Sawrkar laipui chuan India ram tawng atana a pawm bik (official language) eng emaw zat a nei a, heng tawng pawm bikte hi 8th schedule tiin an sawi mai thin. Tun dinhmunah 8th schedule-ah hian tawng chi hrang 22 a awm mek a, chungte chu Assamese, Bengali, Bodo, Dogri, Gujarati, Hindi, Kannada, Kashmiri, Konkani, Maithili, Malayalam, Manipuri, Marathi, Nepali, Odia, Punjabi, Sanskrit, Santali, Sindhi, Tamil, Telugu leh Urdu te an ni.   8th schedule a tel zingah hian hmarchhak state atangin tawng chi thum Assamese, Manipuri leh Bodo te an awm a. Tun dinhmunah 8th schedule a luh tum/dil tawng chi hrang hrang 42 an awm mek bawk. Hetih lai hian Mizo tawng kan tih mai, thenkhatin Lusei tawng tia an sawi leh mi thenkhatten Duhlian tawng tia an sawi chu 8th schedule a thunluh chungchangah inhnialna a awm mek a. 8th schedule-a Mizo tawng thun leh thun loh chungchanga a duhtu leh duh lo lamte hian tanfung tha tak an nei ve ve bawk.   8th schedule-a Mizo tawng thun/dah duh lo zinga langsar ber chu Mizo Zirlai Pawl (MZP) an ni a, an duh loh chhan chu Zo hnahthlak hnam hrang hrang inpumkhatna a tihchhiat an hlauh vang a ni. 8th schedule-a Mizo tawng dah an duh loh chhan Zalen zawhna chhangin MZP President L.Ramliana Renthlei chuan, “Mizo tawng kan tih tak tak hi a la piang loah kan ngai a, Zo hnahthlak hnam hrang hrangten kan pawm tlan theih (common language) kan la nei lo a. Mizo tawng kan tih mai hi 8th schedule-a telh a nih chuan Zo hnahthlak kan inunauna hi a tichhe thei ang tih kan hlau a, dan anga lo khung luh hi tul kan ti lo a ni,” a ti.   Mizo Academy of Letters (MAL) President Prof. Laltluangliana Khiangte chuan 8th schedule-a Mizo tawng dah chu an pawlin an duh tih sawiin hnam inpumkhatna siamtu tur zawk niin a sawi. Prof. Tluangtea chuan, “8th schedule-a Mizo tawng dah hi chhiatpuina tur a awm lo a, a thatna hi a tam lutuk a, MAL phei chuan dah hi kan lungkham ber a ni,” a ti. MAL President chuan hnam tam takin an nawr chunga luh a harsat laia Mizote kan tangrual tawk lo chu pawi a tih thu a sawi bawk.   8th schedule-a Mizo tawng sengluh chungchangah hian Mizorama tlawmngai pawl lian ber YMA chuan ‘Aw’ an la chhuah lo a, Central YMA President Vanlalruata chuan YMA inkhawmpuiah ngaihtuah a la nih loh avangin duh leh duh loh an la sawi thei lo niin Zalen a hrilh. &&&&&&&