ZALEN, May 17, 2026: Tuichangralin set thum la tlang nghalin Thutak Nunpuitu Team an hneh a, Inrinni zan khan Mizoram Rural Bank Pro Volleyball League kal mekah set hloh lova chak hmasa ber an ni.

An khelh hmasak berah set thum set hnihin Khawbel lakah Tuichangral an tlawm a, TNT hmaah team pumin hma an sawn a. Set hmasa ber atangin inkhel an thunun tluan a, Sri Lanka atanga an lak, Mahela Indeeewar chuan lehlam ban pharna chung atangin a vaw tla fo a, point 28 hmuin vawi nga chiah a tisual.

Khawbel hmaah a vawi khat nan Mizo leilungah Mahela a inkhel a, a ngampa tawk lo a, vuak sual a ngah avangin team a fuih phur zo lo. TNT lakah erawh a danglam a, coach David Aizampuia Fanai chuan a awmna hmun thlakin a khelh thiamna ding lam sir atangin ball a vua a, a zuan sanna chhawr telin lehlamin an dang hneh lo hle a, team pahnih inkara danglamna siamtu lian ber niin Kuriz Player of the Match-a thlan a ni.

Tuichangral hmasawnna langsar chu player-ten point an hloh tlem a, Mahela thlawptu ber, Saidingpuia Sailo chuan a khelh hmasak aiin tihsual a nei tlem hle a, tum 17 vaw tlain point hnih chiah a paih a, lehlam hlap dangtu pawimawh, Amos Vanlalpeka’n hloh nei lovin point riat a hmu bawk a. Chiai tur khawpa TNT-in an nawr let zawh loh avangin nuam ti takin an khel tluan a, inrintawkna sang zawk nei chunga khel zui thei turin an insiam thar tha hle.

Set thum set khata Anastasia Electric Veng laka tlawm tawh, Mizo hlanga khel, TNT-in an elpui team dang khing thei tur player hriam leh rin ngam an tlachham tih a lang chiang zual a. Inchawk phurin nung takin inkhel bul tan mah se a daih rei lo va, set khatna tirah 7-4-in an sang a, an inkhelh chhunga an tawn san lai ber a ni.

Ball an pek hnem ber, C Lalhriatpuia’n vawi 13 vaw tlain point riat a hloh a, Rohluzuala’n tum 10 hlap tlain mi malin hmasawn mah se an elpui team dang player rinrawlte nena khaikhinin an hnuhma a inlen hleih.

An inkhel rei tial tial a, an inkar a zau hret hret a, inelna sanga rin ngam ball vaw tlatu leh lehlam hlap dang thei tur an tlachham.

Kum 2023 champion Muanna Veng team hi season liam taa an player langsarten an chhuahsan deuh vek a, an hmun ruak luah zo an kawl rih loh avangin harsatna an tawk a. Khelh hnih an tlawm zawn rualin an hmabak a hautak hle dawn a, Nilaini zanah semifinal an beiseina tinung turin Chhinga Veng Spikers an hneh ngei ngei a ngai dawn a. Thawhlehni zanah Tuichangralin hmasawnna nghet leh rin tlak an nei em tih fiah nan league kal meka khelh hnih chak zawn lai, Anastasia an hmachhawn ve thung ang.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT

Round 2 : May 16, 2026 (Inrinni zan)

Tuichangral def Thutak Nunpuitu Team (Mipa)

25-21, 25-19, 25-18 (3-0)

Kuriz Player of the Match - Mahela Indeewar (Tuichangral)

Cheetak Fan of the Night - Angelina Lalrinsangi (TNT)

STATS:

TUICHANGRAL

Mahela Indeewar: Point Hmuh - 28, Point Hloh - 5

Saidingpuia Sailo: Point Hmuh - 17, Point Hloh - 2

Amos Vanlalpeka: Point Hmuh - 8, Point Hloh - 0 

Lalrinpuia: Point Hmuh - 5, Point Hloh - 3

Zonunsanga: Point Hmuh - 2, Point Hloh - 3

H Lalramdinmawia (setter): Point Hmuh - 2, Point Hloh - 3

THUTAK NUNPUITU TEAM

C Lalhriatpuia: Point Hmuh - 13, Point Hloh - 8

Rohluzuala: Point Hmuh - 10, Point Hloh - 4

Laldinchhunga: Point Hmuh - 7, Point Hloh - 5

Lalsaitluanga: Point Hmuh - 6, Point Hloh - 1

R Lalhruaitluanga: Point Hmuh - 3, Point Hloh - 1

Vanlalchhantluanga Sailo (setter): Point Hmuh - 2, Point Hloh - 0

POINT TABLE

ANASTASIA : Play 2, Won 1, Loss 0 (set lak 6, set hloh 2) : Point 6

TUICHANGRAL : Play 2, Won 1, Loss 1 (set lak 5, set hloh 3) : Point 4

HUNTHAR : Play 1, Won 1, Loss 0 (set lak 3, set hloh 1) : Point 3

KHAWBEL : Play 2, Won 1, Loss 1 (set lak 4, set hloh 5) : Point 2

SIHPHIR : Play 2, Won 1, Loss 1 (set lak 4, set hloh 5) : Point 2

CHHINGA VENG : Play 1, Won 0, Loss 1 (set lak 2, set hloh 3) : Point 1

TNT : Play 2, Won 0, Loss 2 (set lak 1, set hloh 6) : Point 0

FIXTURE (mipa) - Round 3

May 18, 2026 (Thawhtanni)

8:00 PM : Khawbel v Hunthar

May 19, 2026 (Thawhlehni)

8:00 PM : Anastasia Electric Veng v Tuichangral

May 20, 2026 (Nilaini)

8:00 PM : Chhinga Veng Spikers v Thutak Nunpuitu Team