Aizawl December 15, 2022; Vawiin khan MNF Thalaite chuan Myanmar ram tualchhung buaina avanga Mizoram-a rawn raltlante chenna hmun pahnih (2) Sihhmui leh Sihphir camp-a awmte chu an khawsakna hmunah an tlawh a, MNYF Vice President Zodinpuia chuan, Unau inhmangaihna-in ri a nei lo tih a sawi a, Krismas thil pek a hlan.

Thilpek hlanna inkhawmah hian MNF Ṭhalai Vice President Zodinpuia chuan, "Myanmar leh Bangladesh tualchhung buaina avangin kan unau tamtakin inhumhimna zawngin Mizoram an rawn bel a, kan unau inhumhimna zawnga rawn lut te hi Myanmar atangin mi 40000 dawn leh Bangladesh aṭangin mi 300 zet an ni tawh a. Kan unaute tuamhlawm tur hian tlawmngai pawl, kohhran leh Zoram mipuite'n theihtawp an chhuah a, Myanmar atanga raltlante chenna tur pawh Mizoram hmun hrang hrangah camp 160 zet buatsaihtawh tawh a n," a ti. 

India ram State thenkhat ah chuan inhumhimna zawnga India ram a rawnlutte Police in man in, lungin-ah te an inkhung hial a. Mizoram-ah chuan Zohnahthlak hnam te tan Chief Minister Zoramthanga kaihhruaina hnuaiah tlamuang takin kan khawsathei a ni, a ti bawk.

MNYF Vice President Zodinpuia chuan, "Ram chuan ri nei mah se, unaute kan inhmangaih erawh chuan ramri a nei thei lo," a ti a. "MNF chu Zohnahthlak Inpui leh Zofate insuihkhawmna tura beitu anih avangin MNF ṭhalaite pawhin kan tih theih tawk kan unaute tan ṭanpuina vawiin ah hian kan rawn hlan a ni," a ti bawk.

Myanmar atanga Mizoram-a raltlan te tanpuina tur hian District Deputy Commissioner (DC) te kaltlangin Mizoram sawrkar chuan cheng Nuai 400 chuang a pe chhuak tawh a. Zirlai naupang 6000 chuang an zir zawmna tur ngaihtuahin, uniform leh zirlaibu a thlawnin a tumsak a ni.

Myanmar leh Bangladesh tualchhung buaina avanga Mizoram-a raltlante chhawmdawlna ngaihtuahsak hi Mizoram sawrkar chuan India sawrkar laipuiah a thlen a. India ram hi UN Refugee Convention of 1951 leh 1967 protocol te pawmtu a nih loh avangin Myanmar leh Bangladesh atanga raltlante hi dan ang chuan Refugee dinhmun India sawrkar chuan a pe thei lo a ni.