Mizo Idol star — Rachel Lalnunkimi — pawhin music video lam a rawn awn veleh ta a. A debut single atan "Ka Phur Zo Lo" rawn thlangin, he a single video hmasa ber tur hi peihfel tawhin, tunkar tawp-ah release a ni dawn. Mizo Idol thlanna neih hnuhnung beraa top 4 dinhmun luah tu — Rachel, he reality singing competition-a a inlan atangin hmelhriat a hlawh zual sauh a. Mizo Idol 2015-ah khan pakhatna dinhmun luah phak chiah lo mah se, tunlai zaithiam zinga hmun hrang hrang, Mizoram pawn thlenga sawm hlawh ber pawl a ni chho a. Zai tura sawmnate ti hlawhtling thinin, heivang hian a debut single tur pawh a buaipui hlei thei lo a. Mahse, buai chung chungin tunah hian tihchhuah mai theih turin a peih fel tawh a ni. Rachel single hmasa ber tur hi "Ka Phur Zo Lo" tih a ni a. He hla hi T. Zorampela hla phuah a ni. He hla mawi tak mai lo pian chhan hi a phuahtu sawi danin, a tak rama thil thleng diktak a ni a, a hla copy pawh hi a phuah chhan hnenah hian a pe thlap niin an sawi a. T. Zorampela rem tihnain Mizo Idol star hian lungkuai zawng leh ngaihnobei takin music arrangement hi siam a ni. A hla phal taka sak tirtu lakah Rachel-i pawh a lawm hle. Mizo Idol star debut video-ah hian Te-a Boitlung chu producer niin, lengzem hla bika producer a nih vawi khatna a ni nghe nghe. Music arrangement leh recording hi BZ-a, Blue Wave Recording kutchhuak a ni ang. "Ka Phur Zo Lo" music video hi Te-a Chhakchhuak siam a ni a. Indoor shooting hi D&M Karaoke Parlour & Restaurant-a neih a ni a. Outdoor leh a scene thenkhat hi Silchar leh Vairengte-a shooting neih a ni daih thung. Rachel hi tunah hian a nu nen Venghlui-ah an khawsa mek a ni.