DOWNLOAD OUR APP

Read latest news on your phone
app-store

PU P.S.CHAWNGTHU (Pu Sena) TAK KHA AW! (Kum sul sawm a liam ta!)

Mar 02, 2015

PU P.S.CHAWNGTHU (Pu Sena) TAK KHA AW! (Kum sul sawm a liam ta!)

- Ramhluna Hnamte Kum 10 zet a lo vei ta reng mai!! Leitlangpuia ka awm lai,ni 3.3.05 (Ningani) zing khan Rimawi Khawvel Editor Pu P.C.Lalthakima’n Pu P.S.Chawngthu boral thu min rawn message a, a damlo tih pawh ka lo hre mang si lo kha a ni a, mi barakhaih ang reng khawp mai. Khami ni vek,chawhnu dar 1-ah ropui taka vui niin Mission Veng thlanmualah ui taka thlah liam a lo ni ta a nih kha. Khatih lai kha MZI Hqrs. Lungleia President ka nih lai a ni nghe nghe a, MZI Lunglei pawhin sunna hun hi kan lo hmang ve a nih kha. Mizote zinga professional musician hmasa ber Pu P.S.Chawngthu, a hming pum Pahlira Sena Chawngthu hi Pu Sena tia hriat lar a ni ber zawk a, Mizote leh Mizoram awm chhunga hla tha leh rotling tak tak phuahtu leh AIR Gauhati a nih thin lai, 1957 hun lai daih tawh atanga radio atanga mi tam berten a aw leh hming kan lo hriat lar em em thin, AIR Gauhati-Shillong a nih tak hnu thleng pawh a AIR Mizo programme ngaihthlak tinuam thintu Pu Sena hi mi mal tak pawh a ka nel em em, min duhsak ve thintu a ni a, ka ui tak zet a ni. Kan inkawm hnuhnun ber chu ni 13.9.2001 Lunglei Circuit House-a ka kawm tum kha a ni. A chanchin sawi ve chiam ka tum lo a, ka lo hmelhriat tan dan leh AIR Shillong-a kan zai ve thin lai a min phurpui thiamzia leh Mizo zaimite tan a tangkai thinzia tlem thailan ka tum ve mai a ni. Naupang te kan la nih laiin AIR Gauhati Mizo programme kan ngaithla peih hle a, chung hun laia announcer lar tak thinte chu Pu P.S. Chawngthu, Pu Renga Sailo leh Pu B.Thanmawia te kha an ni thin. Zai tur an puang a, chanchin thar an puang bawk a, anmahni hmu hauh si loin naupang pawhin an aw leh an hming kan hre lar a, kan ralkhat ngainat em em hlawm. 1972-ah Shillongah lehkha zir turin ka kal a, zai leh rimawi lo ngaina ve ta chu mi an la tlem bawk a, eng tin tin emaw radio lamah kan intat lut a, AIR artiste te kan han ni chho ve ta mai a. Chung hun lai chuan Pu Sena te, Pi V.L.Hrimi te leh Pu L.Ch. Sailo-te hi AIR Shillong Mizo Unit-ah chuan a thu ber te an ni a, min duhsak thei hle hlawm a ni. Khang hun lai kha chuan tuna Mizo Church bula a AIR Station building khu a la awm lo va, Meghalaya Assembly House thin bula building hlui tak, Ward Lake kama mi kha AIR Shillong Station chu a ni. Kha station kha Radio Station tur renga duan pawh a ni lo mai thei, a building awm dan kha a mak riau a. Zaina room (studio) kha a hran daih a ni a, tunlai angin a record-tu technician leh artist te darthlang kaltlangin a inhmuh ve theih loh. Studio chhunga signal light eng sen phut mai kha an rawn tieng a, chu chu warning a ni a, kan inring a, kan zai tan mai thin a ni. Studio chhung a kan awm khan control room-a mite kan hmu ve thei si lo a, kan uang a, kan awm ing euh vel thin a, eng eng emaw te kan sawi a, kan thawm leh thil sawi zawng zawng kha control room-a awm, min lo record-tute khan an lo hre thei vek a ni tih ngaihtuah lek loa thil eng eng emaw lo sawi chiam palh tum te kha a lo awm ta thin a, a zia lo thei hle thin. Vawi khat pawh Duhzuala & A thiante hming a hla kan record dawn tumin kan uang vel a, amah Pu Sena ngei khan min record dawn a, a phur khawp mai leh nghal a. Keini khan kan thu sawi zawng zawng control room atangin an hre thei tih ngaihtuah lek lo khan uang deuh deuh khan, amah Pu Sena tih dan zir khan, phuahchawp belhin ‘Hei hi All India Radio, Shillong a ni, chanchin thar a puangtu Pahlira Chawnga Senthu, oh khaih, Pachawnga Sena Hlirthu....’ te kan lo ti vel a, a lo hre vek chu niin, a rawn phei a, studio kawngka a rawn hawng, ‘In inpeih tawh em? In tawng kha ka hre thei vek a nia aw,’ a rawn ti mai chu kan zak kher e! Nuih a za bawk si, zai that pawh a har. A hnuah EC Reastaurant ah thingpui kan in a, Pu Sena a chu a hlim ber leh a phur berah a tang a, khatia kan fiamthua a hming kan lo lepse kual velte kha hre reng mah se a haw reng reng lo, mi puitling tak chu a va ni em! Vawi khat pawh Zir Sangzela Hnamte (Saji) kha hla kan record-pui a. Pu Sena hian mi tam berte koh danin ‘Sangzel’ a ti ve mai a. Sangzela hian radio-ah chuan a hming kha Zir Sangzela Hnamte ti khera puan a duh tih kha a hrilh mawlh mawlh a. A hla record chhuah hun chu a lo thleng ta a, amah Pu Sena ngei chuan a rawn puang ta ngei a. A hla hmasa berah chuan ‘Zir Sangzela Hnamte a lo zai ang’ a han ti ta ngei a. A zai zo, a vawi 2-na turah chuan, a lo theihnghilh leh hman tawh a, ‘Sangzela a lo zai leh ang a’ a han ti ta, a vawi 2-naah chuan a lo theihnghilh hman leh tawh ta thin a! Saji nen hian AIR Shillongah khan DUO-in contract kan hmu a, ‘Saji leh Rama’ kan in ti ve a, hla eng emaw zat kan record nghe nghe a. Vawi khat chu Pu Sena puan ni a lo thleng a, Saji leh Rama tih kha keimahni kan ni tih a hre lem lo a ni mai thei, ‘Tunah Saji leh Rama (vai pathian Rama tih lam ang thluk hian) an lo zai ang’ a han ti mai chu kan nui nasa ngei mai. Lo ngaithlatu tan chuan hnam dang an rawn zai dawn ta emaw tih mai tur khan a puang zia/lai a ni. Khang hunte tak kha aw. Pu Sena hi fiamthu duh leh thiam tak a ni. Thuziak a thiam hle bawk a, Cindy Pa tih hming hian a ziak thin a, a thuziak bengvarthlak leh min tihlim thei tak tak a tam mai. Thu a uar thiam hle bawk thin. Vawi khat chu radio-a kan record zo EC Restaurant-a kan chawlh tum bawkin (khang hun laia Shillong Restaurant lar leh ch angkang ber chu kha a ni miau a), kan ei tur order kha an rawn dah har riau mai a, kan phun deuh a. Pu Sena chuan ‘Rei ti ma ta che u, restaurant tha leh changkangah chuan kan ei tur order hi an rawn la vat ngai hlei nem, an siam chawp a, ngun takin an bawl phuan a, an rawn la chauh thin alawm. Calcutta-a restaurant changkang kan chawlhna thinah te chuan zing dar 9-ah ei tur kan order a, tlai dar 3 velah kan va kal a, an lo peih hman chiah vel thin a sin’ te hi a ti a, kan nui dar dar thin. Musical instrument chi hrang hrang a play thei a, violin, piano, guitar (Hawaiian guitar, Spanish guitar leh electric guitar) te phei chu a thiam nal hle. A naupan lai atangin sap Missionary te zarah staff notation chhiar dan a lo thiam nal hle tawh bawk. Khatia hla record tura radio station-a kan han kal chang te khan, khang hun lai chuan hollow guitar nen, dekchi chhin leh eng eng emaw te nen khan kan inak \up zel mai thin kha a ni a. Kan guitar ken kha Pu Sena chuan lo la vatin a lo tum ta zawt zawt thin a, classical guitar te kha a thiam riau a, ‘Iau, iau, a va tha ve’ tih pah khan a fret tawp thleng thleng hian a han hmet ri ta zawt zawt thin a, hmuhnawm ti takin kan en thap thin. Chutah, ‘In tingtang chu a that viau hi mawle’ tih pahin a han comment hlek a, min han pe let a, kan lawmin kan ngaisang em em thin. Pu Sena hian ‘sap lam’ kan tih mai pawh a thiam tam ngiang mai, ‘jive’ phei chu thiam tak a ni, dancing competition-ah te pawh a partner nen vawi tam lawmman an la a ni. Karachi-a an awm laiin Guitar solo competition-ah a chhuak ve a, Anglo-Pakistani Mel McMahoe chu pakhatna niin, Pu Sena hi pahnihna a ni. Amah chuan inngaitlawm takin “Lawmman 2-na chu ka ‘Ar ba chuk’ ve mial,” a ti. A Orchestra telna hi ‘Roman Francisco and His Hawaiian Serenaders’ tih a ni a, hnam chi hrang hrang awmna niin music chi