Aizawl June 14, 2024 : Vawiin khan Congress Party chuan Congress Bhavan-ah ‘Friday Political Session’ an hmang a, He hunah hian MPCC Sr Vice President Lalnunmawia Chuaungo chuan thu sawiin ram mipuite leh ram hmasawnna chu dah pawimawh hmasak ber tur a nih thu a sawi.

Chuaungo-a chuan, “Congress Party hi ram rorelna chelh leh turin kan inbeisei a, chutih rual chuan 'Congress Party in enge rorelna fawng chelh a tulna' tih hi kan inzawh fo a ngai a ni. Ram mipuite leh Ram hmasawmna hi kan dah pawimawh hmasa ber tur a ni. Chu chuan kan society leh kan chhungkua ah hmasawnna a thlen ang."

“Congress party hi Mizorama remna leh muanna a awm theih nana thawhhlawk ber kan ni a. A mimal takin Pu Lal Thanhawla khan a thawhhlawk ber niin ka hria. Rambuai hrehawm zia kha hre lo tamtak an awm tawh a, zanah pawh a inkhawm theih loh a, curfew karah kan khawsa a, kan rethei em em thin. Tunah chuan kan lo zalen ta a, remna leh muanna a lo thleng ta a. Congress party zarah remna leh muanna a lo thleng ta a ni," a ti.

MP thlan chungchangah a hmuh dan sawiin, “BJP-in Central-a an rorel dan kan hria a, BJP paihthla thei party chu I.N.D.I.A Alliance, Congress Party kaihhruai a ni. Mizo mipuite hian Congress min support turah kan lo ngai a. Chu chu kohhran hruaitu leh mi tamtak in kan hnenah pawh an sawi a ni. Candidate tha tak kan nei a, kher neuh neuh pawh dawl tak a ni chungin, mipuite hian chutiang lam chu an lo hawi lo hle a lo ni a. Mizo mipui te hian kan ngaihtuah chian a ngai hle a ni.” a ti.