ZALEN, May 27, 2026: Set hloh lova an chak rualin Sihphirin Mizoram Rural Bank Pro Volleyball League knockout round lut thei turin hma lam an pan a, Thutak Nunpui Team (TNT) erawh khelh khat la nei mah se an tlang zo dawn lo tih a chiang ve thung.

Thawhlehni zanah LPS Arena, Falkland-a a mawnga awm team hnih inkhelten beiseina tinung turin chak an mamawh ve ve a, hun pawimawhah Niyas Abdul Salam inlarin tlak fual nei lovin Sihphirin inkhel an thunun a, 25-22, 25-20, 25-21-in TNT an hneh.

A chung lama awm, Hunthar leh Anastasia Electric Veng laka an tlawm zawn hnuah Sihphirin an mamawh point thum an hmu a, tum li an khelh tawhah point nga hmuin panganaah an insawn chho va. Khelh inzatah semifinal lut thei palinaa awm mek, Chhinga Veng Spikers aiin point khatin an hniam a, parukna, Khawbel nen an point inang leh set lak inangah mah se set an hloh tlem zawk avangin an sang zawk.

Mizo hlanga khel, TNT-in Sihphir innghahna lian ber an dan hneh loh avangin team pahnih inkar a zau phah a, Kerala atanga an lak luh, Niyas-a chuan point 26 hmuin 11 a hloh a, league kal mekah a vawi hnih nan Kuriz Player of the Match lawmman a dawng. Nikumah kai thar Sihphirin set thum fai thovin TNT an hneh tawh a, Niyas-a’n point 40 chuang hmuin khel tha bera thlan a ni a, an intawn vawi hnihnaah danglamna siamtu a ni leh.

Sihphir Mizo player-ten an khelh hnuhnun aiin hnuhma an neih len bakah tihsual an nei tlem a, Lalneihpuia Hrahsel chuan vawi 10 vaw tlain Albert Zothankhuma’n tum riat a hlap tla a, vawi hnih ve ve chiah point an paih a. Lalramhluna leh Vanlalawmpuia ten awmze neiin an khel bawk a, mi mal langsar awm mah se a hma aia inkhairual leh tlo zawkin an inlan.

Inrinni khan Hunthar nen set nga an inkhelh hnuah rin hlawh lo TNT-in hnehna hlu tak sual chhuakin harh tharna chang mah se, tinung zui turin an theihna a sang tawk lo va, an nghet tawk lo va. Player an inchet that chhawk avangin insiam rem chawp zel a ngai a, chu chuan team a pawt hniam.

Vawi nga an khelh tawhah point hnih chiah an hmu a, khelmual kotlanga thlawptu nei tha leh mipui ko khawm hnem thei berin league khelh khat la nei mah se kum 2019 hnua a vawi khat nan semifinal lut pha lovin an tla dawn a ni.

Hunthar hmaa che tha, C Lalhriatpuia leh Rohluzuala ten Sihphir lakah vuak tlak an harsat avangin setter Vanlalchhantluanga Sailo tan duhthlan tur dang zawn a ngai a, Hriatpuia’n point 10 hmuin tum ruk a tisual a, Rohlua’n point ruk a hmuh zat a hloh va. Lehlam vuak dangtu ber, Lalsaitluanga’n point 12 hmuin tawn hriat nei, Laldinchhunga’n tum 11 a hlap a tla a, vawi hnih ve ve chiah tisual mah se team an chawi kang zo lo.

Sihphirin hriam takin inkhel bul an tan nghal a, Niyas-a’n ball a hmuh hmasak vawi li hlap tla vekin team a fuih phur a. Ramhluna’n tihsual nei lovin a vuak hmasak tum liah point a hlawh chhuak vek bawk a, TNT-in chhang let hneh lovin 20-11-in Sihphir an sang a. Muanna Veng team-in bei letin 20-23-in an hnaih leh hman mah se Niyas-a’n an mamawh point hnih vaw chhuakin derthawng lovin set an la.