hrang hrang Ballroom dancing atanga Classical music thleng an tum thin a ni. Pu Sena hian a music thiam vangin khawvel hmun hrang hrang a fang tawh a, Mizo zingah chuan rimawi lama thleng sang leh tawng sang ber a ni hial awm e. Pu Sena hi kum 2001 khan MAL Jt. Hqrs Lungleiin Mizo Hlaphuahthiamte kawmna hun an siamah a lo kal a. Chumi tum chuan Circuit House ah ka han kawm ve a, nunhlui kan sawi a, kum 80 a lo nih ve tawh reng thute leh a hriselna a la that viau thute a sawi a, thlate kan la dun a, dah that atan a signature te ka la a, kan hlim hle.Kha kha he khawvela Pu Sena ka hmuh tawp chu a lo ni ta reng mai. Khatia a thih thu ka han hriat khan ka theih ang angin amah ui vetu awm nia ka rinte chu ka message kual ve a. Tun hmaa Pu Sena’n a lo chekawi ve thin, ‘Lenrual Hlui’ phuahtu Lalthangliana Hnamte (Pastor ni ta) chuan ‘Lung a va ti leng thar ve le’ a rawn ti ve hial a ni. A hla phuah- lengzem, lenglawng leh Pathian hla hote chu hla tha leh rotling an ni deuh vek mai. A hla thu leh a thluk a inhmeh thei em em a, a thu a tha thei hle bawk. A irawm chhuak ‘Khuanu Tuah Remsa Damlai/Kan Dam Chhung Ni’ tih te chu classic a tling pha a, khati taka guitar tum thiamin ‘Perhkhuang Tingtang Val’ tih hla a phuahte hi ain hmeh bik a, lengzem ‘Aw Min Hrilh Rawh Zanin Ngeiah/Zanin-ah Ngei’ tihte chu a hun lai tawng ve tawhte tan chuan hla tha hi a tling ngawih ngawih a. Pu Sena’n hlaphuah lam a hriat a hlawh lehzualna leh thawnthu nei a kan rin, a phuah chhan ni awm kan inrin siak fo chu ‘Chhingkhual Lenmawi’ hi a ni. Music thiam tih takah Mizo hla thluk changkang hmasa pawl tak ‘Chhuatpui Rem’ tia hriat, amah chuan ‘Ka Kiangah’ tia a thupui a dah zawk hi a thluk a thain khanglai hun lam dan style nen a inhmeh zet mai a ni. Hla ho mai mai ni awm tak a lang, ‘Phung Hla’ te hi tha deuh mai a ni a, phung chi hrang hrang hming, thangtharte phei chuan an hriat ngai miah lohte a rawn tarlang a, Thanga Jongte hian a album pakhatah thiam tak leh a phuahtu duh dan ni awm takin a rawn sa thar leh bawk. ‘Arsa Hla’ tihte hi a tha teh a nia, arsaah pawh arpui tui lai ngei mai Mizoten tui kan tihzia a phawk chhuak tha thlawt a ni. Kei chuan a hlaphuah zing a ka duh ber,lar lutuk lo,hmanlai deuh tawh a zaithiam Vanlalruati’n mawi lungrun lutuk a radio a a lo sak tawh thin ‘Samang Ka Then Hnu’ tih hi a ni. A thluk hi Welsh tune kan tih ang chi, lung kuai tak mai a nih bakah,a thu mawlh hi mawle. Thawkkhat lai a lo tlangval a lo nula ve tawh, mi ang pangai chuan ‘samang then hnu’ hi chu kan nei ve nual hlawm chuan ka ring, a thu hi a chhep mawi teh mai a nia,a tawpah ka pholang dawn e. 1975-76 lai vela Shillong nula zaithiam Linda Zopuii Sailo (hmanni lawk khan Linda hi AIR Aizawlah Asst. Director hna a rawn zawm) kha Pu Sena hian a hla tam tak a zirtir a, amah Pu Sena nen ngei hian Linda Zopuii zai hi AIR Shillong Radio station-ah kan rem dun a, chuta a hla ka la hriat reng chu ‘Bei Nge Sei Run Dung’ tih kha a ni. Linda Zopuii Zoram huapa radio artist lar a chher chhuaktu pawimawh tak pakhat chu Pu Sena kha a ni. Linda Zopuii pawhin a la hre ve vang vang thin chuan ka ring. Awle, Pu Sena, Mizote zinga rimawi lam a pioneer dik tak mual min liamsan kum 10-na pualin a hlaphuah zing a ka duh em em, lengzem hla mawi lungrun ‘Sam Ang Ka Then Hnu’ tih hla ngei hian a tlang ka han kawm teh ang. ‘Siahthing hnahnem par tilin lo uai e, Samang ka then hnu ngaih lai tizualin; Theih chang ve se aw,zamual liam hnu kha, A sulhnu zui reng ka nuam ngei e. Tlang tin bawm romei a zam kai chiai e, Tlai tla lenkawl eng a sen ruai e; Kei ka tan chuanin lunglen a na e, Sam ang ka then hnu ngaih ni bang lo.’ - P.S.Chawngthu.
Share now