Aizawl: Union Textile Minister Smriti Irani chuan Lunglei North bialtu MLA Dr.Vanlaltanpuia chu a inah lengah sawmin Mizoram chhung a Handloom industry hmang a intodelhna tur leh mi tam tak te tan a eizawnna siam sak tur a puantahna hmunpui (Handloom Hub) siam chung chang an sawi dun.
Thudawn danin Dr. Vanlaltanpuia hian Lunglei North bial chhung Handloom training Centre tlabal nasa lutuk tawh din that dan tur te, Haulawng leh Pangzawl tlang dung bakah Mizoram hmun hrang hrangah te Handloom hmunpui lian leh changtlung tak din dan tur ruahmanna leh rawtna a thlen te chu Textiles Minister Smriti Irani hian tha a ti hle mai a, Development Commissioner, Ministry of Textiles Sanjay Rastogi chu be nghalin MLA nen a chak taka hma laho turin a hriattir nghal a ni. Sanjay Rastogi hian MLA hi be nghalin Mizoram ah Handloom industry hmunpui siamna leh thawhhona nei turin a rang thei ang bera official a rawn tirh tur thu te, Handloom hmang a eizawng tute chu La duang (yarn) leh an mamawh hrang hrang te subsidy system tha tak pek a nih tur thu te leh puantah zawh tawh market system mumal tak leh internet hmanga zawrh chhuahna tur e-market thlenga ngaihtuahsak a tum thu a rawn sawi a ni.
Hemi chungchang ah hian Dr TP-a hian Mizoram Governor pawh lo hmu tawhin, Governor hian DO letter te a lo ziahsak bakah Lunglei North tlangdung Haulawng leh Muathuam North chheh vel leh Thenzawlah te Handloom hmunpui/Handloom Hub dinna tur chu kar thar lamah hian a hmun ngeia enho turin ruahmanna official-in an lo siam tawh a ni.