Copa America 2021 khelh mekah, nimin zing khan first-half a Guido Rodriguez-a goal thun hmangin Argentina chuan an ram thenawm Uruguay si khat faiin in an hneh. 

He Group A match hi Uruguay tan an game khatna a ni a, Argentina erawh Chile nen 1-1in an lo inhnehtawk tawh thung. Coach Lionel Scaloni chuan huaisen takin Chile an khelh tuma start phaklo player pali lai a luh tir a, a duh thlanna dik chuan result duhawm a neih tir. 

He chakna point thum hlu tak hian Los Albiceleste te point khat neih sa chu beilhchhahin point li nen Agentina chu group hmahruaitu niin knockout stage lut turin beisei an nei sang rih hle.

Suspend tawk Edinson Cavani a rawn let a, tlar hmaah a strike partner Luis Suarez nen an inkawp a, beisei erawh an phak lo thung. Anni pahnih bakah hian Uruguay hian an team tichak turin player dang tha tak tak an kawl nual a, chung zingah chuan  Diego Godin, Jose Gimenez, Federico Valverde leh Rodrigo Bentancur te hi an tel.

He inkhel hmuhnawm takah hian Argentina lam hi an chungnung deuh zawk a, goal shot hlauhawm pawh nei nual chungin goal khat tih loh chu a hna tlin taka thawktu Uruguay keeper Fernando Muslera chuan alo dan sak thei vek a ni.

Minute 13-na lekah Argentina chuan nawr pheiin, mual sir vei lam a tlan Messi chuan ball khalh pheiin a thiante tana duh thusam a tauh turin ball chu a cross chho a, Uruguay defender kar atangin Rodriguez chu a rawn zuang lawr zawk a, mawi takin keeper dinglam kilah a tauh phei a, ball chuan goal ban fuhin net lamah a pial lut zawk a, Muslera a che hman lo. He goal hi Rodriguez-a’n ram tana a goal vawi khat thunna a ni.

Minute 27-naah striker Cavani chu box chhungah tih tluk a ni a, penalty hlawhchhuah beisei takin Uruguay  player te an au thawt a, mahse match referee Wilton Pereira Sampaio chuan a uksak duh lo.          

Second half tan a ni a, team an innawr tawn zak zak a, an beisei leh duh ber goal erawh an thun belh thei lo. 

Kum 27 mi Guido Rodriguez  thiamna hmutu coach Lionel Scaloni chuan ring ngamin Leandro Paredes aiah a luh tir a, chu a pu beisei leh rin ngamna chu  Real Betis midfielder hian tih thlawn a tum lo. A hun tha neih hmasak berah a pu leh a ram lawmna siamin goal awmchhun hi a thun ta reng bawk a ni.

Luis Suarez leh Edinson Cavani te inkawp an che hlei thei lova, striker pahnih hian goal zawnah vawi khat mah shot an nei lo. Goal bula striker hriam leh hlauhawm em em pahnih hi an inkawp fuhlo deuh nge, an coach beiseina an hlawhtlin tir thei rih lova, an ram mipui te lawm an siam thei hek lo. 

An vawikhat khelhna chauh ala nih vangin world-class attacker pahnih te chet dan hian mit tlung rihlo mahse, an hmachhawn tur team dang defender tan chuan striker hmachhawn chakawm tak erawh an nih phah chuangin a rinawm loh.

Ram tana khel tha hlei-theilo Lionel Messi a khel chhe lova, goal thun chiahlo mah se chakna goal siamtu  niin man of the match-ah thlan a ni zui bawk.