Aizawl: Zoram People’s Movement Leader Lalduhoma chuan, “He leia Pathian ram din theihna tura pawimawh ber chu sawrkar tha neih a ni a. Kohhran tha neih aiin sawrkar tha neih ram tan a pawimawh,” a ti.

ZPM leader hian Tuikum constituency huam chhunga khaw hrang hrang a tlawhnaah he thu hi sawiin, “Thawhtanni leh Inrinni inkarah hian kan ram politics-ah hian Pathian ram thlentir hi ZPM chuan kan ngaih pawimawh ber a ni a, chu chu kan ram siam thatna tur a ni. Kan Pathian hian inthawina aiin dik taka rorel hi a lawm zawk a, rorelna dik awm chuang si lova sakhuana kalpui vak hi Pathian a lawm lo, chu aia duh zawk chu a nei a, chu chu sawrkar tha a ni. Chu sawrkar tha din tur chuan a mawhphurtute kan ni,” a ti a. “ZPM hian ram hruai kan tumnaah hian a khaikhawmtu a awm a, kan policy bua kan dah hmasak ber leh kan ngaih pawimawh ber chu ‘ram rorelnaah hian Pathian ram thlentir’ tih hi a ni. Ram rorelnaah Pathian ram a thlen loh chuan kan policy-te hian awmzia a nei dawn lo a ni,” a ti bawk.

ZPM thuchhuah tar lan danin Lalduhoma hian Ngentiang, Thinglian, Hmunzawl, Rullam, Sialhau, Khawbel leh Hmuntha khuate a tlawh a. ZPM General Headquarters atangin hruaitu thenkhat leh ZPM Tuikum block hruaituten an tawiawm.