ZALEN November 7, 2024 : Pachhunga University College (PUC) chuan thingtlang khawchuam (adopt) an neih thin atan Sailam an thlang a, November 7, 2024 (Ningani) khan a hawnna hun an hmang a, Dr Vanlalthlana, Higher & Technical Education minister-in khuallian niin a hmanpui.

PUC chuan 2024-2026 chhungin Sailam khua hi college department hrang hrang ten an zir chiang ang a, kawng hrang hrangin an pui dawn bawk a ni.

PUC hian 2012 atangin khawchuam (adopted village) hi a lo kalpui tawh a, hemi atan hian zirtirtuten pawisa thawhkhawmin chumi hmang chuan kawng hrang hranga zirchianna an kalpui bakah a khawmite an tanpui thin a, lehkhathiam thei deuh tana PUC-a zir zawm dan an ruahman bakah zirlai leh upa lam tan Aizawla zirna kaihhnawih hmun pawimawh tlawhte leh thildangte an an ruahmansak thin bawk.

Sailam khua hi Aibawk RD Block, Aizawl District-a awm niin chhungkaw 179 an awm mek a, Mizo lal hmingthang Bengkhuaia khua thin a nih bakah a khuaa mite hian sava humhalha bird sanctuary an siam avangin hriat leh ngaihhlut a hlawh.

PUC adopted village pangana a ni a, a hmain Phulpui, Lungleng I, Dulte leh Khawrihnim te PUC hian a lo adopt tawh a ni.