ZALEN, Feb. 02, 2025: Mizo ‘Queen of Pop’ Michelle Varte pawhin single thar a nei leh dawn — Valentine’s Day hit a tling ang em?

Michelle Varte chuan tunah hian a single music video thar tur a buaipui tan a. A single thar tur title chu ‘Nang Nen’ tih a ni. He hla hi Blue Corn member, Kim Kimi hla phuah thar lam tak a ni.

‘Nang Nen’ music video thar tur hi Hlimen Park-ah shooting neih a ni. A shooting hrim hrim hi neih zawh tawh niin, a video hi Moonshine Studio kutchhuak a ni dawn a. Michelle Varte hian Moonshine Studio hi a hit single, ‘Nachhawkna’ music video-ah khan a lo thawhpui tawh a. Hei vang hian an in-‘catch’ viau turah ngai ang.

A video lam hi studio lamah luhpui a ni tawh a. Mahse, Michelle hian a duh uluk em avangin voice recording bik hi tih that leh a tum nia sawiin, “Ka zai bik hi chu record that leh a ngai, ka duh bawk. Recording kan tih lai khan ka hnar hi a dik lo thin a, tihngaihna a awm thin lo. Mahse, kan record ta tho a. Ka thawhpui thiante chuan ka zai tha viau an ti, final pawh an duh deuh a. Mahse, keimah hian a hla thute hi ka la bel lo a, a thu lam ka sak bakah ka nal lo hian ka hria a, ka feel lo a ni. Chuvangin, tih that ka duh a, inzir leh deuh pawh ka ngai ang,” tiin ZALEN Thalai Khawvel a hrilh.

‘Ka Chanpual’ hitmaker hian a single music video thar tur hi kumin Valentine’s Day hma ngeia tihchhuah chu an duh dan a nih thu a sawi a. V-Day boruak nena inhmeh tak tura a ngaih thu pawh sawiin, “Hmeichhia leh mipa inkara inhmangaihna lo piang a, inngaihzawng a leng dun tura insawmna lam hawi hla a ni a. Ka sawi thiam dan ber chuan, ‘Take a chance on me...’ a ni deuh ber,” a ti bawk.

Michelle Varte hian ‘Nang Nen’ music video a tichhuak thei a nih chuan kumina a single music video hmasa ber tur a nih bakah, thla hnih liam taa Alex Hauhulh nena a single, ‘It’s Personal’ a tihchhuah hnua a release leh hmasak ber tur a ni bawk.

Hetih lai hian, ‘Nang Nen’ hla phuahtu, ‘Angel Corn’ Kim Kimi pawhin, ‘Nang Nen’ tih hla a phuah chung-chang sawiin, “Pop music niin, a nem dam deuh dap a, lengdun tura insawmna hla ka ti mai. A satu tur Michelle-i aw nen pawh a inhmeh reuh lutuk,” tia sawiin, Michelle Varte-in phur taka a hla phuah a saksak thei tur chu a lawmin, a phur hle tih a sawi.