- C. Vanlal Ruaia 9862569310

Kan ram ri buai kha ka thlir kir thin a. Assam min beih dan char char kha mak ka ti lu tuk a. Vawiin ni thleng hian mak ka tih a bang thei lova. India Ram a kan awm chhung hian chuan Ramri hi Central India thu thu a ni. State leh State inbiak vel hi Central trick tih hriat a tha. Ramri chungchangah hian Mary Winchester an lak let atang khan British khan siamfelna Survey 1873 khan a nei nghal vat a. Boundary aia khirh zawk mahin dai danna Inner line a siam a. Chuchu ramri ah puan nghal a ni bawk tih hi a hrechiang ve rengtu Gauhati University Prof. Barpujari te, Dr. Suhas Chatterjee, Dr. Sribanikinkar Chaube adt te an ni. Chung Inner line reserve chu Syhlet Bengali pem ten dan bawh chhia in an rawn luah. Engvangin nge Dan bawchhetute chu kan nihlawh tir bik ngawt ang? tih hi Mizo thalai thu vuak thluk chu a ni. Ramri buai avanga Mizoram chhung thlenga min rawn bei kha a mak em a. A thiam lo zawkin min nawr chiam mai kha han sawi ila.

9th Oct. 2020 khan Mizoram khawthlang kil Thinghlun khua Pu Zolawma leh Ben Davida te huan chu Cachar District pakhat Karimganj Deputy Commissioner leh Superintendent of police te kaihhruaiin Assam police leh Media te hruai in huan an rawn sam (suasam) a. Thlam an hal ral vek bawk a. Boundary lung te an phawi a. Chung an thiltih (Robbing System) thla lak te chu an vawrh darh leh nghal a. Min tham lo in min hlau lo hle mai. Indian National policy Non Violence/Non aligned movement lam te han zir bing phei chuan a zah thlak deuh thin. Mahse a la zual zel Manipur buaina pawh a la kal zel.

17th Oct. 2020 chuan Assam police ralthuam keng leh Civilian ho te’n Police Duty post te Sairawkherh a rawn perh in Saihapui Covid Duty post an rawn ti chhia a. Thimhlimah Assam civillian an rawn chho a. Vairengte Mipui thinrim chuan an um let a. Inhliam an awm nual kha. He mi ni atrang hian Assam chuan Road Block an kal pui nghal a. Assam ho in Building thenkhat leh dawr an rawn sak chu hal fai vek a ni ta. Kawng dan ping (Economic Blockage) ni 26 vel lai an dang tak ah khan Mizoram pawh central lam ah zualko-in Central hriatpuina in online discussion te an nei a.

8th Nov.2020.ah Chief Secretary Level Inbiakna : Chief Secretary ( CS) level Assam leh Mizoram inbiakna te Union Home Minister Amit shah a ho in Delhi-ah an nei a. Mahse an in rem thei lova. A sawngsawhlawt vaklo Kawng dan chu an chhun zawm ta zel a ni. 11th Nov. 2020 chuan state pahnih te chu an in block tawn tawn ta a ni.

2nd June 2021- Assam Official leh Assam Armed Police leh CRPF te chu Chuhvel, Mamit District ah an rawn lut leh a. Mizo huan Haliday-a thlam sak leh thlai chin te chu chhunzawm tawh lo tur in Order an rawn pe a.

4th June 2021 chuan Assam lam mi, tutenge tih pawh hriat loh ten, Zophai a leilet thlam awm zawng zawng chu an rawn hal fai vek mai a.       

10th June 2021- Assam lam hotu te Home secretary te leh police tam tak ten Lailapur bul a Central force duty post te tawn tlangin Vairengte police post thleng an rawn chho leh thawr mai a. Mizoram Police Vairengte ten Mipui thinrim lak ah kan venghim zo lo ang chu let vat ru an tia an let leh nghal a ni.

11th June 2021 - Assam Hailakandi district, Deputy Commissioner leh Superintendent of Police leh Forest DFO hotute, Assam Kutty khua atangin an rawn kal a, Chuhvel Mamit dist. a John Haliday a thlai te an rawn ti chhe leh ta a.

27th June 2021. Hailakadi Dist. Superintendent of police hote leh Civil mi tam tak te chuan Aitlang Vairengte-a Mizo huan an rawn sawisa a, Kuhva Mizo te chin chu an pal zut in, Thlai dang pawh an pawt phawi vek a.

29th June-ah Superintendent of police Hailakandi chu Aitlang Vairengte ah an rawn lut leh a, Camp an sa a, Puanin an kaih a an awm chilh nghal a. Ramhluna huan tlang an rawn luah nghet a. A bul a Mizoram police te puan in kaih chu an tih chhiat sak a, an hnawt sawn bawk a. Mizoram Police te chu an in sawn ta bawk a. A tlawm thlak hle a ni.

30th June 2021-ah Kolasib Dist. Deputy Commissioner leh Assam lam official te chu Aitlang-ah hian an in bia a. Mahse Assam lam hi a pawngpawrh hle a. Buaina siam lova “Status Qua" a awm tur in Kolasib official te hian rawtna an siam a. Mahse Assam lam hian an zawm chuang lo a. An so tuam tuam reng mai a. Mizo Mipui tan chuan kan police te tawlh kir lai hmuh chu hrehawm tak a ni. Vairengte mipuiin puanin pathum Mizoram Police (20 personels) an kaih sak chu an luah thei ta chuang lova. Assam police ten an tih chhiat sak bak ah an bungrua pawh lak an phal lo’ “an um tlan” an ti.

