Zophai kan ti a, Saihapui V, Buarchep leh Aitlang tih hming te hi tunhma lama kan khaw hming hriat lar tak an ni lem lo a, tun hnaia ramria Assam police leh Mizoram Police inkahna avangih heng khaw hming te hian ram pum a luah chho tawh a, chutihrualin heng hmun venghim tura duty te awmna erawhin duhthu a sam lo hle.

Khing kan tarlan hmun te venhim tura kan police dutyna hmun te khi chu tunhma lama kan force ten bu khuarna atana an hman a la nih loh avangin Buk pawh an nei tha lem lo hle a, heng an inkhuarna hmunah hian tui a harsa em em bawk a, ngaihtuahna sen chu a ngai khawp mai.

Heng hmun kan sawi hmasak te hi thuhran nise, Assam atanga Mizoram rawn luhna tuna Mizoram Police te inkhuarna Vairengte auto stand an tih thina an dutyna hmun chuan duhthu a sam lo hle a, ram dang khualzin rawn lut tan duty post leh barrack te hmuh hian an ngaihdan turah Mizoram chu dahsan a har khawp ang.

State pahnih te inkahchhan, Assam police ten Mizoram police te an rawn hnehchhuh, inkah hnua Mizoram lamin an luah zui leh tak barrack te pawh thawm that a la ni leh chuang lo a, an kahna hnuhma te pawh a ngai ngaia hmuh theih vek a la ni. National highway kamah an awm a, tui a nuam hran lo a, hmunhma tuaihnum dan a ropui lem lo. Helai hnaia sipai riahna dang pawh a chuti teh chiam lo a, silpaulin a langsar hle. 

Ramria lut chhuak lo thlithlai rengtu police duty post hi Auto driver te chawlhbuk ram tawh tak, tu te emaw buk hlui an luah ve bawk kha Police te hian an luah leh chhunzawm a, a chhuanawm lo tak zet a, ruahsur laia tawm hulna atan pawh a tlak meuh loh, niin an sawi. "Kan sipaite awmna hi thli leh ruahin a nuai ang tih hi kan hlauhpui thin. An mutna hi an sitting room a ni nghal a, rawng han bawlna tur pawh an nei lo chu a ni ber mai," tiin Vairengte pa pakhat chuan ZALEN a hrilh.

Mizoram Police te awmnaah hian inthiarna pawh a mumal lo hle a, chutihlaiin an thlang chiaha awm CRPF ho erawhin inthiarna hmun leh inbualna hmun te an nei tha thawkhat a, tui pawh an herhhaw thlap thlap.  niin an sawi. " Central lam chu kan sawi phak a awm lo a, mahse, kan ramri police te tehkhin hian kan inthlau chu a ni. kan ramri hi chu kan vawnhim leh a zahawm a ngai a ni," tiin ZALEN thu dawnna chuan a sawi.