- Lalchhandama Colney Khawvela ram nuam ber ber – England, Switzerland, Singapore, etc. te eng vanga hetiang dinhmun thleng thei nge an nih tih chu ngaihtuah tham tak tlingin ka ring. Heti zawng hian lo thlir ta ila, anni chu Pathianin a duhsak bik em a, chuvang chu alawm, han ti ta ngawt ila. Mahse, chutiang lam thu reng reng khawiah mah kan hmu si lo, a nih loh leh Mizote chu min duhsak lo bik em alawm, han ti leh ta ila, hei pawh hi khawiah mah hmuhna kan nei lo. Chu a hnekin ang khat reng in, ni a chhuahtir a, a tlaktir leh bawk a. Khawvelah chuan Africa ram te, Arab ram te, tunah rih chuan ram awmna châkawm loh, zin mai mai pawh châkawm lohna a ni. Ram ralmuang lo leh retheiho hi chu tuman kan tlawh châkin awmna atan phei chuan kan ti lo tawp ngei ang. Hei vang hian mipui, nunau dinhmun pawh a inang lo hlawm hle ang a, lei vanram leh hremhmun te pawh tehkhin ta ila a mak hran em emin ka ring lo. Democracy ram lian then bung khat a awm kan ni a, political party-te pawh kan nei ve nual a. Henga hruaitute leh mi thahnemngai tak takte hi a langa kan ram tana thawktute kan neih chu an ni a. Tun hma deuh kha chuan rorel lai party-te, hetah a hnuai lamah (Unit Level)eng eng emaw sawiselna a awm nasa thin a, a buaithlak ve thin hle a ni, an inluling mah mah thin,an ti. Tun hnuah pawh hian a hotu lam level-a induhsakna uchuak tak awm thin kha a awm leh palh ang tih a hlauhawm hle. Mahni party mi leh sa induhsak hi chu a awm ve hrim hrim a, party tin dan a ni a; mahse, fimkhur taka kan tih thin chu a pawimawh hle ang. Political party te hi kan ram hruaitu leh enkawltu berte an ni a, kan ram nawm leh nawm loh, chhiat thatah pawh hian a mawhphurtu berte kan ti lo thei lo vang. Hei vang hian kohhran leh mipuite pawh kan fin chhuah ve fo a tha hle ang. Hman lai tih tawh mai ang, kha chuan sawrkar hnathawkte kan fel lo, buar chuar thin hle a. Corruption, displine, hun vawn dik, etc. chungchangah te kan tha lo, kan tha lo mai pawh ni lovin eiruk, etc. te kha a tur ve reng emaw kan ti deuh, kan ngaisang zaw mah emaw tih mai tur a ni. A hnathawk hotu lam thenkhatte phei kha chuan zu, hmeichhiate nen kan ti deuh nuaih mai thin. Office han dawr hrim hrimte pawh kha a hrehawm chang a tam hle, dawr kan huphurh awm thin hle a ni. Tun hnuah hi chuan kan zia awm ve ta viau a, eiruk tih velte pawh thenkhat, a fal deuh tih loh chuan kan ti duh ta meuh lo. Kan mi thiam hote pawn dawhkan atanga ti ringawt lovin a hmunah an ti ve tak tak tawh niin ka hria. Hun vawn dik chungchang thuah te pawh sawi a tam tawh a, thenkhat tih loh chu kan ziaawm viau tawh. Sawrkar hnathawk kan nih angin ram hmasawnna tur leh engkim khawihtute kan ni a, rin aiin kan mawhphurhna a lian hle. Keinin kan thawh that phawt chuan ramin hma a sawn ang a, ram nuam tak kan siam mai dawn a ni. Kohhran hrang hrang te hi kan tam hle a, heng zingah hian Presbyterian, Baptist, Salvation, etc. te hi a lian pawl an ni a. Heng kohhrante hian ram chhung leh pawnah te rawngbawl hna ngawrh takin an thawk hlawm a. Member hlate hnuh hnaih nan tiin Camping leh Crusade te pawh a khat tawk a neih reng thin a ni. Heng bakah hian kohhran thenkhat chuan ruihhlo ngai te, hmeichhe awm tha duh lo, etc. te chhan chhuahna hmunte pawh an nei nual a ni. Kum sawm dawn lai a ni tawh ang, UPC kohhran chhungkuaah buaina nasa tak a lo chhuak a, biak in te pawh an kalh thep thup mai a ni. Chutiang bawkin Salvation Army chhungkuaah buaina a lo chhuak ve leh a, mi tam tak chhuakin kohhran thar hial pawh a lo pian phah leh ta a ni, a pawiin a zia lo thin hle mai. Awle, kan ram chu Kristian deuh vek kan ni a, sualna tam leh tam lohah te, mi tha leh rinawm tam leh tam lohah te, kohhran hi a sulsutu ber a ni a, a mawhphurtu kan ti lo thei lo vang, chuvang chuan an pawimawh hle a ni. Kan pipute hun lai kha chuan sawrkar ala awm lo va, kohhran pawh a awm hek lo,lal leh upaten ro an rel a; tin, bawlpu kha a awm ve thin a, an inthawi ve zauh zauh thin, sakhua em em an nei lo niin alang. Kan hriat theuh angin lo neih a eizawng an ni a, an zavai mai khan an in ang vek a ni. Ni tin lovah an feh thin a, nula leh tlangvalte phei chu an in lawm thin a an hlim thei hle. Lo zawh ni leh buh seng zawh ni te phei chuan an hlim thei hle. Tun lai angin bazaar an la nei ve lo va, chaw hmeh tur te pawh an mahni huan leh lo a mi vek an hmang thin. Sate pawh hi an ei ngai em em lo va, an awh leh kah changin an ei thin a, thenawm khawvengte an sem ve dan dan thin. Intihhlimna, Chapchar Kut, Mimkut te, Pawlkut te an hmang thin a, an hlim nasa thei hle. Khuangchawi ni phei chuan a khaw nawtin awm ni an kham a, an hlim thei hle. Tun lai angin thilruk hmangte hi an awm ve lo va, kawngkharte pawh thingfakin an do a, nilengin engmah a bo chuang ngai lo a ni. An khawtlang a muangin a nuam em em thin a ni. Kan han sawi lan tak atang te,kan politics din hmun, sawrkar, kohhran, etc. te kan hre thei nualin ka ring, chu bakah chanchinbu, T.V., tih vel atang pawhin kan hre thei bawk ang. Kei chuan kan ram hian ram nuam nihna din hmun hlat lo hlein ka hria a, hmabak chu la tam hle mah se, mi tinte hian tun dinhmun bak hi tlem han sawn leh tum ta ila, eng emaw tak chu kan thlen ka ring, hawh u, ram nuam i siam ang u.