Aizawl June 2, 2023 : Vawiin Zirtawpni Mizo Hnam Run chhung inkhawmna hun hnihnaa thu sawitu MNF Adviser leh Minister ni bawk Lalchhandama Ralte chuan tunhma chuan tuna raltlante hian MNF an ngaisang ngai lo, amaherawhchu an ram a han buai tak avangin Mizoram Chief Minister Zoramthanga ropui zia an hmu a, an tuiral a, chawimawi an duh a, an fak niin a sawi.

MNF chu Pathian leh kan ram tana din a ni a tiin, "Kan Hnam tan, Zohnahthlak te rorelna pakhat hnuaia kan awm theihnan a din a ni. Myanmar lam kan unauten harsatna an tawk a, mi sing 3 chuang an rawn chhuk a. Sawrkar leh NGO ten kan theih angin tan lain kan lo dawngsawng a. India sawrkar chuan raltlante thawn kir turin thu an chhuah a, kan CM erawhin kan thawnkir ve thei lo, kan ei a kan in chhung chu kan unaute hian an ei in ve tur a ni a ti. Kan CM hi a ropui a ni. Inthliarna awm miah loin abikin zirnaah lehkhabu leh uniform kan pe a, tunhma chuan MNF an ngaisang ngai lo, ameherawh an ram a han buaia kan Pu Zoramthanga ropui zia an hmu a, an tuiral a, chawimawi an duh a, an fak a ni," a ti.

MNF Adviser chuan, "Kan Dan buah chuan, Mizote hnama dintu Pathian tih leh rawn chunga, Mizoram leh a mipuite rawngbawla hnam thil hlu leh ro te vawnghim tlat turin, Pathian leh kan ram tan Mizo National Front hi din a ni, tih a inziak a. MNF member kan ni ringawt pawh hi a ropui a, Congress party chu hnamdang din a ni a, Mizote tana din a ni ve lo. ZPM pawh, MNF nilo, Congress nilo tih ringawt hi an dinchhan a ni. In nghahna (Preamble) an nei lo a ni," a ti. 

MNF Adviser chuan, "Tunhnaiah Congress party an inban phengphung a, an PAC te an thiat a, block te an bang a. ZPM nise nimin lawkah pawh an PAC te nilengin an thu a, an luhaina ber chu an phur lutukin bial viltu mi 35 an puang chiah mai chu an hniam ta ruai ruai a. Vawiinah chuan bialtin an invil thuah sup sup ta mai a, a tawpah chuan mipuite hian MNF nge nge an sawrkar leh dawn tih chu office leh tualzal titi a ni leh ta a ni," a ti.