam zawkin inelna sangah tawn hriat an tla chham a, set hmasa berah nung takin khel mah se set hnihna atangin ball vuak tlak an harsat a, an theihna a san tawk loh avangin bei ngial mah se tawp chin an nei.

An khel rei tial tial a, hniam lam panin an inthlau telh telh a, set hnih an hloh zawn hnuah awmze neiin an bei let thei tawh lo va, set linaah point 10 chiah an hmu ve hman a ni.

League kal meka vawi thum an khelh tawhah Mizo hlang awm chhun, TNT tlawm vekin point la hmu ve lo awm chhun an ni a, khelh thum an la nei a. Chhinga Veng hmaah a laia zuang taima leh lehlam vuak dangtu ber, Lalsaitluanga’n point thum hlohin 12 a hmu a, ball an pek tam ber, C Lalhriatpuia’n vawi 14 hlap tla mah se point kua a hloh.

An player-te an intluk tlang viau na a, an elpui team dang player nen khaikhinin hnuhma lian hnutchhiah thei an kawl lo va, an inlan tawhah khelh khata point 15 hmu tling an awm rih lo.

Khelmual kotlang atanga thlawptu leh au phurtu nei tha ber, TNT-in khelmual chhungah kum dang angin innghah ngamna tur leh hun harsaa danglamna siam thei an nei lo va, team dang tibuai khawpin eng emaw chhung chet that lai nei mah se an tlo zo lo va, nawr let an dawl lo.

Kum 2023 champion team zinga tel captain Vanlalchhantluanga leh Laldinchhunga ten player naupang zawk ho khawmin Mizorama inelna sang berah an ruh a la no deuh tih an khelh tawh atangin a lang chiang zel.

Chhinga Vengin an khelh tawhah a hniam lama awm team pahnih an hmachhawn ve thung a, Zirtawpni zanah inlan lehin Khawbel nen an intawng dawn a, a tu ve ve tan pawh an hma lam hril zui tur inkhel pawimawh tak a ni dawn.

TNT-in Inrinni zanah Hunthar an su dawn a, an zahawmna humhim turin hmabak an la neihah an beih zui hle a ngai dawn a ni.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT (Round 3) - May 20, 2026 (Nilaini)

Chhinga Veng Spikers def Thutak Nunpuitu Team (Mipa)

19-25, 25-21, 25-20, 25-10 (3-1)

Kuriz Player of the Match - Vanlaltanpuia (Chhinga Veng Spikers)

Cheetak Fan of the Night - Saithangpuia (TNT)

MVA Lucky Fan - Vanlalhruaii (TNT) & Linda Lalnunthangi (TNT)

STATS:

CHHINGA VENG SPIKERS

Vanlaltanpuia: Point Hmuh - 15, Point Hloh - 2

Morales Ponce De Leon: Point Hmuh - 22, Point Hloh - 13

Lalchungnunga: Point Hmuh - 14, Point Hloh - 7

H Malsawmsanga: Point Hmuh - 13, Point Hloh - 5

R Vanlalmawia: Point Hmuh - 11, Point Hloh - 3

THUTAK NUNPUITU TEAM

C Lalhriatpuia: Point Hmuh - 14, Point Hloh - 9

Lalsaitluanga: Point Hmuh - 12, Point Hloh - 3

Laldinchhunga: Point Hmuh - 12, Point Hloh - 5

Rohluzuala: Point Hmuh - 8, Point Hloh - 6

Lalfakzuala Fanai: Point Hmuh - 7, Point Hloh - 4

Vanlalchhantluanga Sailo (setter): Point Hmuh - 1, Point Hloh - 1

POINT TABLE

ANASTASIA: Play 3, Won 2, Loss 1 (set lak 8, set hloh 5) : Point 7

HUNTHAR: Play 2, Won 2, Loss 0 (set lak 6, set hloh 1) : Point 6

TUICHANGRAL: Play 3, Won 2, Loss 1 (set lak 8, set hloh 5) : Point 6

CHHINGA VENG: Play 2, Won 1, Loss 1 (set lak 5, set hloh 4) : Point 4

SIHPHIR: Play 2, Won 1, Loss 1 (set lak 4, set hloh 5) : Point 2

KHAWBEL: Play 3, Won 1, Loss 2 (set lak 4, set hloh 8) : Point 2

TNT: Play 3, Won 0, Loss 3 (set lak 2, set hloh 9) : Point 0

FIXTURE (mipa) - Round 4

May 21, 2026 (Ningani)

8:00 PM : Sihphir v Anastasia Electric Veng

May 22, 2026 (Zirtawpni)

8:00 PM : Khawbel v Chhinga Veng Spikers

May 23, 2026 (Inrinni)

8:00 PM : Hunthar v Thutak Nunpuitu Team