Aizawl; Vawk natna chikhat Porcine Respiratory & Reproductive Syndrome (PRRS) vangin vawk note thi engemaw zat a awm a, vawk pui erawh thi an la awmlo thung. AH&Veterinery department-a Deputy Director, Dr. Chetri chuan Zalen palai zawhna chhangin, "PRRS hi mihring tan chuan a hlauhawm lova. Kan thenawm Myanmar ah he natna hi a leng reng a, an ram atanga vawk kan lakluh reng chuan he natna hi kan lalut reng tihna a ni dawn a, chuvangin kan himna atan Myanmar atanga vawk kan lakluh hrihloh hi a tha ber a. Sawrkar lam chuan theihtawp chhuah mah ila mipuiin min thlawp thatloh chuan awmzia a nei lo a,” a ti. PRRS natna hi Kolasib tihloh district dangah chuan hmuh vek a ni. AH & Vete-rinery department thawktu te chuan PRRS natna hi umbo tumin bei mahse a harsa hle tih an sawi a. Vawkpui thi te hi central in vawkpui pakhat zelah Rs. 1000 leh state in Rs.1000 bawk zangnadawmna (compensation) a pe thei a. Vawkpui pakhat hi Rs. 30,000/- atanga Rs. 40,000/- te anih avangin zangnadawmna an dawn tur zat hi a tlem lutuk a, thiltih a buaithlak thin niin an sawi a. A chanve tal compensate thei ila chuan he natna hi a ziaawm theih deuh kan beisei a ni, an ti bawk.