Queen Elizabeth II hian February thla 1952 khan lalna a chang tan a, British lal zingah lalna chang reng ber a ni. A hun chhungin UK Prime Minister thahnem tak a hrawn hman a, summer Olympics pawh tum 20 zet a hmang hmanin pope pawh dozen chanve chuang an inthlak hman. 

Lalnu hi Commonwealth ram tana a kila lung pawimawh ber pakhat a ni a, organisation leh charities hrang hrang 600 chuangah patron a ni bawk. Tin, UK ram in ram dang a thurualpuina kawngah dinhmun pawimawh tak a luah a ni. Chuvangin, a thinna hian thil tam tak a thlak danglam dawn a, UK mai ni lo khawvel hmun tam tak a nghawng dawn a, United Kingdom bakah khawvel ram tam takah thil inthlak thleng hmuh tur a awm ngei ang. 

Kum hnih kal ta khan,  Queen Elizabeth II-i private secretary Edward Young chuan, lalnu dinhmun that loh vangin kha tih laia British Prime Minister hnenah ‘London Bridge is down’ tiin thu a thawn a. Tichuan Prime Minister chuan hmanhmawh takin ‘Operation London Bridge’ tih chu hna thawk thei turin a din nghal a. Minute khat chhung lekin UK pawn lam sorkar 15 chuan state hotunu ber Lalnu chungchangah hma an la nghal a, commonwealth ram dang 36 te pawhin an zawm ve nghal. 

UK mai ni lo, ram hrang hrangah chanchin chu rang takin a darh nghal a, chanchinthar buaipuitute lam pawh chanchin ngaichangin an phe nghal sawk sawk a, radio station tin pawh ral khel dar an vaw nghal a, BBC show zawng zawng pawh chawlh lailawk a ni rih ang a, chanchinthar puang tute pawh thuam dum nen an inbel vek bawk ang. BBC news branding chu tih dum vek a bawk ang. Newspaper, TV channel leh radio station te chuan beng an chhi reng a, Lalnu thih ni niin a fapa upa ber Charles chuan a ai awhin Lalpa a ni nghal ang.

Amah zahna leh sunna lantir nan UK chhunga sumdawnna leh stock exchange zawng zawng te chu khar vek an ni bawk ang. 

An lo ruahman lawk tawh angin, Lalnu a thih tukah lal thar King Charles III chuan official speech a nei nghal bawk. Sorkar chuan Hyde Park, London-a amah chawimawina leh thlah nan laipui tum 96 an kap ulh ulh bawk a ni. King Charles III hian la thuneihna a chan hnu remchang hmasa berah Edinburgh, Belfast leh Cardiff te thlawh kualin a zin chhuak bawk ang. Lalnu sun a nih chhung hian TV lamah lalnu documentary tam thei ang ber tih chhuah tur a ni bawk a, tin, hemi chhung hian am,ah zahna lantir nan BBC-ah fiamthu lam hawi tihchhuah a ni lo bawk ang.

A thih hnu ni li naah lalnu kuang chu sipai thuam famkim ten Buckingham Palace atangin Westminster Hall lamah an dah phei ang. Chu hmunah chuan ni li chhung zalh a ni leh phawt ang. Chumi chhung chuan King Charles III leh a chhung te leh mi pawimawh hrang hrang ten zahna an lantir bawk ang. Tichuan, kawngkapui chu hawn a ni chauh ang. Pawn lamah mipui sang tam takin lalnu sunna hun hi an chhim ve dawn bawk a, a vui hun chhung hian ni 10-12 chhung a awh ang. Lalnu vui chhung hian United Kingdom-a bank te chu khar an ni dawn a, stock exchange pawh a vawi hnih nan kar hnih chhung khar a ni bawk ang. Zing dar 11 chiahah Big Ben sana lian chu a ri bul bul ang a, mipui reh duk karah chuan a kuang chu Wesminster Abbey chhungah zawn luh a ni ang. Sawm bik mi 2000 te chuan tawngtaina nen lalnu chu an lo chhawn ang. Hunserh hman zawh a nih hnuah kuang chu Windsor Castle lamah kal pui a ni ang a, St. George Chapel lamah kalpui a ni leh ang. Queen Elizabeth II hi a pa King George VI an zalhna kiangah zalh ve a ni ang. 

Lalnu vuina senso tur ringawt hi an chhut dan chuan pound billion khat chuang a nih rin a ni a, UK leh hmun hrang hrangah thil inthlak thleng tam tak a thleng bawk ang. British pawisa thar Lalpa hmel chuanna siam a ngai dawn a, lalnu chuanna pawisa pawh zawi zawia nuai bo a ni ang. Stamp leh passport bakah police leh sipai uniform te thlak danglam a ngai dawn a. An national Anthem ‘God save the Queen’ tih pawh ‘God save the King’ tia thlak a ngai tawh dawn a ni.