Aizawl July 7, 2024 : PWD Engineer-in-Chief Er. Lalrinkima Hnamte chuan Mizoram-in Cyclone Remal siper a dawn avanga hmun hrang hranga lei minin kawngpui a hnawh then fai nana mi mal khawl an hire manah Mizoram PWD-in Rs. nuai 760 chuang an ba mek tih a sawi.

PWD E-in-C Er. Lalrinkima Hnamte chuan Cyclone Remal-in a ken ruah sur nasa avang khan Mizoram hmun hrang hrangah kawng a ping a, PWD-in kawng an enkawl chinah pawh khaw kar kawng kawngpui pawimawh hmun 576 chu lei minin a hnawh pin thu leh kawng then fai hna hi ngawrh taka thawkin tun dinhmunah hmun 501 chu lirthei kal theih tura an then fai tawh thu a sawi a, kawng then fai hna an thawhnaah hian mi mal ta, JCB leh khawl dang bakah leivung paih nan lirthei thahnem tak an hire tih sawiin, chung lirthei an hman mante chu pek a la ni lo a, chhinchhiah chinah mi mal pawisa Rs. nuai 760 bawr vel an bat mek thu a sawi a, chu aia tam pawh a nih theih tawh thu a sawi.

Mizoram PWD hnuaia division 19-in JCB pakhat theuh chauh an kawl avangin kawng block-te thian fai zung zung turin mi mal ta an hmang lo thei lo a, khawl an mamawh belh hle tih a sawi.

PWD E-in-C chuan lei minin a hnawh pin kawngpui chu lirthei kaltlang theih turin sial tlang ni mah se, a chhehvela leivung then fai tur a la tam hle a, a full-a clear an la nei mang lo tih a sawi a, chung lei minte chu thian fai vek tur chuan hun a la duh rei dawn a, sum leh pai senso pawh a tam hle dawn tih a sawi a, hmun thenkhatah chuan kawngpui bal hlawk te, kawng chanve bal te, retaining wall rem that vek ngaite a tam thute sawiin, heng kawngpui chhiate siam tha leh vek tur hian Rs. vaibelchhe 80 chuang an mamawh dawn nia an inchhut rih phawt thu leh ruah hi a sura kawng chhia a awm belh zel avangin sum an mamawh pawh hi a pun an rin thu a sawi.

Tun hnaia hnathawhna tur sum an han khailak deuhna chhan sawiin, Lok Sabha MP inthlanpui avangin Model Code of Conduct kalpui a ni a, hei vang hian sum hman tur ruahman tur, Mizoram Road Fund Board chu an thu lawk thei lo a, Ningani khan an thu thei ta chauh tih a sawi a, hetihlai hian PWD-in sum a hman tura ruahman lawk budget-ah tun chhiatnate hi chhut tel a nih loh avangin sum an mamawh belh hi a tam hle dawn tih a sawi.