F. Vanlalpeka, IMCS Aizawl.

Mizoram Political Party boruak hian mihring nunah hmun a va luah hnem tak em!

Mizo Hnam rilru zau takah hian, Mizorama Pawl (NGO's) angah te leh Kohhran ang -ah te hi chuan kan inhmu nikhua viau mai. Nimahsela, kan Political Party thilah erawh, rawng var pawh hi "rawng dum tih tur" an tih chuan, (hmu ve reng mah ila) kan ti duh zel mai dawn a nih hmel hle mai !!

Mizoram MP Pu K. Vena hi Mizo pa zinga pa hrohrang na ve sa hrim hrim a ni a. India Parliament House Session chhunga aw rawl ring taka a han au vel, a han che vel kha chu fak lo an awm lo khan a hriat. A chhan chu Manipur Mizo hnahthlak te, Myanmar Mizo hnahthlak te leh Bangladesh Mizo hnahthlak te thlavang hauhna au aw a ni a. Political Party thil ni tawh mai lova, Mizo hnam tan a ni miau a. Han fak vak tur emaw, han sawichhiat ngawtna tur a awm lo. A tih tur a ti ngam a ni mai. Mizo te tana aw a chhuah ang khan midang au ve tur kan nei ve tho ang em? tih hi inzawt ila.

India ramah hian a bik takin, India hmarchhak mi te kalphung hi MP dang te anga gentleman taka MP nih hi a theih ve loh tih hria ila. Kan dinhmun a inang lo.

Parliament House chhunga sapa-tal a ngaih pawha tal ngam tur midang Mizo pa an awm ve ang em? tih hi ngaihtuah a tha khawp ang. Hindi tawng leh English tawng dangnal taka tawng thiam hi a tha. Hetih rual hian, chutiang mi te chuan Pu K. Vena khawsak ngam ang hian an tal duhin kan ring ve em? tih pawh hi ngun taka ngaihtuah hi a tha hle bawk.

Mizoramin MP kan mamawh chhan ber kawngkhatah chuan Pu K. Vena hi kan hre chiang hle tawh a. A kawnghnihna, hmasawnna tura ke a penna lam hi chu a ri ring lem lo. Mahse, Official-ho hmaihma-a a luhchilh zui ngam leh zel hi chu puanzar a hlawh lem lo. A Party awmna MNF lam hian an hrechiang hle thung.

MP te hian Development lam an luhchilhna thu hi chu thukthu lama lak a ni tawh thin a. Vantlang mipui hriat vek ngai lo chi pawh a awm thin a ni mahna.

Mizo mipui hip nana Central Sawrkar lama Project haichhuak teuh teuh tura kan sawi thin hi chu chhuan em em chi a ni lo. State Sawrkar Development Departments lam kut ke a ni a, an thawh hona that leh that lohvah a innghat zawk.

Certral Sawrkar atanga hmasawnna kan tih hian MP chauh ni lovin, state Sawrkar rorelna chelhtu Minister-te thleng hian, Ram hmasawnna Project kalphungah chuan kal dan bik te a awm a. Fatu lane an lal ber zawk zaw mah.

Central Sawrkar huangchhung khu sum hlawm lian tak awmna ni mah se, an Fatu te zawk khu State Sawrkar tan chuan a mawm lai tak a ni zawk. MP te kuta papek rikngawt chi a ni lo. Khutiang Official Fatu lane bel thiam thiam MP an hlu a ni mai.

Mizoram MP nih tum a, Mizoram chhunga "ri he hu" pawh hi India ram rorelna In sang ber chhunga "ri leh se" mai tur hi kan neih a hlauhawm hle. A tak ram dai lut ngam an ngai.

Mizorama Mizo hnam hian states dangte auchhuahpui thin ang let thum hi auchhuahpui tur kan nei bik a. Kristian kan nihna humhalh tura kan lak thutak rual rual hian, Hnam nun au chhuahpui tur kan nei tam bik a.

Ram leh hnam tana thil tha kan tih, kan rilruin a "Amen" hle pawh hi kan Political Party atang bawk hian kan ip leh fo thin. Mizoram MP atan hian eng mi pawh nei thin mah ila, an MP nih chhan taka che chhuak ngam tur tih chiang sa hi kan neih a tul hrim hrim a. Mizoram-in MP ni tura kan thlanchhuah dan hi ti danglam ngam ila. MP thlan dawn-a-ruaia dap chawp kual a, Political Party kut atang ringawta MP tur hnawh-sa-rum taka kan ruat kual hi tih danglam a hun tawh hle a ni. A chhan chu India ram Rorelna In sang bera Mizo hnam aiawh tak taktu tur an ni a.

Tuna Pu K. Vena Rajya Sabha MP kan neih mek, a mah bawk Lok Sabha MP tura ruat zui tak hi Mizo mipui chuan kan hre chiang tawh a. Mizo mipui hriat dan ber pawh, "Mi huaisen" kan ti a. Nimahsela, India rama Election Commission lam hian MP inthlan thar hun a puan Ni leh Darkar atang khan a HUAISEN LEH LO an rawn ti ta nge ni dawn le? He thu hi MP inthlan ni a ral veleh, a HUAISEN kan ti leh chauh dawn chu a ni e !!!

I mumal deuh teh ang u.