ZALEN, May 14, 2026: Vawi hnih set hloh hmasa zawk an nih hnuah Sihphir an chak a, Mizoram Rural Bank Pro Volleyball League round hmasa ber khar nan Chhinga Veng Spikers nen inhnehtawk takin set nga an inkhel a, an inchet that chhawk hnu set hnuhnung pahnihah an tlo zawk. 

Nikumah Niyas Abdul Salam-a’n Sihphir tan khel tawhin mikhual takin bul a tan a, season hnih a hmannaah erawh tlangnel takin a inlan ta thung a. A ball vuak a nat tel bawk avangin a thawm a nat phah a, point 36 hmuin 20 hloh tel mah se Kuriz Player of the Match-a thlan a ni.

Pro Volleyball League-a season hnih an telnaah Sihphir an danglam a, nikumah kai thar ni chungin uiawm takin semi-final an lut pha lo chiah a. Tun tumah erawh an khelh hmasak ber atangin el tham an ni tih an lantir a, a chhe berah knockout round luh ngei an tumna tihlawhtling thei turin an chak nghal a, coach Lalhmingliani Sailo chuan rahbi thar tuk telin hmeichhe zinga Pro Volleyball Leage mipa team enkawl hmasa ber leh chakpui hmasa ber a ni kawp.

A umtu zawk ni thin mah se Sihphirin paukhauh leh hnual lovin an bei let thei zel a, set hmasa ber an hloh hnuah set thumna an hloh leh a. Set hnih ve ve an lak hnua chak tur chin felna set hnuhnungah 10-7-in an hniam zui bawk a, kir leh turin an hmabak hautak mah se Kerala atanga an lak luh Niyas-a'n team fuih phurin 13-11-in an lehpel a, Spikers-in a tawp lam hun pawimawhah anmahni tihsual an tuar tel.

Sihphir tan Niyas-a bakah Lalneihpuia Hrahsel, Albert Zothankhuma, Lalramhluna leh Vanlalawmpuia ten rin ngamin an khel a, setter F Lalhmingmawia’n a elpui leh ani aia tawn hriat nei, Chhinga Veng setter C Zonunmawia aiin tihsual a nei tlem zawk bawk. 

Kum khat an awl hnuah Pro Volleyball-a tel theiin 2019 champion Chhinga Veng an kir leh a, khawmualpui hran atangin Cuban player Morales Ponce De Leon an lak luh avangin boruak an neih phah hle a; mahse, Mizoram volleyball inelna sang bera a inkhelh vawi khatnaah a nghet lo va, a ball vuak an dansak fo bakah team tiphur turin a che vel hrim hrim a ngampa tawk lo.

Spikers tan H Malsawmsanga'n vawi 14 vaw tla mah se player-te hnuhma neih dan atangin Sihphir an inkhairual zawk.

Pro Volleyball League-ah Chhinga Veng nen an intawn hmasak berah Sihphir an chak a, set hnih an hloh avangin point thum hlawh phak lovin point hnih an hmu a, a chak lo zawk ni chungin Spikers-in point khat an hlawh chhuak thung.

Round hnihnaah Sihphirin Hunthar hmachhawnin Zirtawpni zanah an inkhel dawn a, Chhinga Veng erawh round hnihnaah awlin insiam rem turin hun thawl an nei dawn a, Nilainiah Thutak Nunpuitu Team nen an inhmachhawn ang.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT

Round 1 : May 13, 2026 - Nilaini Zan

Sihphir def Chhinga Veng Spikers (Mipa)

= 24-26, 25-17, 22-25, 25-21, 15-12 (3-2)

Kuriz Player of the Match - Niyas Abdul Salam (Sihphir)

Cheetak Fan of the Night - Zosangliani (Sihphir)

STATS:

SIHPHIR

Niyas Abdul Salam: Point Hmuh - 36, Point Hloh - 20

Lalneihpuia Hrahsel: Point Hmuh - 11, Point Hloh - 6

Albert Zothankhuma: Point Hmuh - 10, Point Hloh - 2

Lalramhluna: Point Hmuh - 8, Point Hloh - 3

Vanlalawmpuia: Point Hmuh - 9, Point Hloh - 6

F Lalhmingmawia (setter): Point Hmuh - 3, Point Hloh - 3

CHHINGA VENG SPIKERS

Morales Ponce De Leon: Point Hmuh - 22, Point Hloh - 15

H Malsawmsanga: Point Hmuh - 14, Point Hloh - 7

Thangminlal Guite: Point Hmuh - 8, Point Hloh - 2

Vanlaltanpuia: Point Hmuh - 5, Point Hloh - 4

Lalchungnunga: Point Hmuh - 4, Point Hloh - 2

C Zonunmawia (setter): Point Hmuh - 2, Point Hloh - 5

FIXTURE (Mipa) - ROUND 2

May 14, 2026 (Ningani)

8:00 PM : Khawbel v Anastasia Electric Veng

May 15, 2026 (Zirtawpni)

8:00 PM : Hunthar v Sihphir 

May 16, (Inrinni)

8:00 PM : Thutak Nunpuitu Team v Tuichangral