ZALEN, May 12, 2026: Pro Volleyball League vawi kuana hawn zanah Anastasia Electric Veng chuan an nomawi humhim thei tura tha taka bul tanin nikum final-a an hneh tawh, TNT lakah hnehna an chang leh a. Champion lai tan Muanna Veng team player rinrawl ni thin, Zosangzuala (Mama) thawh hlawkin Kuriz Player of the Match atan thlan a ni.

May 24, 2025-a final-ah khan Electric Veng, Aizawl team hian 26-24, 25-10, 21-25, 25-21 (3-1)-a TNT hnehin a vawi hnih nan an champion a, Pro Volleyball-a an intawn lehna hmasa berah set thum set khat tho ni mah se an intawn hnuhnun ber aiin an chak awlsam zawk.

Nikum final-ah khan a chak lo team tan Mama hian khel a, TNT chhuahsana club dang tan Pro Volleyball-a a inlan hmasak berah a team hlui hmachhawn nghalin point 17 a hmu a, hloh a nei lo va. Pro Volleyball a khelh tawha mi mala a chet that ber pawl a ni.

Nikuma champion team player pawimawh - Karthik Madhu, Laldinsanga, Lalruatsanga, setter Ramdintluanga ten Anastasia-ah hmun pawimawh luah zui zelin Mizo player langsar pahnih, Mama leh Zomuansanga an neih belh.

TNT-in nikum final-a an rinrawl player paruk zingah captain Vanlalchhantluanga Sailo chiah an kawl zui a, 2025 Mizo Best Player Vanlaltanchhana (Valbuanga) bakah Mama, Saidingpuia Sailo, Sadrak Fanai leh K Zodingliana ten an kalsan a, team thar dinin inelna sangah an player-te ruh a la no deuh a, an hriam zo lo.

Inkhel tan hmain season kal meka Anastasia player Lalnunfela (26) sunna hun hman a nih bakah Mizoram Volleyball Association (MVA) chuan thla liam ta Aizawl Municipal Corporation (AMC) inthlana tling, an President Dr Lalmalsawma Nghaka (Ward No. 19) leh Adviser VL Zamlova (Ward No. 15) hnenah lawmpuina thuziak an hlan.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

ROUND 1 : May 11, 2026 (Thawhtanni)

Anastasia Electric Veng def Thutak Nunpuitu Team (Mipa)

 25-21, 25-27, 25-7, 25-17 (3-1)

Kuriz Player of the Match - Zosangzuala (Anastasia)

Cheetak Fan of the Night - Vanlalhruaii (TNT)

STATS:

ANASTASIA ELECTRIC VENG:

Zosangzuala: Point Hmuh - 17, Point Hloh - 0

Karthik Madhu: Point Hmuh - 21, Point Hloh - 9

Laldinsanga: Point Hmuh - 16, Point Hloh - 10

Lalruatsanga: Point Hmuh - 7, Point Hloh - 5

Zomuansanga: Point Hmuh - 5, Point Hloh - 4

THUTAK NUNPUITU TEAM:

Lalsaitluanga: Point Hmuh - 12, Point Hloh - 1

C Lalhriatpuia: Point Hmuh - 12, Point Hloh - 8

Laldinchhunga: Point Hmuh - 7, Point Hloh - 3

Rohluzuala: Point Hmuh - 7, Point Hloh - 5

Vanlalchhantluanga Sailo: Point Hmuh - 5, Point Hloh - 3

Lalfakzuala Fanai: Point Hmuh - 4, Point Hloh - 2

FIXTURE:

May 12, 2026 (Thawhlehni)

8:00 PM: Tuichangral v Khawbel

May 13, 2026 (Nilaini)

8:00 PM : Sihphir v Chhinga Veng Spikers