Aizawl; Ramri hrul buaina thleng vanga Mizoram a rawn haw, Hailakandi district a Mizo missionary te chu Assam police te thurawn angin Mizoramah an la awm a, an awmna hmun an pan theih hun tur hriat mai theih a la ni lo.

Synod Mission Board (SMB) secretary Rev. C. Zorammawian ZALEN a hrilh danin, Mizo missionary te chu fimkhur thilah an awmna hmun la pan rih lo turin Assam police ten thurawn an pe a, missionary te hian online a class an kalpui theih tho avangin an rawngbawlna ah harsatna lutuk thleng a awm lo.

"Assam police te hi ramri lamah an duty nasat avangin an indaih bik lo a, hemi vang hian boruak duhawmlo a thlen palh ah mualpho an hlau ve niin a lang," Rev. C. Zorammawia chuan tiin, "Kan missionary ten an hmun an pan theih hun tur hriat mai theih a la ni rih lo," a ti bawk. 

Mizoram leh Assam inrina bula July 26,2021 a inbeihna a thlen hnuah, Assam police te chuan Hailakandi district a Mizo missionary te chu an sahimna atan haw rih turin thurawn an pe a, chumi avang chuan Gharmura khua leh a chhehvela Mizo 49 te chu July 27, Thawhlehni zan khan Mizoramah an rawn haw.

Assam police ten Mizote hawna tur an rua-hmanpui a, Gharmura mite pawhin an buaipui a, lirthei an ngaihtuah bakah, state ramri thlengin an rawn veng a ni.