Aizawl; Nimin khan Chhimphei Group YMA te chuan an thu lo tih tluk tawh bawhzuiin Melthum rama Quarry, mi pathum in lung lak nana an hman lai chu lung la tawh lo tawh turin an ti. Thudawn danin, quarry-a lung hi an lak reng avangin side drain a hnawh thin a, hei vang hian kawng hi a chhe thei hle a. Lirthei veivak ten kal hrehawm an tih thin avang-in Chhimphei Group YMA te chuan quarry neitute hi January thla chhunga siam turin hun an lo pe tawh a, mahse an siamloh vangin YMA hian lung la tawhlo turin an ti ta a ni. Chhimphei Group YMA president K Lalruatkima chuan, “Helai kawng hi kum 10 chuang an lo buaipui tawh,” tih sawiin PWD in kawng an siamthat pawhin helai hmun hi kal kan zel a ni a, helai paltlang thin lirthei ten harsatna an tawh phah nasa a. Quarry neitute nen pawh inbiain January chhunga siamtha turin kan lo ngen tawh a, mahse an siamthat loh avangin kawng a chhiat belh zel loh nan lung la turte hi an dang ta niin a sawi. Aizawl DC pawhin helai hmunah hian an lung lak danah fimkhur turin thuchhuah a lo siam tawh thin a, a la lui chu The Court of Criminal Procedure Sec 133 hmanga chawitir leh lungin tan thlenga hrem theih a nih thu a lo chhuah tawh a ni. Nimin vek khan helai Quarry nei tu pathum Laltlanthanga Saikhamakawn, Lalthanpuii Melthum leh Vanlalvena Melthum bakah Aibawk BDO R.Vanlalsawma, Kulikawn P/S SI Zodinsanga, JE, PWD, Aizawl Road Division leh Chhimphei Group YMA president K Lalruatkima ten lung lak dan chungchangah in tiamkamna an ziak a. In tiamkamnaah chuan tui-luankawr an siam zawh hma chu lung la tawh lo turin an ti a ni.