Aizawl; Mizoram sawrkarin Myanmar buaina avanga Mizorama rawn raltlante chhawmdawlna pe tura a ngen chung changah sawrkar laipuia Ministry of Home Affairs (MHA) chuan thu leh hla a la rawn nei lo a. Mizorama Myanmar raltlan mi 20,000 bawr vel an awm nia ngaih a ni.

ZALEN zawhna chhangin State Planning Board vice chairman H. Rammawi chuan Myanmar raltlante chhawmdawlna pe tura sawrkar laipui ngen thuah  foreign ministry leh home ministry-ah theihtawp chhuaha hma an lak thu sawiin, “CM-in prime minister hnenah pawh lehkha a ziak tawh a, kan rawn pe ang che u an rawn ti reng a, min la rawn pe mai turah chuan ka ngai,” a ti.

H. Rammawi chuan tun dinhmunah Mizoramah Myanmar atanga rawn tlan mi 20,000 ve an awm nia a sawiin an dinhmun sawrkar laipuiah thlen a nih tawh thu a sawi a. Covid leng vangin tun hnaiah raltlan rawn lut an tam lutuk rih loh thu a sawi bawk.

Hetihlai hian Myanmar ramri dep, Champhai district chhung, Tuipuiral huam chhungah nimin thleng khan raltlan mi 1,450 an awm mek a. Tuipuiral group YMA hruaitute hnen atanga ZALEN thudawn danin, Myanmar atanga Mizorama raltlante hi hmun hrang hrang atanga rawn lut an ni a, Tuipuiralah hian khaw 21 awmin khaw 19-te chuan raltlan mikhual an nei mek. Pg 24

Myanmar atanga Mizorama raltlante zingah chhungte bel eng emaw zat an awm a, chhungte belh tur nei lote chu YMA, Zirlai pawl, kohhran leh khawtlang ten tanpuina pein an chhawmdawl a, sawrkar pawhin a theih ang angin chhawmdawl hna a kalpui bawk.

Tuipuiral chhunga raltlan awm mek zat:
Thekte    135
Thenpui    3
Khankawn    1
Farkawn    780
Vaphai    179
Chawngtui    Nil
Samthang    2
Dungtlang    15
Leithum    1
Vanzau    Nil
Bungzung    8
Zawngtetui    7
Khuangleng     13
Sesih    13
Lianpui    2
Leisenzo    8
Sazep    4
Vangchhia    2
Khawbung    157
Zawlsei    100
Khuangthing     10
TOTAL    1450