Aizawl May 1, 2024 : Vawiin khan Lucknow, Uttar Pradesh mi environment chhe zel tur venhim a nih theihna tura thirsakawr hmanga India ram fanchhuah tum kum 23 mi Sampooram Shukla chuan Aizawl a rawn lut a, Manipur chu an buai avangin a tlawh dawn lo a, naktuk hian Tripura a pan leh ang.

Shukla chuan hetianga thirsakawra India ram a fan chhan chu kan chheh leh vel a lo him theihna atan leh mihring nun chhe zel tur humhim a nih theih nana a hmalakna a nih thu a sawi a, a hnathawh thin, All India Radio (AIR) a Radio Jockey a nihna chu bansanin a nun hmun thuma hmun khat chu boruak chhe zel tur humhim a nih theih nan hetiang hian hma a la ta tih a sawi.

India ram fan chhuah tum hian July 31, 2023 khan Lucknow a chhuahsan a, India chhim lam state te tlawh kim tawhin Northeast-ah Tripura a la hmabak, nimin thleng khan KM 11,749 a tlan tawh a, amah hian sawrkar emaw NGO emaw sponsor a nei lo a, a tlawh te kutah a innghat tawp mai a ni. A zin chhung hi ni 273 zet a ni tawh a ni.

Mizoram chu India ram a fan tawh chinah mihring an hawihhawmna ber nia a hriat thu a sawi a, mipuite pawh an lo dawnsawng tha a ti a, Traffic Police te chungah lawmthu a sawi a, Mizoram traffic system tha a tih thu a sawi bawk. Samppram Shukla hian Save the Riparian te an hnathawhna hmunah a tlawh bawk a ni.