Set hmasa ber la chungin Hunthar hmaah Sihphir an zuih ral tawh a, set hnihnaah TNT an kalsan mai thei lo va. Inum chhovin 16-16 a nih laiin Hriatpuia’n kawng hawnsakin a vaw sual a, Dinchhunga’n a hlap tlak hnuah 19-20-in lehlam hmahruaina tizim mah se Albert-a’n Hriatpuia vuak a dansak hnuah Sihphirin point thum an hmu zawn a, point ngaa inthlau chungin set an la zawn.

A kawtawpah TNT tlu lutin set lak tumin bei zui ngial mah se inthlahdah lovin Sihphir an khawng tlat a. Niyas-a chauh ni lovin Mizo player-ten inringtawk takin an hmabak an hlen a, ball vuak leh lehlam hlap dang kawngah Muanna Veng team-in an khing hneh lo.

Ramhluna’n a hlap tlak hnuah Hriatpuia’n chhang let thei lovin a vaw sual a, 12-7-in Sihphir an sang a, an inthlauhna humhimin Niyas-a’n Sihphir point hnuhnung pali a hlawh chhuak a, 25-21-in an tlang.

Hmeichhe zinga Pro Volleyball League mipa team enkawl hmasa ber, Lalhmingliani Sailo hnuaia Siihphir khelh that ber leh vawi hnih an chakna a ni a, Ningani zanah a hma lam hun tifiah leh zual turin tun dinhmuna an elpui mek, Khawbel nen an intawng dawn a ni.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT 

Round 5 : May 26, 2026 (Thawhlehni)

Sihphir def Thutak Nunpuitu Team (mipa)

25-22, 25-20, 25-21 (3-0)

Kuriz Player of the Match - Niyas Abdul Salam (Sihphir)

Cheetak Fan of the Night - Monica Lalnunkimi (TNT)

MVA Lucky Fan - PC Vanlalvenpuii (TNT), Kusumi (TNT)

STATS :

SIHPHIR

Niyas Abdul Salam: Point Hmuh - 26, Point Hloh - 11

Lalneihpuia Hrahsel: Point Hmuh - 10, Point Hloh - 2

Albert Zothankhuma: Point Hmuh - 8, Point Hloh - 2

Lalramhluna: Point Hmuh - 8, Point Hloh - 4

Vanlalawmpuia: Point Hmuh - 7, Point Hloh - 3

F Lalhmingmawia (setter): Point Hmuh - 3, Point Hloh - 3

THUTAK NUNPUITU TEAM

Lalsaitluanga: Point Hmuh - 12, Point Hloh - 2

Laldinchhunga: Point Hmuh - 11, Point Hloh - 2

C Lalhriatpuia: Point Hmuh - 10, Point Hloh - 6

Rohluzuala: Point Hmuh - 6, Point Hloh - 6

Lalfakzuala Fanai: Point Hmuh - 3, Point Hloh - 0

Vanlalchhantluanga Sailo (setter): Point Hmuh - 3, Point Hloh - 2

POINT TABLE

ANASTASIA: Play 5, Won 3, Loss 2 (set lak 13, set hloh 8) : Point 11

HUNTHAR: Play 3, Won 2, Loss 1 (set lak 8, set hloh 4) : Point 7

TUICHANGRAL: Play 3, Won 2, Loss 1 (set lak 8, set hloh 5) : Point 6

CHHINGA VENG: Play 4, Won 2, Loss 2 (set lak 9, set hloh 9) : Point 6

SIHPHIR: Play 4, Won 2, Loss 2 (set lak 7, set hloh 8) : Point 5

KHAWBEL: Play 4, Won 2, Loss 2 (set lak 7, set hloh 9) : Point 5

TNT: Play 5, Won 1, Loss 4 (set lak 5, set hloh 13) : Point 2

FIXTURE (Mipa) - Round 5

May 27, 2026 (Nilaini)

8:00 PM : Tuichangral v Hunthar

Round 6

May 28, 2026 (Ningani)

8:00 PM : Sihphir v Khawbel

May 29, 2026 (Zirtawpni)

8:00 PM : Chhinga Veng Spikers v Tuichangral 

May 30, 2026 (Inrinni)

8:00 PM : Hunthar v Anastasia Electric Veng