June 30, 2022; MNF president, chief minister ni bawk Zoramthanga'n, Mizoramin thil ropui leh thiamna ropui rampawn a thawnchhuah (export) tur a neilo tih sawiin, "Thawnchhuah tur kan neih hlu ber, mi'n an duh ber chu Zoram in remna kan neih ang hi a ni," a ti. 

Vawiin  Remna ni vawi 36-na lawmna inkhawm, Vanapa hall a hmanah thusawiin, chief minister chuan, inremna thlenna turin, Pathianin engkim a chuktuah rem khawm vek tih a sawi a, hmarchhak state dangah te pawh ramhnuai mite nena inremna sign a tam tawh thu te, mahse chu chuan an ramah inremna tluantling a siam chuan loh thu te a sawi. "Mizoram danglamna chu kum 30 chuang kalta a inremna siam a nih hnu khan, Mizote hi tumah awmze nei a ramhnuaia chhuak, Zoram buai siamtu kan awm tawh lo," a ti.

"Kan inremna hi kan chhehvel a mite hian an hriatin ropui an ti lutuk, kan theihna a ni lo, kohhhran te theihna bik a ni lo, NGO leh political party te theihna bik a ni lo, tereuh te te, lian pui pui a remkhawm turin kan Pathian in ro a rel a, kan Pathian thilthlawnpek a ni," ti bawkin, chief minister chuan, kan inremna thuthlung zawng zawng hi en ila, keini anga inremna tha, tluantling, tlo leh entawntlak kan chhehvel ah a awm lo," a ti bawk.

CM thusawi thenkhat:

• Population base ah missionary tir tam ber kan ni chungin, chanchin tha hril kawngah Mizote'n tih tur kan la ngah.
• Inrem lohna nasa tak atanga inremna tluantling lo awmna hi peace bonus kan phu na a ni.
• Remna kan neih hi kan vawng tha reng anga, a chhiat hlau takin kan kalpui tur a ni.
• Iremna siam a nih hnuah, tumah awmze nei a ramhnuaia chhuak, Zoram buai siamtu kan awm tawh lo.