1st July 2021 - Assam Police chuan Aitlang a Mizoram police awm ve chu hnawhchhuah tum in an rawn vau leh zel a.

10th July 2021 chuan Buarchep leilet ah rawn lut in, JCB in Mizo lei let ah kawng an rawn sial a, Mizo thlai leh buh tam tak an ti chhia a.

24th July 2021 Inrinni tlai Dar 5.30 khan Shillong State Convention hall ah North East Chief Minister Conference (NE CM convention) an nei. Mizo rama Pawl hrang hrang NGO in Ramri memorandum leh documents an siam chu Amit Shah, Union Home Minister-ah Mizoram CM Zoramthang an’ a pe a. CM hi CS Lalnunmawia Chuaungo leh DGP SBK Singh ten an tawiawm a ni. Hetia Shillong lam a inkawm zo chauh a CM ve ve an inbia a. Amit Shah a hriatpui na a in thlah ni si, a tuk lawkah Mizoram chhung Mizo police post Vairengte an rawn run (raid ) ta mai kha Inhmuhsitna, in tham lohna nasa tak a awm a ni. Ramria kan buai rual hian, Arunachal, Naga­land leh Meghalaya-ah te an buai ve vek. Mizoram in a tawn ang em em inrun hi tu state mah in an tawng ve lo. Enge a chhan hi ngaihtuah tham tak a ni.

Silai A Puak ta: 26th July 2021 chuan Assam Armed Police 200 Cachar IGP leh Cachar DC, Cachar DFO leh Prison Van, Ambulance, Road Barricade leh Puanin te Medical equipment te nen Vairengte police Station ah chawhma dar 11. ah an rawn lut rup ta mai a. Vairengte Auto Taxi stand-a Central force duty chu an su tlang lui a. An rawn chhohna kawng ah Mizo motor an hmuh apiang an rawn sawisa chho a, Vairengte Police Post an rawn thleng a, police 30 vel awm chu an hnawt chhuak a. Vairengte Mizoram Police post an luah a.

Vairengte Civillian thin rim an rawn pungkhawm a. Assam police ho chuan Tear gas in an lo hnawt darh a, a sawt lo. Assam police in Mizoram police-duty post a LMG an chhuan chu an hmet puak ta a. Silai ri chu Mizo police an hnawh­chhuah ten an hai lo… An chova an rim a; an rim thlu ta. Mizoram Police ten an han chhang let ta a. Hetih lai hian Kolasib SP ten Assam Official hi remna siam pui tum in Vairengte police Camp ah hian an la din pui a. Mahse bak leng in an tlan chhe ta hlawm a ni. Assam lam hian Grenade te an che lek hman a. Mahse, an hriat lohna lam atrang a kah an nih avangin an tawm im ta. Assam police chu Capture chhung­ah an awm ta a, An tan chet ngaih­na a awm lo. Tawnzau var an rawn zar tak avangin Mizo ten an thlahthlam ta a. An tlan chhuahna lam tur te hrilh in an chhuah tir ta a ni. Assam chet dan hi India ram ah an mualpho hle a ni.

Hun rei lo te chhungin Amit Shah-a Union Home Miniter khan Assam CM leh Mizoram CM a ran be vat a. Hei pawh hi ngaihtuah tham a tling, an lo thlir reng em ni? Assam police Zawng zawng chu bak lengin an tlan haw ta a ni. Police 6 leh Civil 2 an thi a. Assam CM pawikhawih ah a ngaih theih. A phen ah hian Central em ni ang?.       

Ramri a buai zo chiah a Mizoram-in Assam Smuggler kan khawi a, Heng thil ruk Smuggling trafficking hi Assam a kal tlang thin a. Assam CM chuan hnawk a ti hle. Mizoram chu Smuggling chi hrang hrang Silai, Kuhva, Rangkachak, Drugs Fertiliger, Damdawi etc. a kal nuai nuai a, Champhai DC pawh Smaggler in a khing tawp ngam zawk a nih kha.

Kuhva bik ah chuan, Mizoram khawthlang kuhva ching tute Market a ti chhe vek a. Assam Chief Minister chuan Kuhva a vai ban ta a. Mizoram kuhva thar­chhuah pawh phai lam ah a hralh theih loh/a kal thei ta chuang lova. Zamuang lam Kuhva ching tute thin rim an Duty ta. An hmuh chu an hal ta hmiah hmiah mai a. Sawrkar bawkin Order a rawn chhuah a. Kuhva man mahni kut a sawi sa lova, Thu neitute kut a hlan turin Order an han chhuah leh rih thin a.

Tichuan Zamuang lam Kuhva ching Association chuan Assam CM an zuk hmu a. Kuhva kal tlang tur an hal hnu chuan Assam sawrkar chuan Mizoram thar na na na chu Assam kal tlang an phal leh ta a ni. Heng buaina zawng zawng hi ngun tak leh chik tak a lo thlir tan chuan Assam min zuam dan em em hi mak a tih loh theih loh.