Lo tura ramngaw tha lai vata kumtin maia kan ramngaw neih that kan vat chereu leh kan hal thin hi a nghawng kan tuar chho mek niin a lang. Kumtin thing tiak engemawzat kan phun belh chung pawhin, kan ramngaw neih sa te kan tihchereu zel avangin ramngaw tha kan neih belh hleithei lova, kumtin kan chan belh zel zawk ni mahin a lang. Hetiang renga kan ramngaw te duat nachang hre lova kan awm chhoh zel chuan, kum 20 lo la awm leh turah chuan Mizoramah hian ramngaw tha hmuh tur a awm tawh lovang. Ramngaw thalai kan vah chereu a, lo vah bak ram kan tihkan duai duai thin avang hian tuihna siamtute kan suat a ni tih Mizorama chengte hian kan hriat thar leh a tul ta hle. PHE deptt. lamin tlawmngai pawlte nen tang tlangin tuihna humhalh beihpui thlak tum mek a ni a, hei hian kawngro a su meuh ang em? Ram a kang duai duai a, a tikangtu lam kan inman fuh hlei thei lo a, man chu sawi loh, hremna an pumpelh zel emaw tih tur a ni! Kan ramngaw te ui leh duat nachang kan hriat loh chuan, phai khawlum, boruak chhe nasa zawkin Mizoram hi a la chiah dawn tih mitinin hriat a tul khawp mai. Mahni huan/lo/ram a kan loh avang maia lungawi chi a ni lo. Ram tihkan chungchangah hian sorkar lam pawhin khauh lehzuala dan a lekkawh a  ngai ta niin a lang. Ram tikang khuate chu hmasawnna hnathawh chungchang thlenga hrek ngam a tul tawh a ni maithei! Mizote hian ze mak tak mai kan nei a, chu chu, a hmaa lo inven lawk emaw, lo fimkhur lawk emaw theih reng pawh, pawi a thlena harh chawp chi kan ni fur mai! Chuvangin, ram tikangtute pawh man chhuah an nih chuan ngaidam mai lovin, Jail bang hialte zut sela, ram tihkan chu ram hnam pawisawina a ni tih hre tura zilh hau a tha in a rinawm. Kumtin vah bak ram a kang diai duai a, hei hi Mizoramah chuan kan ramngaw suattu a ni. Ramkang thelh chungchangah, tlawmngaih chhuaha thawk-chhuak thinte an fakawm khawp mai. Amaherawhchu, mihring nunna tana thil hlauhawm a nih thin avangin, ramkang hi kan vei tak tak a nih chuan sorkar lam pawhin a thelhna lamah nasa zawka insen a huam a tulin a rinawm! Tunhnaiah hmarchhak state dang, Arunachal Pradesh-ah chuan ramngaw a kang nasa a, a thelh nan helicopter te hial an hmang mai. Khawvel ram dangah pawh thlawhtheihna hmanga ramkang thelh hmuh tur a tam thin hle! Chuvangin, sorkar lam pawhin ramngaw kang thelhna chungchangah hmathar a lak a tul hle. Ram kang tuar nasa bertu chu mihring te kan ni a. Rannung, ramsa leh savaten an tuar nasa hlei hlei emaw tih tur a ni! Ramngaw chereu zel avang hian kan sik leh sa inthlak thin dan pangngai pawh a mumal hlei thei tawh lo! Thingtlang loneitute pawhin buh leh bal tharchhuah tam a lo harsat tak chhan hi, lei tha (fertilizer) an pek vang emaw a ni satliah tawh lova, kumtin maia ramngaw kan vah chereu thin vang a ni tih an pawm a hun tawh hle a ni. Kumtin ram thar, ngaw tha zuana vat chereu lova, lo/huan nghet neia eizawnna an siamrem a tul tak meuh meuh tawh a ni. Chumi atan chuan sorkar lam pawhin thapui thawha loneia eizawng thinte a ngaihsak lehzual a tul bawk ang.