Aizawl; Home minister Lalchamliana chuan Mizoram ramri chungchangah 1875 notification chu sawrkar mai nilo, Mizo mipui zawng zawng dinna a ni tih sawiin, "A hlawhtlin tur leh hlawhtlin loh tur erawh sawi theih a ni lo," a ti.

March ni 7, 2022 Assembly budget session zawhna leh chhanna hunah Lalrindika Ralte zawhna chhangin, Home minister chuan, state pahnih, Mizoram leh Assam ramri pawm dan a inang lo tih a sawi a, "Mizoram sawrkarin Mizoram - Assam ramri a a pawm, Notification No.2299P dated 20 August, 1875 'Inner Line' on the Southern Frontier of the District of Cachar in a ramri a tarlan chin hmun tam tak Assam awpna/enkawlna hnuaiah a awm a, ram hi chan kan la ni chiah lova, laklet tuma hmalak mek a ni," tiin, ram chan ni-a lang, Assam enkawl/awp chin zau zawng pawh sawi mai theih a ni lo tih a sawi.

Home minister sawi danin, Mizoram sawrkar hmalakna ah NGO leh political party aiawh hrang hrang aiawh tunhnaia thukhawmin an din Boundary Committee, Dy. CM Tawnluia kaihhruai chu vawi 3 an thukhawm tawh a, ramri buai chingfel tura Assam nen a inbiakna neih a nih hun a tanchhan tur point hrang hrang pawh peihfel a ni tawh.

"Engtik ah emaw chuan hmaichhanah kan la sawiho ang a, 1875 ah kan ding ang a, chuta kan inbiak dan atang chuan hma kan la chhunzawm zel ang," Home minister chuan a ti bawk.