Aizawl November 11, 2022 : ZPM chuan document an hmuh atangin Mizoram sawrkar chuan Cabinet Resolution-a kan ram chin BEFR 1875 a pawm chin chu sawi loh, tuna kan ram luahlai leh enkawl chin tak ngial pawh hum ngam lo leh Assam lama compensation dil ngai leh forest clearance lak a ngai ta mai chu hriatthiam har an tih thu press mite hmaah an sawi.

ZPM PAC member TBC Lalvenchhunga chuan, "Tun hnaia four lane kawngpui laih compensation chungchang buainain a nghawng kal zelah kan sawrkarin NHIDCL hnena kan ram chin compensation a claim te kan zirchiang a. Nimin lawkah a hmun ngeiah kalin thil awmdan kan enfiah a. NH 306 four laning (Vairengte to North Chhimluang) hi Package hrang hrangah then niin Package 1&2 hi Assam lam chan a ni a. Package 3&4 hi Mizoram chan niin compensation a buaipui a ni," a ti.

Mizoram chhunga compensation pek turah CALA (Addl DC, Kolasib) hnuaiah Mizoram enkawl chhunga ramte chu verification leh survey te zawh vek a ni tawh a.
Amaherawhchu, Package then dan lo chhuakah Vairengte police check gate thlang lam Mizoram enkawl huam chhunga chhungkaw 14 zet chu Assam lam package 2 lamah rin luh a ni, a ti bawk.

Heng mite hian CALA hnenah an buaina hi thlenin Mizoram lama dah turin an ngen a. CALA hian NHIDCL hnenah thlen lehchhawngin company lam hian heng ram neitute hi package 2 hnuaia mi an nih avangin MoRTH in a pawm hnuah chauh enfiah theih a ni ang tiin a lo chhang, an ti.

TBC Vengchhunga chhuan, "NHIDCL in Forest Clearance a mamawh ang te Mizoram sawrkar hnenah a dil a. Mizoram sawrkarin a chhannaah map nen thil telin, Package 3, Vairengte Police chhaklam chauh chu kan enkawl chin leh clearance dil ngaiin a chhang a ni. Heng document hrang hrang atang hian kan sawrkar hian Cabinet Resolution a kan ram chin BEFR 1875 a pawm chin chu sawi loh, tuna kan ram luahlai leh enkawl chin tak ngial pawh hum ngam lo leh Assam lama compensation dil ngai leh forest clearance lak a ngai ta mai hi ZPM chuan hriatthiam har kan ti hle a ni," a ti.

Zangnadawmna leh phalna pe tura hmala  tura an duh thu sawiin, "Kan thalai ten thisen hial chhuaka an sah zauh sa takngial pawh kan sawrkar hian a lo hum ngam reng reng lo a ni tih a langchiang ta a, a lungchhiatthlak hle a ni. Kan sawrkarin ramri chungchanga a thusawite rintlak a nih loh zia a chiang hleah ZPM chuan kan ngai a, hetiang hi a nih avangin sawrkar hian kan ram luahchin huam chhunga zangnadawmna leh phalna pe tura hmala nghal turin kan phut bawk a ni," an ti.